Disi na a dei foe froeloesoe!
„Loekoe! Now na a spesroetoe boen ten. Loekoe! Now na a dei foe froeloesoe.” — 2 KORENTESMA 6:2.
1. San de fanowdoe foe meki Gado nanga Krestes feni wi boen?
JEHOVAH seti wan dei foe kroetoe a libisma famiri (Tori foe den Apostel 17:31). Efoe dati sa de wan dei foe froeloesoe gi wi, dan wi moesoe abi wan boen nen na Gado èn na a Kroetoeman foe en di a poti na wroko, Jesus Krestes (Johanes 5:22). Foe abi so wan boen nen, e aksi foe wi taki wi moesoe tjari wisrefi akroederi a Wortoe foe Gado èn wi moesoe abi bribi di e poesoe wi foe jepi trawan foe de troe disipel foe Jesus.
2. Foe san ede a grontapoe foe libisma famiri de farawe foe Gado?
2 Foe di a libisma famiri kisi sondoe foe den papa nanga mama, dati meki a grontapoe foe libisma famiri de farawe foe Gado (Romesma 5:12; Efeisesma 4:17, 18). Foe dati ede, den wan di wi e preiki gi, kan kisi froeloesoe soso efoe den kon boen baka nanga Gado. Na apostel Paulus ben tjari disi kon na krin di a ben e skrifi den kresten na Korente. Meki wi ondrosoekoe 2 Korentesma 5:10–6:10 foe si san Paulus ben taki foe kroetoe, foe kon boen baka nanga Gado, èn foe froeloesoe.
„Wi e tan overtoigi sma”
3. Fa Paulus „ben tan overtoigi sma”, èn foe san ede wi moesoe doe dati toe na ini a ten disi?
3 Paulus ben sori taki kroetoe abi foe doe nanga a preiki di wi e preiki, di a ben skrifi: „Wi alamala moesoe tjari kon na krin bifo a kroetoestoeroe foe Krestes, so taki ibriwan kan kisi san a e froedini foe den sani di a doe nanga jepi foe a skin, akroederi den sani di a doe, efoe a boen noso ogri. Foe di wi sabi a frede foe Masra, dati meki wi e tan overtoigi sma” (2 Korentesma 5:10, 11). Na apostel ’ben e tan overtoigi sma’ foe di a ben e preiki a boen njoensoe. Fa a de nanga wi? Foe di wi de krosibei kaba foe a kaba foe na godelowsoe seti foe sani disi, dati meki wi moesoe doe ala san wi man foe overtoigi trawan so taki den kan doe den sani di de fanowdoe foe kisi wan boen kroetoe foe Jesus èn foe kisi a boen-ati foe Jehovah Gado, a Fonten foe froeloesoe.
4, 5. (a) Foe san ede wi no moesoe skepi gi wisrefi foe den sani di wi e doe na ini a diniwroko foe Jehovah? (b) Fa a kan, taki Paulus ben skepi „gi Gado”?
4 Ma efoe Gado blesi a diniwroko foe wi, dan wi no moesoe skepi gi wisrefi. Na Korente, wan toe sma ben de di ben abi bigifasi srefisrefi foe densrefi noso foe tra man, èn dati ben meki pratifasi kon na ini a gemeente (1 Korentesma 1:10-13; 3:3, 4). Paulus ben sori go na a situwâsi disi, di a ben skrifi: „Wi no e rikomanderi wisrefi na oenoe agen, ma wi e gi oenoe wan okasi foe skepi foe wi, so taki oenoe kan piki den wan di e skepi foe a sma di den de na dorosei, ma no foe na ati. Bika efoe wi no ben de boen na wi froestan, dan a ben de gi Gado; efoe wi abi wan gosontoe froestan, dan dati de gi oenoe” (2 Korentesma 5:12, 13). Den heimemre sma no ben wani dati a gemeente de na ini wánfasi èn taki sani waka boen nanga a gemeente na jejefasi. Den ben wani skepi foe sani na dorosei, na presi foe jepi kompe bribiman kweki wan boen ati bifo Gado. Foe dati ede Paulus ben piri-ai gi a gemeente èn a ben taki baka ten: „Ma a sma di e skepi, meki a skepi na fesi Jehovah.” — 2 Korentesma 10:17.
5 A no de so, taki Paulus srefi ben skepi gi ensrefi? Wan toe sma kan denki taki na so a de, foe den sani ede di a ben taki foe a de di a de wan apostel. Ma Paulus ben moesoe skepi „gi Gado”. A ben skepi foe den boeweisi di ben sori taki a ben de wan apostel, so taki den Korentesma no ben o gowe libi Jehovah. Paulus ben doe disi foe tjari den kon baka na Gado, bika falsi apostel ben meki den go na a fowtoe sei (2 Korentesma 11:16-21; 12:11, 12, 19-21; 13:10). Tokoe, a no dorodoro Paulus ben e proeberi foe sori trawan o kefalek a ben de nanga den sani di a doe. — Odo 21:4.
A lobi foe Krestes e poesoe joe?
6. Fa a lobi foe Krestes moesoe abi krakti na wi tapoe?
6 Leki wan troe apostel, Paulus ben leri trawan foe a froeloesoe-ofrandi foe Jesus. A sani dati ben abi wan tranga krakti na ini a libi foe Paulus, bika a ben skrifi: „A lobi di Krestes abi, e poesoe wi, bika disi na san wi kroetoe, taki wán man ben dede gi ala sma; so boen, ala sma ben dede; èn en ben dede gi ala sma, so taki den wan di e libi, no moesoe libi moro langa gi densrefi, ma gi a sma di ben dede gi den èn di ben kisi wan opobaka” (2 Korentesma 5:14, 15). Dati na troetroe lobi di Jesus ben sori di a ben gi en libi gi wi! Foe troe, dati sa moesoe de wan krakti di e poesoe wi na ini wi libi. A de di wi de nanga tangi na ati gi Jesus foe di a gi en libi gi wi, moesoe boeweigi wi foe wroko fajafaja, foe meki a boen njoensoe foe froeloesoe bekènti di e kon foe Jehovah nanga jepi foe en lobi Manpikin. (Johanes 3:16; teki gersi Psalm 96:2.) A de so, taki „a lobi di Krestes abi” e poesoe joe foe abi wan prati fajafaja na a Kownoekondre preikiwroko èn a wroko foe meki disipel? — Mateus 28:19, 20.
7. San a wani taki foe ’no sabi no wan sma na ini skin’?
7 Foe di den salfoewan e gebroiki den libi na so wan fasi taki den e sori tangi na ati gi den sani di Krestes ben doe gi den, dati meki den ’no e libi moro langa gi densrefi, ma gi Krestes’. „Foe dati ede”, na so Paulus ben taki, „wi no sabi no wan sma moro na skinfasi. Awansi wi kon sabi Krestes na skinfasi foe troe, now wi no sabi en na so wan fasi moro” (2 Korentesma 5:16). Kresten no moesoe si trawan na skinfasi, kande e sori taki den lobi djoe moro leki heiden noso den goedoewan moro leki den pôtiwan. Den salfoewan „no sabi no wan sma moro na skinfasi”, foe di a de a jeje matifasi foe den di den abi nanga kompe bribiman san de prenspari. Den wan di ’ben sabi Krestes di a ben na skinfasi’, no ben de den libisma nomo di ben si Jesus troetroe di a ben de na grontapoe. Srefi efoe wan toe sma di e howpoe na ini a Mesias, ben si en wanten leki wan libisma nomo, dan den no moesoe si en moro leki wan libisma nomo. A ben gi en skin leki wan loesoe-paiman èn Gado ben opo en baka foe libi leki wan jeje di e gi libi. Trawan di sa opo baka foe kisi libi na hemel, ben sa moesoe gi a libisma skin foe den sondro taki oiti den ben si Jesus Krestes leki libisma. — 1 Korentesma 15:45, 50; 2 Korentesma 5:1-5.
8. Fa sma ben kon de „na ini wánfasi nanga Krestes”?
8 Paulus ben e taki ete nanga salfoewan, di a e taki moro fara: „Efoe wan sma de na ini wánfasi nanga Krestes, dan a de wan njoen kriatoeroe; den owroe sani pasa kaba, loekoe! njoen sani kon de” (2 Korentesma 5:17). Foe de „na ini wánfasi nanga Krestes” wani taki foe njan boen foe wánfasi foe denki nanga en (Johanes 17:21). A matifasi disi ben bigin gi a sma di Jehovah ben hari a sma dati kon na En Manpikin èn ben meki a kon gebore nanga jepi foe santa jeje. Leki wan manpikin foe Gado di gebore nanga jeje, a sma dati ben de „wan njoen kriatoeroe” nanga a froewakti foe abi wan prati na a hemel Kownoekondre makandra nanga Krestes (Johanes 3:3-8; 6:44; Galasiasma 4:6, 7). Den salfoe kresten disi kisi wan bigi grani foe diniwroko.
„Kon boen baka nanga Gado”
9. San Gado doe foe meki sma kon boen baka nanga en?
9 Jehovah feni a „njoen kriatoeroe” boen srefisrefi! Paulus e taki: „Ala sani e komoto na Gado, di e meki wi kon boen baka nanga en nanga jepi foe Krestes èn a ben gi wi a diniwroko foe meki sani kon boen baka, namkoe taki nanga jepi foe Krestes, Gado ben meki wan grontapoe kon boen baka nanga ensrefi, èn a no ben teri den sondoe foe den, èn a ben gi wi a wortoe foe meki sani kon boen baka” (2 Korentesma 5:18, 19). Foe sensi a ten di Adam ben sondoe, a libisma famiri kon de farawe foe Gado. Ma na wan lobi-ati fasi, Jehovah ben de a fosiwan foe opo a pasi foe meki sani kon boen baka nanga jepi foe na ofrandi foe Jesus. — Romesma 5:6-12.
10. Na soema Jehovah ben froetrow a diniwroko foe meki sani kon boen baka, èn san den doe foe klari a diniwroko disi?
10 Jehovah froetrow den salfoewan nanga a diniwroko foe meki sani kon boen baka, èn foe dati ede Paulus ben kan taki: „Foe dati ede wi na sma di e teki presi gi Krestes, a gersi neleki Gado nanga jepi foe wi ben aksi wan sani na wan serjoesoe fasi. Leki sma di de ini a presi foe Krestes wi e begi: ’Kon boen baka nanga Gado.’ ” (2 Korentesma 5:20) Na ini owroeten, sma di e teki presi gi trawan ben seni go spesroetoe na ini ten foe feantifasi foe loekoe efoe den kan meki taki feti no e feni presi (Lukas 14:31, 32). Foe di a sondoe grontapoe foe libisma famiri de farawe foe Gado, dati meki a seni den salfoewan di e teki presi gi en foe taigi sma fa den kan kon boen baka nanga En. Leki sma di e teki presi gi Krestes, den salfoewan e begi: „Kon boen baka nanga Gado.” A begi disi na a gi di den e gi trawan tranga na wan sari-ati fasi foe soekoe vrede nanga Gado èn foe teki a froeloesoe di Gado kan gi nanga jepi foe Krestes.
11. Nanga jepi foe bribi na ini a loesoe-paiman, soema kan kisi wan regtfardiki posisi na fesi Gado?
11 Ala libisma di e sori bribi na ini a loesoe-paiman, kan kon boen baka nanga Gado (Johanes 3:36). Paulus e taki: „A wan [Jesus] di no ben sabi sondoe, a [Jehovah] meki tron sondoe gi wi, so taki nanga jepi foe en wi ben sa kan tron regtfardikifasi foe Gado” (2 Korentesma 5:21). A volmaakti man Jesus ben de a sondoe ofrandi di ben pristeri gi ala Adam en bakapikin di e kisi froeloesoe foe a sondoefasi di den ben kisi foe den papa nanga mama. Den e tron „regtfardikifasi foe Gado” nanga jepi foe Jesus. A regtfardikifasi disi, noso a regtfardiki posisi na fesi Gado, e kon fosi gi den 144.000 kompe erfgenaam foe Krestes. Na ini a ten foe Jesus en Doesoen Jari Tiri, den volmaakti libisma di sa tanapoe nanga reti, sa kisi wan regtfardiki posisi leki grontapoe pikin foe a Têgo Tata, Jesus Krestes. A sa opo den na wan regtfardiki posisi na ini volmaaktifasi, so taki den kan sori taki den de getrow na Gado èn kan kisi a presenti foe têgo libi. — Jesaja 9:6; Openbaring 14:1; 20:4-6, 11-15.
„A spesroetoe boen ten”
12. Sortoe prenspari diniwroko e doe nanga jepi foe den sma di e teki presi gi Jehovah nanga den boskopoeman foe en?
12 Foe kisi froeloesoe wi moesoe handri akroederi den wortoe foe Paulus: „Foe di wi e wroko makandra nanga en [Jehovah], wi e aksi oenoe toe nanga tranga foe no teki a no-froedini boen-ati foe Gado èn misi a marki foe dati. Bika a e taki: ’Na ini wan boen ten mi ben jere oenoe, èn tapoe wan dei foe froeloesoe, mi ben jepi oenoe.’ Loekoe! Now na a spesroetoe boen ten. Loekoe! Now na a dei foe froeloesoe” (2 Korentesma 6:1, 2). Den salfoewan foe Jehovah di e teki presi gi en, nanga den boskopoeman foe en, den „tra skapoe”, no e teki a no-froedini boen-ati foe a hemel Tata foe den èn misi a marki foe dati (Johanes 10:16). Foe di den e tjari densrefi na wan opregti fasi èn e doe a diniwroko foe den fajafaja na ini a „boen ten” disi, meki den e soekoe a boen-ati foe Gado èn e taigi den sma di e tan na grontapoe taki disi na „a dei foe froeloesoe”.
13. San na a prenspari tori foe Jesaja 49:8, èn fa a ben kon troe gi a fositron?
13 Paulus e kari Jesaja 49:8, pe wi e leisi: „Disi na san Jehovah taki: ’Na ini wan ten foe boen wani mi piki joe, èn na ini wan dei foe froeloesoe mi jepi joe; èn mi ben tan kibri joe, so taki mi ben sa kan gi joe leki wan froebontoe gi a pipel, foe meki a kondre kon boen baka, foe teki den famiri goedoe abra baka di ben pori èn pe no wan sma ben de.’ ” A profeititori disi ben kon troe a fositron di a pipel foe Israèl ben kon fri foe katibo na Babilon èn baka dati ben drai go baka na den eigi kondre pe no wan sma ben libi moro. — Jesaja 49:3, 9.
14. Fa Jesaja 49:8 ben kon troe na ini a kefal foe Jesus?
14 A profeititori foe Jesaja ben kon troe moro fara, di Jehovah ben gi en „foetoeboi” Jesus leki „wan leti gi den nâsi, so taki a froeloesoe foe [Gado] kan doro te na den moro farawe presi foe grontapoe”. (Jesaja 49:6, 8; teki gersi Jesaja 42:1-4, 6, 7; Mateus 12:18-21.) A de krin taki a „ten foe boen wani”, noso „boen ten”, e fiti na Jesus di a ben de na grontapoe. A ben begi, èn Gado ben „piki” en. Dati ben sori foe de „wan dei foe froeloesoe” gi Jesus foe di a ben tan hori en soifri retifasi na wan volmaakti fasi èn na so fasi a „ben kon de frantiwortoe foe a têgo froeloesoe gi ala den wan di e gi jesi na en”. — Hebrewsma 5:7, 9.; Johanes 12:27, 28.
15. Sensi o ten Israèlsma na jejefasi doe moeiti foe boeweisi taki den de warti foe kisi a no-froedini boen-ati foe Gado, èn nanga sortoe marki na prakseri?
15 Paulus e fiti Jesaja 49:8 na salfoe kresten, e begi den foe ’no misi a marki foe a no-froedini boen-ati foe Gado’, foe di den ben o misi foe soekoe a boen wani foe en na ini a „boen ten” èn na ini a „dei foe froeloesoe” di A e gi. Paulus e taki moro fara: „Loekoe! Now na a spesroetoe boen ten. Loekoe! Now na a dei foe froeloesoe” (2 Korentesma 6:2). Sensi a Pinksterfesa foe 33 G.T., Israèlsma na jejefasi doe moeiti foe boeweisi taki den de warti foe kisi a no-froedini boen-ati foe Gado, so taki a „boen ten” ben sa de „wan dei foe froeloesoe” gi den.
’Rikomanderi wisrefi leki bedinari foe Gado’
16. Na ondro sortoe tesi, Paulus ben rikomanderi ensrefi leki bedinari foe Gado?
16 Wan toe man di ben abi demakandra nanga a gemeente na Korente, ben sori taki den no ben warti foe kisi a no-froedini boen-ati foe Gado. Den ben taki ogri-ati lei foe Paulus so taki den ben kan pori a makti di a ben abi leki apostel, ala di Paulus ben sorgoe taki a no ben e „meki dati sma e naki foetoe fadon”. Seiker Paulus ben rikomanderi ensrefi leki wan bedinari foe Gado ’foe di a ben moesoe froedrage foeroe, foe banawtoe ede, foe nowtoe ede, foe problema ede, foe fonfon ede, foe strafoe-oso ede, foe djoegoedjoegoe ede, foe tranga wroko ede, foe di a ben lasi sribi na neti, foe di a no ben abi njanjan son tron’ (2 Korentesma 6:3-5). Baka ten Paulus ben taki-go-taki-kon dati efoe den gensman foe en ben de bedinari, dan en ben de „a moro prenspari” bedinari foe di a ben njan pina foe doengroe-oso ede, foe fonfon ede, foe kefar ede, èn foe di a ben lasi sani. — 2 Korentesma 11:23-27.
17. (a) Nanga jepi foe sortoe eigifasi di wi e sori, wi kan rikomanderi wisrefi leki bedinari foe Gado? (b) San na „den fetisani foe regtfardikifasi”?
17 Neleki Paulus nanga den kompe foe en, wi kan rikomanderi wisrefi leki bedinari foe Gado. Fa? „Foe soifrifasi ede”, noso lespekifasi, èn foe e handri akroederi soifri bijbel sabi. Wi kan rikomanderi wisrefi „foe langa pasensi ede”, foe di wi e horidoro nanga pasensi te trawan e doe fowtoe sani noso e tjalensi wi. Wi kan rikomanderi wisrefi „foe boenfasi ede” te wi e doe sani di de wan jepi gi trawan. Boiti dati, wi kan rikomanderi wisrefi leki bedinari foe Gado foe di wi e teki a tiri di e kon nanga jepi foe en jeje, èn e sori „lobi sondro hoigrifasi”, e taki waarheid, èn e froetrow tapoe Gado foe a gi wi krakti so taki wi kan klari a diniwroko foe wi. Wan tra sani di abi wi belangstelling na taki Paulus ben boeweisi so srefi taki a de wan bedinari „nanga jepi foe den fetisani foe regtfardikifasi na reti-anoesei èn na kroektoe-anoesei”. Na ini feti foe owroeten, foeroetron a reti-anoe ben hori a feti-owroe èn a kroektoe-anoe ben hori a skilt. Di Paulus ben gebroiki jeje fetisani teige den falsi leriman, a no ben gebroiki fetisani foe a sondoe skin soleki trikifasi nanga bedrigifasi (2 Korentesma 6:6, 7; 11:12-14; Odo 3:32). Paulus ben gebroiki regtfardiki „fetisani”, noso wrokosani di e meki a troe anbegi go na fesi. Na so wi moesoe doe toe.
18. Efoe wi na bedinari foe Gado, dan fa wi sa tjari wisrefi?
18 Efoe wi na bedinari foe Gado, dan wi sa tjari wisrefi neleki fa Paulus nanga den kompe wrokoman foe en ben tjari densrefi. Wi sa handri leki kresten awansi trawan e lespeki wi noso den no e lespeki wi. Te takroe sani e taki foe wi, dan dati no sa tapoe wi foe doe wi preikiwroko, èn so srefi wi no sa kisi heimemre efoe boen sani e taki foe wi. Wi sa taki waarheid èn a kan meki taki trawan e erken wi foe den wroko di wi e doe leki sma di e dini Gado. Te wi de na ini kefar taki wi kan dede srefi foe di feanti wani doe wi ogri, dan wi sa froetrow tapoe Jehovah. Èn wi sa teki tranga-leri nanga tangi na ati. — 2 Korentesma 6:8, 9.
19. Fa wi kan ’meki foeroe sma goedoe’ na jejefasi?
19 Di Paulus ben kaba en takimakandra foe a diniwroko foe meki sani kon boen baka, dan a ben taki foe ensrefi èn den kompe foe en „leki sma di e sari ma di tokoe e prisiri ala ten, leki pôtisma, ma di tokoe e meki foeroe sma kon goedoe, leki sma di no abi notinoti èn di tokoe abi ala sani.” (2 Korentesma 6:10). Ala di den bedinari dati ben abi nowtoe di ben meki den sari, tokoe den ben prisiri na inisei. Na materia sei den ben de pôtisma, ma den ’ben meki foeroe sma goedoe’ na jejefasi. Foe taki en leti, den ’ben abi ala sani’ bika a bribi foe den ben gi den goedoe na jejefasi — srefi a howpoe foe tron hemel manpikin foe Gado. Èn den ben abi wan goedoe èn kolokoe libi leki kresten bedinari (Tori foe den Apostel 20:35). Neleki den, wi kan ’meki foeroe sma goedoe’ foe di wi abi wan prati na ini a diniwroko foe meki sani kon boen baka nownowde — na ini a dei disi foe froeloesoe!
Froetrow na tapoe froeloesoe foe Jehovah
20. (a) San ben de a serjoesoe angri foe Paulus, èn foe san ede ten no ben de foe lasi? (b) San de wan marki foe a dei foe froeloesoe pe wi e libi now na ini?
20 Di Paulus ben skrifi a di foe toe brifi foe en gi den Korentesma na ini a pisi ten foe 55 G.T., soso so wan 15 jari ben tan abra ete gi a djoe seti foe sani. Na wan opregti fasi na apostel ben wani dati djoe nanga heiden ben moesoe kon boen baka nanga Gado nanga jepi foe Krestes. Dati ben de wan dei foe froeloesoe, èn foeroe ten no ben de moro. We, wi de ini wan srefi sortoe kaba foe wan seti foe sani sensi 1914. Na heri grontapoe a Kownoekondre preikiwroko di e doe now, e marki disi leki a dei foe froeloesoe.
21. (a) San na a jaritekst gi 1999? (b) San wi moesoe doe na ini a dei disi foe froeloesoe?
21 Sma foe ala nâsi moesoe jere foe den sani di Gado seti foe sma kisi froeloesoe nanga jepi foe Jesus Krestes. Wi no kan lasi ten moro. Paulus ben skrifi: „Loekoe! Now na a dei foe froeloesoe.” Den wortoe dati foe 2 Korentesma 6:2 sa de a jaritekst foe 1999 foe Jehovah Kotoigi. Dati e fiti troetroe, bika wi o kisi foe doe nanga wan sani di ogri moro leki a pori foe Jerusalem nanga a tempel foe en! Leti na wi fesi, wi abi a kaba foe a heri seti foe sani disi, di abi foe doe toe nanga ibriwan sma na grontapoe. Now — a no tamara — na a ten foe handri. Efoe wi e bribi taki froeloesoe na foe Jehovah, èn efoe wi lobi Jehovah, èn efoe wi e warderi têgo libi, dan wi no sa misi a marki foe a no-froedini boen-ati foe Gado. Nanga wan angri di komoto na a ati foe gi grani na Jehovah, wi sa sori nanga wortoe èn nanga doe, taki troetroe wi wani a sani di wi e bari taki: „Loekoe! Now na a dei foe froeloesoe.”
San joe ben sa piki?
◻ Foe san ede a de kefalek prenspari foe kon boen baka nanga Gado?
◻ Soema na den sma di e teki presi gi Gado èn den boskopoeman foe en di e doe a diniwroko foe meki sma kon boen baka nanga en?
◻ Fa wi kan rikomanderi wisrefi leki bedinari foe Gado?
◻ San a jaritekst foe 1999 foe Jehovah Kotoigi wani taki gi joe?
[Prenki na tapoe bladzijde 17]
Joe e preiki fajafaja èn e jepi trawan foe kon boen baka nanga Gado, neleki fa Paulus ben doe?
Amerkankondre
Fransikondre
Ivoorkust
[Prenki na tapoe bladzijde 18]
Joe de na mindri den ipi-ipi sma di e kon boen baka nanga Jehovah Gado na ini a dei disi foe froeloesoe?