Kresneti na ini den Owstusei Kondre
• SO WAN TU HONDRO YARI PASA KABA, wan prenspari sabiman fu Korea ben fisiti Peking, na ini China. Di a ben e tanapu e luku wan skedrei na a plafon fu wan kathedraal, dan a ben si wan prenki fu Maria di e hori a pikin Yesus na ini en anu. A man disi ben taki fu a skedrei disi di ben fruwondru en:
„Wan uma ben hori wan pikin di ben luku siki na tapu en bowtu, wan pikin di abi so wan feifi noso siksi yari. A ben gersi leki na uma no ben man opo en ede luku a pikin, neleki a no ben man frudrage fu si a sari situwâsi fu en manpikin. Èn bun fara na den baka wan lo yeye nanga beibi di abi frei ben de èn den ben e frei lontu. Ala di mi ben e luku den na tapusei fu mi, a ben gersi leki iniwan momenti den ben o fadon kon na mi tapu. Nanga fruwondru mi ben langa mi anu fu teki den.”
A SANI disi ben pasa langa ten na baka a Hervorming ben bigin na ini Europa, langa ten na baka a dungru pisi ten fu den Mindri Yarihondro. Ma moro furu sma na ini den Owstusei kondre no ben sabi Krestendom, neleki fa den no ben sabi a skedrei srefi. ¡Ma a situwâsi dati kenki srefisrefi! Na ibri Kresneti ten den e sori prenki fu a beibi Yesus. Den Owstusei kondre kon gwenti den sortu prenki disi, èn furu strati drape gersi den strati fu Europa now.
Na tapu a neti fu 25 november 1998, wan mun bifo Kresneti, bigi faya e leti na a Champs-Élysées na ini Parijs nanga den moro leki 100.000 lampu di de na den 300 bon di e tanapu ini wan rèi na a pôpi pasi dati. Na wan srefi sortu fasi, na wan strati na mindri a foto Seoul, na Korea, wan kefalek bigi Kresneti bon e tanapu na wan bigi wenkri èn a e bigin skèin leti na ini a dungru mamafoto dati. Heri esi na baka, sma e moi den strati drape nanga moi Kresneti sani.
Kresneti programa e kon na tapu telefisi, radio, èn na ini koranti ibri dei. Fu di sma e kisi a Kresneti firi, meki a heri kondre abi kefalek furu fu du gi a kaba fu a yari. Den kerki na ini Seoul, èn a nomru fu den e fruwondru furu sma, e meki kon moi esi-esi. So bun, na ini Korea nanga furu tra kondre na Owstusei bun furu sma e kisi a Kresneti firi na a ten te Amerkankondre abi en Thanksgiving Day fesa na a kaba fu november.
Moro furu kondre na Owstusei, sma no e si leki wan pisi fu Krestenhèit. Fu eksempre, soso 26,3 procent fu den sma di e libi na ini Korea e taki dati den na Kresten. Na ini Hong Kong a de 7,9 procent, na ini Taiwan 7,4 procent, èn na ini Yapan soso 1,2 procent. A de krin taki moro furu sma na den Owstusei kondre no abi a Kresten bribi, ma a gersi taki den no abi trobi fu hori Kresneti. Fu taki en leti, a gersi taki nofotron den abi moro faya gi a fesa leki den sma na den Westsei kondre di abi a Kresten bribi. Sma sabi Hong Kong fu eksempre, fu a fasi fa den e hori Kresneti nanga wan lo opo-opo, ala di moro fu den sma di e libi na ini a kondre na Budasma noso Taosma. Srefi na ini China, pe soso 0,1 procent fu den sma e taki dati den na Kresten, Kresneti e kon pôpi moro nanga moro na den sma di e libi na ini a kondre.
Fu san ede so furu sma na ini den Owstusei kondre e hori Kresneti? Fu san ede sma di no e si Yesus leki a Mesias e hori Kresneti tu, a dei di moro furu sma di e taki dati den na Kresten e si leki a dei di Krestes gebore? ¿Tru Kresten musu denki so tu fu Kresneti? Wi sa feni den piki te wi sa ondrusuku fa Kresneti ben kon so pôpi na ini Korea, wan kondre na Owstusei di de hondrohondro yari kaba.