Kresneti—Fu San Ede A De na ini den Owstusei Kondre Srefi?

WAN owruten bribi na ini den Owstusei kondre e meki wi prakseri a Santa Claus fu Kresneti. Dati na a bribi di den sma na ini Korea e bribi na ini wan sma di nen Chowangshin, èn wan srefi sortu sani de na son Sneisi èn na son Yapansma.

Den sma ben si Chowangshin leki wan gado di ben abi a frantwortu fu a kukru, wan gado fu faya di ben abi fu du nanga na owruten anbegi di sma ben anbegi a faya na ini Korea. (Na ini owruten, den sma fu Korea ben luku bun fa den ben tyari faya krofaya, èn den ben sorgu taki den krofaya no ben dede noiti.) Den sma ben bribi taki a gado disi ben hori ai na tapu a fasi fa den memre fu wan osofamiri ben e tyari densrefi wan yari langa, èn baka dati a gado ben pasa gowe na ini a kukru onfu èn na ini a schoorsteen fu opo go na hemel.

Soleki fa den ben bribi, dan Chowangshin ben fruteri a kownu fu hemel na tapu a di fu 23 dei fu a mun december fa den sma ben tyari densrefi. Den ben fruwakti taki a ben o kon baka na a kaba fu a yari na ini a schoorsteen nanga na ini na onfu, fu tyari pai nanga strafu kon, akruderi a fasi fa ibriwan sma ben tyari ensrefi. A dei di a ben drai kon baka, den memre fu na osofamiri ben musu leti kandra na ini a kukru èn na tra presi na ini na oso. Prenki fu a kukru gado dati na ete wan sani di gersi Santa Claus — ¡a ben de na ini redi! A ben de wan gwenti taki a wefi fu a manpikin ben musu meki wan kowsu soleki fa sma na ini Korea ben gwenti meki kowsu, èn te a son ben drai kon baka na ini winter, dan a ben gi a mama fu en masra den kowsu. Dati ben de fu sori taki a ben winsi taki a mama fu en masra ben sa libi langa, fu di den dei ben kon moro langa na baka a dei dati.

¿Yu no e si wan tu sani di e meki taki den penti di wi kari na fesi gersi Kresneti? Den abi den srefi tori nanga den srefi gwenti: a schoorsteen, den kandra, den kado di den e gi makandra, den kowsu, wan owruman na ini redi krosi, èn a dei fu a fesa. Ma toku den sani disi wawan di gersi makandra no e meki taki sma na ini Korea e teki Kresneti na wan makriki fasi. A bribi di den ben e bribi na ini Chowangshin ben lasi gowe pikinmoro kaba na a ten di den ben kon sabi Kresneti a fosi leisi. Fu taki en leti, moro furu Koreasma na ini a ten disi no sabi srefi taki a sortu bribi disi oiti ben de.

Ma toku disi e sori fa den gwenti di abi fu du nanga a ten te a son e drai kon baka na ini a winter èn na a kaba fu a yari, ben panya na heri grontapu na difrenti fasi. Na ini a di fu fo yarihondro G.T., a moro bigi kerki na ini a Gran Kownukondre fu Rome ben kenki a nen fu a Saturnalia, a heiden Rome fesa di abi fu du nanga a geborte fu a son gado, èn ben meki disi tron wan pisi fu Kresneti. A Kresneti fesa ben abi leki bakapisi taki den sma ben bigin baka nanga den gwenti di den ben abi fosi, ma disi leisi nanga wan tra nen. Fa dati ben kan?

San A Gi Di Den Ben E Gi Makandra Kado Ben Abi fu Du Nanga Tori

A gi di den ben e gi makandra kado de wan gwenti di noiti ben tapu. Wan langa pisi ten den Koreasma ben prisiri trutru fu gi sma kado èn fu kisi kado. Disi ben de wán sani di ben meki a Kresneti fesa kon pôpi na ini Korea.

Gi den Amerkan srudati di ben de na ini Korea na baka a di fu Tu Grontapufeti, èn di ben wani meki den sma kon lobi den, den kerki ben de presi pe den ben kan miti fu prati kado èn pe den ben kan yepi den sma. Spesrutu na tapu Kresneti Dei a sani disi ben feni presi. Furu pikin ben go na den kerki soso fu di den ben wani sabi sani, èn drape gi a fosi leisi den ben kisi skrati leki kado. Yu kan frustan taki furu fu den ben wakti fayafaya tapu a tra Kresneti.

Gi den sortu pikin disi, Santa Claus ben de wan Amerkan srudati di weri wan redi kowsumusu. Odo 19:6 e taki: „Ibriwan sma na wan kompe fu a sma di e gi kado.” Iya, a ben wroko heri bun fu gi kado. Ma soleki fa yu kan frustan fu a vers dati, dan den sortu kado disi a no wan dyaranti gi matifasi di e tan wan langa ten. Srefi na ini Korea, furu sma de di ben ondrofeni taki kerki ben wani taki noti moro leki a nyan di den ben nyan skrati na ini den yongu yari. Ma sma no ben frigiti Kresneti. Di na ekonomia fu Korea ben gro esi-esi, dan a bisnis ben gro tu, èn a gi di sma ben e gi makandra kado na Kresneti ben de wan makriki fasi fu meki sma bai moro sani. Bisnis ben gebroiki Kresneti gi den eigi wini, so taki den ben kan meki moro moni.

Dati e meki yu si moro bun san Kresneti wani taki na ini den Owstusei kondre fu a ten disi. Sma e meki nyun sani fu di den e hori na prakseri taki libisma abi moro faya fu bai sani gi Kresneti. Na mindri-yari kaba sma e bigin sreka sani fu meki reklame. Na a kaba fu a yari a nomru fu den sani di den seri e doro wan heimarki, fu di sma e bai Kresneti kado, Kresneti karta, nanga poku. ¡Iya, den reklame ben o meki moro furu yongusma firi takru efu den ben o tan na oso èn no ben kisi no wan kado na tapu a neti fu Kresneti!

Te a Kresneti Dei e kon moro krosibei, dan den wenkri nanga den bigi wenkrigrupu na ini Seoul e span nanga sma di de drape fu bai kado, èn a srefi sani e pasa na ini den tra foto fu den Owstusei kondre. A verkeer e fasi bika a druk tumusi. Den hotel, den bisnis kontren, restaurant, nanga nightclub span nanga sma. Bradyari babari — tranga singi — de fu yere. Na tapu a neti fu Kresneti, yu kan si drungu man nanga drungu uma e waka na tapu strati di furu nanga dotisani.

Na so Kresneti tan. Kresneti na ini den Owstusei kondre no de wan fesa di soso den sma di e taki dati den na Kresten e hori. A de krin taki na ini Korea èn na ini tra presi, moro furu na a bisnis abi wini fu a fesa disi fu Krestenhèit. ¿Ma sma kan taki dati na a bisnis wawan meki Kresneti kon de wan sani di no e kruderi kwetikweti nanga a yeye fu Krestes? Tru Kresten musu ondrosuku moro fini san na a seryusu penti di abi fu du nanga disi.

A Rutu fu Kresneti

Wan werdri meti di sma froisi go na ini wan koi fu wan dierentuin, na wan meti ete. Èn a ben sa de wan bigi fowtu fu prakseri taki a tron wan osometi soso fu di a ben de wan pisi ten na ini wan koi èn a gersi leki a e prisiri nanga den pikin fu en. Kande yu yere taki den meti ben du den sma di e wroko na den dierentuin ogri.

Na wan tu fasi wi kan taki pikinmoro a srefi fu a Kresneti fesa. Na ini a bigin a ben de wan „meti” di no ben de na ini Krestendom. Na ondro na ondro-edeprakseri „San a Abi fu Du Nanga a Saturnalia fu Rome”, The Christian Encyclopedia (na ini Koreatongo)a e taki fu Kresneti:

„A heiden Saturnalia nanga Brumalia ben abi tumusi furu fu du nanga den pôpi gwenti fu den sma, so taki Kresten no ben man poti en na wan sei. Kande a spesrutu prakseri di Kèiser Constantijn ben poti na Sonde (a dei fu Phoebus nanga Mithras èn so srefi a Dei fu Masra) . . . ben meki den Kresten fu a di fu fo yarihondro denki taki a fiti fu meki a friyaridei fu a Manpikin fu Gado de a srefi dei di a son gebore. A heiden fesa nanga a bradyari fasi fa sma ben handri sondro dwengi densrefi èn a fasi fa den ben meki prisiri ben de so pôpi taki den Kresten ben breiti taki den ben abi wan reide fu tan hori a heiden fesa, ala di a fasi fa den ben denki noso den maniri fu den no ben kenki furu.”

¿Yu denki taki no wan sma ben o gens a fasi disi fa sani waka? A srefi encyclopedia e taki: „Den Kresten preikiman fu den Westsei kondre nanga den moro Krosibei Owstusei kondre ben kragi teige a sani di sma ben du fu hori Krestes en friyaridei na wan fasi di no ben seryusu èn di no ben fiti srefisrefi, ala di den Kresten fu Mesopotamia ben taki dati den Westsei brada fu den ben anbegi kruktu gado èn ben anbegi a son bika den ben teki a heiden fesa disi leki wan Kresten fesa.” Fu tru, fu sensi a bigin, wan sani no ben bun srefisrefi. „Toku sma ben teki a fesa heri esi èn a ben tron so wan gwenti taki srefi a Protestant kenki fu a di fu tin na siksi yarihondro no ben man puru en”, na so na encyclopedia e taki.

Iya, wan fesa gi a songado, di no ben de wan pisi fu Krestendom, ben de wan sani di a moro bigi kerki ben teki abra. A ben kisi wan tra nen — ma den ben tan hori en leki fa den heiden ben hori en. Èn a ben yepi fu tyari heiden bribi kon na ini den kerki di e kari densrefi Kresten kerki, èn a ben yepi fu pori a yeyefasi fu sma. Historia e buweisi taki di Krestenhèit ben opo kon, dan a prakseri di den abi biginbigin fu „lobi yu feanti” ben meki presi gi a go di sma ben go na baka na moreel sei èn gi ogri orloku.

Baka ten a ben kon krin fu si taki ala di a fesa abi a falsi nen, toku Kresneti ben sori taki a rutu fu en ben de na den heiden, fu di sma e hori en na wan bradyari fasi, den e dringi sopi pasa marki, den e meki soso prisiri, den e dansi, den e gi makandra kado, èn den e moi den oso nanga bon di e tan grun. Fu doro a trutru marki fu bisnis — fu seri moro sani — meki den ben gebroiki Kresneti na ala sortu fasi. Den sani leki koranti nanga telefisi e prèise en; den e meki a publiki abi prisiri. Na mindri a foto Seoul srefi, wan wenkri di moro furu e seri ondrokrosi, ben kon na ini a nyunsu na tapu telefisi bika den ben sori wan Kresneti bon na a fensre fu en di den ben moi soso nanga ondrokrosi. A ben de fu si taki a ben de Kresneti, ma a marki fu gi Krestes wan switi kon no ben de fu si kwetikweti.

San Bijbel E Sori fu Kresneti

San wi e leri fu den sortu sani disi di a historia e sori wi èn a fasi fa sani ben waka? Efu wan empi no knopo bun na a bigin kaba, dan a wan-enkri fasi fu knopo en bun, na fu bigin na a bigin baka. ¿A no so a de? Ala di a sani disi tru, toku son sma e rideneri taki awansi a rutu fu Kresneti de na a anbegi di den heiden ben anbegi a son, toku Krestenhèit feni Kresneti bun. Fu dati ede den e denki taki sma teki a fesa leki a friyaridei fu Krestes èn taki a wani taki wan tra sani now.

Wi kan leri wan prenspari les fu wan sani di ben feni presi na ini a historia na ini na owruten Yuda. Na ini 612 b.G.T. den sma fu Yuda ben bigin nanga a heiden anbegi fu a son na ini a tempel fu Yerusalem. ¿So wan sortu heiden anbegi ben bun soso fu di a ben du na wan presi di ben de fu du krin anbegi gi Yehovah Gado? A Bijbel skrifiman Esekièl ben skrifi fu a son anbegi di ben du na a tempel fu Yerusalem: „¡Luku! na a dromofo fu a tempel fu Yehovah, na mindri a gadri nanga na altari, so wan twenti na feifi man ben de . . . èn den fesi ben luku go na a owstusei, èn den ben boigi go na a owstusei, go na a son. Èn a ben taigi mi moro fara: ’¿Yu si disi, o manpikin fu libisma? ¿A de so wan pikin sani gi na oso fu Yuda fu du den tegu sani di den du dyaso, taki den musu furu a kondre nanga ogridu èn taki den musu kosi mi baka, èn den e sutu a taki go na mi noso?’”—Esekièl 8:16, 17.

Iya, na presi fu santa a tempel, a heiden anbegi dati ben poti a heri tempel na ini kefar. Na ini heri Yuda den ben du den sani disi èn dati ben meki furu ogridu ben du na ini a kondre dati èn taki sma ben go na baka na moreel sei. Na so a de tu na ini Krestenhèit, pe den gwenti di abi den rutu na ini a son anbegi fu Saturnalia, de fu si krin na Kresneti. A prenspari fu si taki wan tu yari baka di Esekièl ben kisi a fisyun dati, dan Yerusalem ben kisi a strafu fu Gado — den Babilonsma ben pori en.—2 Kroniki 36:15-20.

Kande a ben gi yu fu lafu di yu ben leisi a fasi fa a sabiman fu Korea ben taki fu a yongu Yesus, di kari na ini na artikel na fesi. Ma a de trutru so, taki ala di a kon fu wan sma di no ben abi soifri sabi fu Krestes, toku a fasi fa a ben prakseri fu a tori wani taki furu. A ben sa kan meki sma di e hori Kresneti go prakseri seryusu fu sani. Fu san ede? Bika Kresneti no e taki bun fu Krestes srefisrefi. Fu taki en leti, a no e sori sma san na a posisi di Krestes abi now. Yesus a no wan beibi moro na ini wan nyanyan baki.

Ibritron baka Bijbel e sori taki Yesus na a Mesias now, a makti Kownu fu Gado en hemel Kownukondre (Openbaring 11:15). A de klariklari fu tyari wan kaba kon na pôtifasi èn na pina di sma no frigiti te den e yepi sma di abi en fanowdu na a ten fu Kresneti.

Fu taki en leti fa a de, Kresneti no tyari no wan wini kon gi den kondre fu Krestenhèit èn so srefi gi den tra kondre, so srefi no gi den Owstusei kondre. Na presi fu dati, a ben puru sma prakseri fu a tru Kresten boskopu di abi fu du nanga a Kownukondre fu Gado èn a kaba fu a disiten ogri sistema (Mateus 24:14). Wi e gi yu a kari fu aksi Yehovah Kotoigi fa a kaba dati sa kon. Èn yu kan leri fu den san na den têgo blesi di grontapu sa kisi baka dati, na ondro a tiri fu Gado Kownukondre èn fu Yesus Krestes di e tiri leki Kownu.—Openbaring 21:3, 4.

[Futuwortu]

[Prenspari pisi na tapu bladzijde 6]

Kresneti ben yepi fu tyari heiden bribi kon na ini den kerki di e kari densrefi Kresten kerki

[Prenki na tapu bladzijde 5]

Furu pikin ben go na den kerki soso fu di den ben wani sabi sani èn den ben kisi skrati leki kado. Fu dati ede den ben wakti fayafaya tapu a tra Kresneti

[Prenki na tapu bladzijde 7]

A neti fu Kresneti na mindri a foto Seoul, na Korea

[Prenki na tapu bladzijde 8]

Krestes a no wan beibi moro, ma a makti Kownu fu Gado Kownukondre