Feni Trutru Vrede na ini wan Kondre Di Lai Problema

„Wi kan firi na ogri krakti fu a feti di sekte e feti nanga makandra, krinkrin now”, na so wan nyunsu ben taki na ini 1969. Dati ben de di den Problema, den bruya di de nownow na ini Noord-Ierland, ben kon moro ogri.

A FETI di sekte e feti nanga makandra èn e kiri makandra ben kon tron wan aladei sani di Protestant nanga Lomsu kiriman, „den faya-ati man na ala tu sei” fu a politiek èn relisi strei, ben bigin feti moro hebi fu kisi moro makti na ini Ierland. Fu sensi a ten dati „moro leki 3600 sma dede èn dusundusun sma ben kon malengri na ini den pikinmoro 30 yari fu a feti”, na so The Irish Times e fruteri.

Ma wi sabi taki disi a no wan nyun feti. A de wan problema na ini Ierland furu hondro yari kaba. Na ini den yari di no pasa so langa ete, a moro takru bakapisi fu a feti de fu firi na ini Noord-Ierland, ma a bita-ati èn a pratifasi di a feti disi tyari kon ben pori a libi fu sma na ini heri Ierland.

Na ini a situwâsi dati, Yehovah Kotoigi taki moro leki wan hondro yari langa, fu a trutru lusu gi den problema di trobi a kondre disi di lai problema. A lusu dati na Gado Kownukondre di Yesus Krestes e tiri (Mateus 6:9, 10). Na a bigin fu den Problema na ini 1969, dan 876 Yehovah Kotoigi ben de na ini Ierland. Now moro leki 4500 de na ini moro leki 100 gemeente. Dyaso na wan tu ondrofenitori fu wan tu sma di no e wroko moro gi politiek èn gi srudati.

„¡Te Mi Kon Bigi, Dan Mi O Feti gi na IRA!”

Michaela ben kweki leki wan Lomsu na ini a Republiek Ierland. Na skoro a ben leri pikinso fu a historia fu Ierland èn fu a kesekese di de furu yarihondro kaba nanga Ingrisikondre. Di a ben de wan pikin, dan a ben kisi tranga bita-ati gi den Ingrisisma, di a ben si leki „sma di e kwinsi a pipel fu Ierland”. Di a ben abi tin yari, a ben taigi en granmama, „¡Te mi kon bigi, dan mi o feti gi na IRA!” (Legre fu Republiek Ierland) „Mi ben kisi wan klapu na ini mi fesi taki te leki now mi e memre dati”, a e taki. Baka ten a ben kon sabi, taki fosi en granpapa ben de na ini na Ingrisikondre legre na ini a Fosi Grontapufeti. Wan leisi en granmama ben musu go tanapu na fesi en granpapa so taki den memre fu na IRA no ben o sutu en.

Toku di Michael ben kon moro owru, dan a ben wani du wan sani fu yepi den tra Lomsu fu en na ini Noord-Ierland. „Na a ten dati mi ben denki taki den wan-enkri sma di e du wan sani fu yepi den Lomsu fu Noord-Ierland, ben de na IRA”, a ben taki. Fu di a ben feni taki a ben abi bun reide, meki a ben tron wan memre fu na IRA èn a ben leri fu gebroiki fetisani. Den Protestant afu-srudati ben sutu dri mati fu en kiri na ini Noord-Ierland.

Te fu kaba, Michael ben lasi ala howpu na ini a feti fu den afu-srudati, fu eksempre fu di a bita-ati feantifasi di ben de na mindri den difrenti afu-srudati grupu ben trobi en. Di a ben de na ini strafu-oso fu den ogri di a ben du makandra nanga IRA, a ben begi Gado fu yepi en fu feni a trutru fasi fu têgo vrede nanga retidu. Wan pisi ten na baka, Yehovah Kotoigi ben kon na en oso. Ma den takru denki fu fosi, ben de wan problema. Den Kotoigi ben de Ingrisisma. A tranga bita-ati di a ben abi gi den ben meki a ben muilek gi en fu arki. „A no ala ten mi ben sori taki mi ben breiti fu si den”, a e taki, „ma den ben tan fisiti mi èn den ben tan taki nanga mi, èn mi ben bigin si taki Gado Kownukondre ben o tyari wan kaba kon na ala politiek nanga sociaal onregtfardikifasi di mi ben e feti fu puru na pasi.”—Psalm 37:10, 11; 72:12-14.

A problema ben kon wan neti di Michael ben miti en komandanti ofsiri fu na IRA, di ben taki: „Wi abi wan wroko gi yu.” „Mi ben firi taki nownow ben de a ten fu teki wan bosroiti”, Michael e taki, „èn fu dati ede mi ben hari wan dipi bro èn mi ben taki, ’now mi na wan Kotoigi fu Yehovah’, ala di mi no ben dopu ete na a ten dati. Mi ben sabi wawan taki mi ben wani de wan futuboi fu Yehovah.” „Wi musu poti yu sei wan skotu èn sutu yu kiri”, a komandanti ofsiri ben piki. Ala di a komandanti ben taki dati a ben o du en na ogri disi, toku Michael ben gowe libi na IRA. A ben feni deki-ati fu du disi bika a ben meki den wortu fu Yehovah wroko na tapu en frustan nanga en ati. „Baka ten, mi wefi nanga wan tu fu den pikin fu mi ben gi den libi abra tu na Yehovah. Now wi abi trutru vrede na ini wi ati. Èn ala ten wi sa taigi Yehovah tangi taki a gi wi na okasi fu leri a waarheid èn fu prati a boskopu fu vrede na ini wan kondre di lai problema.”—Psalm 34:14; 119:165.

A E Gi Kibri Trutru Te Wi No E Teki Partèi

„Mi ben kweki na boitipresi na ini a distrikt Derry, na ini Noord-Ierland”, Patrick e taki. „Di mi ben de wan pikin, dan mi ben sabi soso den Problema. A de krin taki a situwâsi dati ben abi krakti na tapu a fasi fa mi ben si sani èn na tapu a denki fu mi.” Wan ogri-ati loyaalfasi gi a kondre èn a teige di sma teige den Ingrisiman sondro bun reide, ben meki Patrick kon denki leki den sma di wani tyari lusu kon nanga tranga. A ben si taki kerkisma na ala tu sei fu a politiek strei ben poti prenspari Kresten gronprakseri na wan sei èn so srefi den gronprakseri di abi fu du nanga libisma maniri. Fu dati ede a ben drai baka gi relisi, èn te fu kaba a ben tron wan sma di no bribi taki Gado de, èn a ben tron wan fayafaya Marxist.—Teki gersi Mateus 15:7-9; 23:27, 28.

„Den fosi sani di mi kan memre, na a weigri di den republikein strafuman fu a Noordsei ben weigri fu nyan”, Patrick e taki. „Den ben abi furu krakti na mi tapu. Mi e memre taki na ala presi pe mi ben man mi ben poti den fraga fu Ierland èn mi ben skrifi boskopu na den publiki presi di ben taki sani teige Ingrisikondre. Di mi ben abi 15 yari nomo, mi ben de wan waktiman na wan beri fu wan fu den man di ben weigri fu nyan èn di ben lasi en libi na ini strafu-oso.” Leki furu tra sma di ben fasi na ini a kefalek bigi bruya fu den ten dati, na so Patrick ben abi wan prati tu na den opruru èn na a waka di sma ben waka na strati fu sori taki den no e agri nanga sani. Disi a ben du fu feti baka a sani di en ben si leki retidu gi ala sma na ini a libimakandra èn na abi di ala sma musu abi den srefi reti. A ben tron bunbun mati fu wan lo nationalist di wani tyari wan lusu kon nanga tranga, èn di tiriman fu Ingrisikondre ben poti furu fu den na strafu-oso.

„Dan”, na so Patrick e taki, „fu di mi ben abi moni fanowdu, meki mi ben musu tan wan pisi ten na Ingrisikondre. Di mi ben de drape, dan skowtu fu Ingrisikondre ben sroto wan mati fu mi di ben kisi a komando fu sutu wan bom.” Ala di Patrick ben abi firi srefisrefi ete gi den sani di den nationalist ben feti gi, toku a denki fu en ben bigin kenki. A ben bigin si taki fu soso a ben teige ala Ingrisisma. „Mi ben bigin frustan tu”, a e taki, „dati noiti den sani di den afu-srudati e du ben o lusu den problema èn puru na onregtfardikifasi di ben trobi mi. Tumusi furu krukafasi nanga tra onvolmaaktifasi ben de na mindri den sma di ben e tiri na organisâsi fu den afu-srudati.—Preikiman 4:1; Yeremia 10:23.

Te fu kaba, Patrick ben drai go baka na Noord-Ierland. „Di mi ben drai go baka, dan wan mati ben meki mi kon sabi Yehovah Kotoigi.” Fu a studie fu Bijbel di Patrick ben abi nanga den Kotoigi, a ben bigin si san na a trutru lusu gi den trobi nanga pratifasi fu libisma. A ben gro na yeye fasi esi-esi ala di den gronprakseri fu Bijbel ben abi krakti na tapu en frustan èn na tapu en ati (Efeisesma 4:20-24). „Now”, a e taki, „na presi fu meki plan fu trowe a politiek sistema, mi e preiki a boskopu fu vrede di de na ini Bijbel, srefi na ini den birti fu den sma di de loyaal na a tirimakti, birti pe fosifosi noiti mi ben o teki a tyans fu go. Fu taki en leti, na ini wan ten pe wan lo kiri ben kiri na mindri sekte na ini Belfast, dan soso Yehovah Kotoigi ben kan go-kon makriki na den birti fu den sma di de loyaal na a tirimakti èn den birti fu den nationalist, sondro pantserwagi.” Neleki tra Kotoigi na Noord-Ierland na a ten dati, a ben kon si taki te yu no e teki partèi, neleki fa den fosi Kresten ben du, dan dati e gi kibri trutru (Yohanes 17:16; 18:36). A e taki te fu kaba: „A e meki yu firi fri te yu e si taki Yehovah, nanga yepi fu Yesus Krestes, sa gi ala libisma trutru retidu nanga fri fu ala kwinsi.”—Yesaya 32:1, 16-18.

„Soso den Gon Fu Mi Ben Gi Mi Kibri”

„Mi ben gro na a tra sei fu a politiek èn a relisi strei”, William e taki. „Mi ben de dipi na ini den takru denki fu den Protestantsma, èn mi ben abi wan bita-ati gi ala sani di ben abi fu du nanga Lomsu. Efu mi ben man, dan mi no ben o go srefi na ini wan wenkri fu wan Lomsu, èn mi ben go wan leisi nomo na a Republiek Ierland. Mi ben de na ini difrenti Protestant grupu nanga organisâsi, soleki na Oranje-Orde — wan organisâsi di e wroko fayafaya fu tan hori a Protestant relisi èn a Protestant fasi fu libi.” Di William ben abi 22 yari, dan a ben go na ini a Srudati Legre fu Ulster, wan pisi fu na Ingrisikondre legre di abi srudati na ini a kontren dati srefi. Moro furu fu den memre ben de Protestantsma. A ben de klariklari fu kiri sma soso fu kibri en gudu. „Mi ben abi difrenti gon èn mi no ben o draidrai fu gebroiki den efu a ben de fanowdu. Mi ben hori wan na ondro mi kunsu teneti.”

Ma wan bigi kenki ben feni presi. „Mi ben bigin frustan taki Yehovah Kotoigi ben abi wan spesrutu sani, di mi ben wroko nanga wan fu den di wi ben meki wan owru oso. A kompe-wrokoman disi ben abi wan tranga krakti na mi tapu. Di wi ben e bow na oso makandra, dan mi ben man aksi en furu sani di ben trobi mi, sani di abi fu du nanga den Problema, relisi, nanga Gado. Den makriki èn krin piki fu en ben yepi mi fu si fa Yehovah Kotoigi tan trutru — wan grupu di abi wánfasi, di no e du ogri nanga tranga èn di no e teki partèi na ini politiek afersi, fu di den lobi Gado nanga den kompe fu den.”—Yohanes 13:34, 35.

Fo mun na baka di William ben bigin wan bijbelstudie, a ben puru en nen fu ala relisi èn politiek organisâsi pe a ben de na ini. „Disi ben de wan bigi kenki gi mi”, a e memre, „bika mi ben musu libi furu gwenti di mi ben abi langa ten kaba èn di mi ben lobi.” Ma a moro bigi tesi fu en ben musu kon ete. „Fu a situwâsi na ini Noord-Ierland ede, meki mi ben feni taki soso den gon fu mi ben gi mi kibri. Den afu-srudati fu na IRA ben si mi leki wan ’sma di den ben mag sutu’. Fu dati ede a ben muilek srefisrefi fu libi den fetisani disi.” Ma safrisafri den rai fu Bijbel, soleki a wan na Yesaya 2:2-4, ben kenki a fasi fa a ben prakseri fu sani. A ben si taki te fu kaba na Yehovah ben kan gi en trutru kibri, neleki fa A ben gi den fosi yarihondro Kresten kibri. Baka dati William ben gi den gon fu en baka.

„Wan fu den sani di mi breiti trutru fu en”, na so William e taki, „na taki now mi de bunbun mati nanga sma di fositen mi ben si leki bun bigi feanti. A e gi so srefi trutru prisiri fu man tyari a Bijbel boskopu di e gi howpu, go na birti pe mi no ben mag go srefisrefi fosi. Te mi e prakseri san waarheid du gi mi nanga gi mi osofamiri, dan dati e meki mi taigi Yehovah nanga en organisâsi tangi fu têgo.”

„Sani Ben De fu Soso Trutru”

Robert nanga Teresa ben komoto na difrenti kulturu di ben e difrenti srefisrefi fu makandra. „Mi kon fu wan seryusu Protestant osofamiri”, Robert e taki. „Wan tu fu den famiri fu mi ben de na ini den sani di den afu-srudati ben e du. Misrefi ben go na ini a Srudati Legre fu Ulster fu na Ingrisikondre legre di mi ben abi 19 yari. Furu fu a ten dati ben e gebroiki fu rèi ondrosuku a birti pe Teresa ben libi. Wan neti mi ben kisi wan tra wroko fu du, na presi fu go rèi ondrosuku sani. A neti dati a hei wagi pe mi ben o rèi na ini, ben sutu panya. Tu srudati ben lasi libi èn tu trawan ben kisi mankeri.”

Robert ben bigin aksi ensrefi fu san ede libi de. „Ala ten mi ben e bribi na ini Gado, ma te mi ben luku lontu san e pasa na ini Noord-Ierland, dan sani ben de fu soso gi mi trutru. Mi ben bigin begi Gado trutru. Mi ben aksi Gado taki efu a de trutru, èn efu a de trutru meki a sori mi a yoisti fasi fu libi. ¡Mi e memre taki mi ben taigi Gado taki wán tru relisi musu de wan presi!” Wan tu dei nomo na baka, wan Kotoigi fu Yehovah ben kon na Robert èn a ben libi wan tu buku gi en na baka. Di a ben kon lati neti na oso, baka di a ben go ondrosuku den birti a neti dati, dan a ben bigin leisi a buku disi èn a ben kaba leisi en wan sani fu feifi yuru mamanten. „Mi ben si a waarheid wantewante”, a e taki, „èn mi ben kan si taki ibri sani ben kon langalanga fu Bijbel” (2 Timoteus 3:16). A ben bigin nanga wan bijbelstudie èn baka wan syatu pisi ten a ben gi en libi abra na Gado.

„Ala Ten den Kotoigi Ben Sori Wi San Bijbel E Taki”

Na a tra sei, Teresa ben kisi kweki leki wan Lomsu, èn a ben abi tranga firi gi en kondre. „Di mi ben de wan yongu meisje ete, mi ben go wroko makandra nanga Sinn Féin.”b Teresa e erken: „Disi ben meki mi horibaka gi den sani di den afu-srudati ben e du. Mi ben yepi suku moni gi a feti fu den srudati. Mi ben fruteri na IRA san ben e pasa na ini mi birti. Mi ben meki opruru tu èn mi ben iti ston na tapu skowtu èn na tapu srudati di ben e rèi e ondrosuku sani.”

Di wan tu memre fu Teresa en famiri ben bigin studeri Bijbel nanga Yehovah Kotoigi, dan a ben wani sabi moro sani tu. A krakti fu Gado Wortu ben abi furu krakti na en tapu. „Ala ten den Kotoigi ben sori wi san Bijbel e taki so taki wi ben kan feni piki na tapu den aksi”, a e taki. „A pramisi na Danièl 2:44 ben de wan sani di ben opo mi frustan trutru. Mi ben si taki Gado Kownukondre ben de a trutru yepisani di ben o puru ala onregtfardikifasi di mi ben feti.” Moro nanga moro a ben tegu gi son wan fu den bigi ogri di den afu-srudati ben e du. Fu eksempre, Teresa no ben man frustan fu san ede wan sma di abi firi fu sari-ati èn bun maniri ben o breiti fu yere taki terrorist ben du wan sani di ben kiri srudati noso tra sma, noso ben malengri den èn taki den famiri ben de nanga sari èn nanga pen. Ensrefi ben handri bun na tapu a waarheid na ini Bijbel èn a ben meki den gronprakseri fu Gado kenki a prakseri fu en. A ben gi en libi abra na Gado èn heri esi a ben dopu.—Odo 2:1-5, 10-14.

Teresa ben miti Robert di den ala tu ben fisiti den konmakandra na wan fu den gemeente fu Yehovah Kotoigi na ini Noord-Ierland. Teresa e taki: „Di mi ben miti Robert a fosi leisi, mi ben feni en muilek fu bribi taki mi ben taki sondro fu atibron èn na ini vrede nanga wan sma di no so langa ete mi ben o si fosi leki wan pisi fu a politiek èn srudati sistema fu Ingrisikondre. A Wortu fu Gado ben yepi mi trutru fu puru tranga bita-ati nanga takru denki teige sma sondro bun reide.” Na presi taki bita-ati nanga a firi fu teige wan sma di abi tra gwenti nanga kulturu ben prati den, en nanga Robert ben kon si taki fu wan lo sani den ben denki a srefi now. A moro krakti wan fu den sani disi ben de lobi gi Yehovah Gado. Den ben trow nanga makandra. Now den e wroko makandra fu tyari Gado boskopu fu vrede gi sma di abi ala sortu kulturu èn ala sortu bribi na ini a kondre disi di lai problema.

Tra sma na ini Ierland ben ondrofeni den srefi sortu sani disi. Fu di den ben arki den leri di de na ini a Wortu fu Gado, di sma skrifi nanga yepi fu en santa yeye, èn fu di den ben teki den leri disi, meki den lowe gi den „filosofia nanga bedrigifasi di de soso sani” fu libisma (Kolosesma 2:8). Now den poti ala den frutrow na ini den pramisi fu Gado di skrifi na ini Bijbel. Den breiti fu fruteri ibriwan sma di wani arki a howpu fu den taki wan ten fu vrede o kon — wan ten pe no wan feti na mindri difrenti sekte sa de èn no wan tra sortu ogri tu di e du nanga tranga.—Yesaya 11:6-9.

[Futuwortu]

[Prenki na tapu bladzijde 10]

A feti fu den afu-srudati ben kon pôpi na ini skedrei na den skotu na ini heri Noord-Ierland