¡Meki Wi Noiti Hari Wisrefi Puru fu Go Pori!
„Wi a no den sma di e hari densrefi puru fu go pori.”—HEBREWSMA 10:39.
1. San meki na apostel Petrus ben kon frede?
DEN apostel musu ben skreki di Yesus, a lobi Masra fu den, ben taigi den taki den alamala ben o panya èn taki den ben o gowe libi en. Fa so wan sani ben kan pasa — na ini a yuru disi pe a ben abi den moro tranga fanowdu? Petrus ben taki na wan krakti fasi: „Awansi ala den trawan e naki futu fadon, toku mi no o du dati.” Trutru, Petrus ben de wan deki-ati man. Ma di sma ben tori Yesus èn den ben tyari en go sroto, dan den apostel — so srefi Petrus — ben panya. Baka ten, di den ben aksi-aksi Yesus sani na ini na oso fu Gran Priester Kayafas, dan Petrus ben draidrai e wakti na ini a fesidyari, ala di a ben de nanga broko-ede. Ma di a kowru neti ben e pasa gowe, dan a sori leki Petrus ben kon frede taki den ben sa kan kiri Yesus makandra nanga ala sma di ben abi wan sani fu du nanga Yesus. Di wan tu sma di ben e tanapu nanga Petrus ben kon si taki en ben de wan fu den sma di ben de nanga Yesus furu, dan Petrus ben kon frede. ¡Dri leisi a ben lei taki a no ben abi wan sani fu du nanga Yesus. Petrus ben taki srefi dati a no ben sabi en!—Markus 14:27-31, 66-72.
2. (a) Fu san ede a frede di Petrus ben kon frede a neti di den ben teki Yesus go sroto, no ben meki Petrus ben tron ’a sma di e hari ensrefi puru’? (b) Sortu fasti bosroiti wi musu abi?
2 Dati ben de wan dungru momenti na ini Petrus libi, wan momenti di a ben sari seiker en heri libi langa. ¿Ma a sani di Petrus ben du a neti dati, ben meki taki a ben tron wan fredeman? ¿A ben meki taki a ben tron leki „den sma” di na apostel Paulus ben taki fu den baka ten, di a ben skrifi: „We now, wi a no den sma di e hari densrefi puru fu go pori”? (Hebrewsma 10:39) Kande moro furu fu wi ben o agri taki den wortu fu Paulus no abi fu du nanga Petrus. Fu san ede? Fu di a ben de wan syatu momenti nomo taki Petrus ben frede, wan syatu momenti na ini wan libi di ben sori taki a ben abi bun furu deki-ati nanga bribi. So srefi, furu fu wi ben abi momenti na ini a ten di pasa di wi e prakseri nanga syen pikinso, momenti di wi ben kon frede wantronso èn dati ben tapu wi fu no abi a deki-ati fu horibaka gi a waarheid soleki fa wi ben sa wani dati. (Teki gersi Romesma 7:21-23.) Wi kan de seiker taki den sortu syatu momenti di sani no ben waka bun, no e meki wi de leki den sma di e hari densrefi puru fu go pori. Ma toku wi musu abi a fasti bosroiti fu no tron noiti leki den sma dati. Fu san ede? Èn fa wi kan sorgu taki wi no e tron so wan sma?
San a Wani Taki te wan Sma E Hari Ensrefi Puru fu Go Pori
3. Fa a ben du kon taki den profeiti Elia nanga Yona ben kon frede?
3 Di Paulus ben skrifi fu „den sma di e hari densrefi puru”, dan a no ben abi den sma na prakseri di kande lasi a deki-ati fu den wan syatu momenti nomo. A de seiker taki Paulus ben sabi san ben pasa nanga Petrus èn tra kefal leki a wan disi. Wan leisi Elia, wan deki-ati profeiti di no ben frede fu taki, ben kon frede èn a ben lowe fu kibri en libi fu di na ogri Koningin Iseibèl ben pramisi fu kiri Elia (1 Kownu 19:1-4). A profeiti Yona ben kon frede moro tranga srefi. Yehovah ben gi en a wroko fu go na a ogri foto Ninifei, di sma ben sabi fu den ogri di den ben du nanga tranga. Wantewante Yona ben teki wan boto di ben e go na Tarsis — ¡3500 kilometer go te na a tra sei! (Yona 1:1-3) Ma toku den no ben kan taki dati den getrow profeiti disi noso na apostel Petrus ben de sma di e hari densrefi puru. Fu san ede?
4, 5. (a) Fa den tra tekst e yepi wi fu kon sabi san Paulus ben wani taki nanga „pori”, na Hebrewsma 10:39? (b) San Paulus ben abi na prakseri di a ben taki: „Wi a no den sma di e hari densrefi puru fu go pori”?
4 Luku ala den wortu makandra di Paulus ben gebroiki: „We, wi a no den sma di e hari densrefi puru fu go pori.” San a ben wani taki nanga „pori”? A Griki wortu di a ben gebroiki e taki fu têgo pori son leisi. A sani di a wortu wani taki dya, e kruderi nanga den tra tekst na en lontu. Didyonsro Paulus ben warskow: „Efu wi gwenti du sondu fu espresi, baka te wi kisi a soifri sabi fu waarheid, dan no wan srakti-ofrandi gi sondu tan abra moro, ma wi e fruwakti wan tumusi ogri krutu di sa kon trutru, èn wan faya dyarusu de di o kibri den gensman.”—Hebrewsma 10:26, 27.
5 Dati meki di Paulus ben taigi tra bribiman: „Wi a no den sma di e hari densrefi puru fu go pori”, dan a ben abi na prakseri taki en nanga den getrow Kresten leisiman fu en ben abi a fasti bosroiti fu no drai den baka gi Yehovah noiti èn tapu fu dini en. Efu den ben o du dati, dan a ben kan meki nomo taki den ben o kisi têgo pori. Yudas Iskariòt ben de wan sma di ben hari ensrefi puru so taki a kisi pori, neleki san ben pasa nanga den tra feanti fu a waarheid di fu espresi ben gens a yeye fu Yehovah (Yohanes 17:12; 2 Tesalonikasma 2:3). Den sma dati na „den fredeman” di e kisi têgo pori na ini na agersi se fu faya (Openbaring 21:8). ¡Nôno, noiti wi ben sa wani de leki den sma dati!
6. Sortu sani Satan Didibri wani meki wi du?
6 Satan Didibri wani meki wi hari wisrefi puru fu go pori. Fu di a abi a koni fu „du triki sani”, meki a sabi taki nofotron so wan fasi di kan meki wan sma kisi pori, e bigin nanga pikinpikin sani (Efeisesma 6:11, futuwortu). Efu langalanga frufolgu no e meki taki a man du san a abi na prakseri, dan a e pruberi na wan moro triki fasi fu swaki a bribi fu den tru Kresten. A wani meki den deki-ati Kotoigi fu Yehovah di de fayafaya, tan tiri. Kon meki wi si sortu sani a ben gebroiki fu gens den Hebrew Kresten pe Paulus ben skrifi go.
Fa Den Ben Poti Druk na den Kresten Tapu fu Hari Densrefi Puru
7. (a) San ben de a historia fu a gemeente na ini Yerusalem? (b) Na ini sortu situwâsi na yeye fasi son leisiman fu Paulus ben de?
7 Buweisi e sori taki Paulus ben skrifi a brifi fu en gi den Hebrewsma na wan sani fu 61 G.T. A gemeente na ini Yerusalem ben abi wan historia pe furu bruya ben pasa. Baka di Yesus dede, dan sma ben bigin frufolgu den Kresten bun hebi, èn dati ben dwengi furu Kresten na ini a foto fu panya. Ma wan ten fu vrede ben kon, so taki a nomru fu Kresten ben gro (Tori fu den Apostel 8:4; 9:31). Na ini den yari di ben e pasa, tra momenti fu frufolgu nanga problema ben kon wanwan leisi. A gersi leki na a ten di Paulus ben skrifi a brifi gi den Hebrewsma, a gemeente ben abi vrede pikinso baka. Toku druk ben de. So wan dritenti yari ben pasa sensi a ten di Yesus ben taki na fesi dati Yerusalem ben o kisi pori. Kande wan tu sma ben denki taki a kaba ben tan tumusi langa sondro taki a ben de fanowdu èn taki a no ben o kon te den ben de na libi ete. Trawan, spesrutu den wan di no ben de langa na bribi, no ben firi den tesi fu a hebi frufolgu ete èn den no ben sabi furu fu a fanowdu di a de fanowdu fu horidoro na ondro tesi (Hebrewsma 12:4). A no abi misi taki Satan ben pruberi fu gebroiki a situwâsi dati gi ensrefi. Sortu „triki sani” a ben du?
8. Na sortu fasi furu Dyu ben si a nyun Kresten gemeente?
8 Den Dyu di ben libi na ini Yerusalem èn na Yudea ben wisiwasi a nyun Kresten gemeente. Te wi e ondrosuku san skrifi na ini a brifi fu Paulus, dan wi kan si pikinso na sortu fasi den heimemre relisi fesiman fu den Dyu nanga den bakaman fu den ben spotu nanga den Kresten. Te yu luku en bun, dan kande den ben taki: ’¡Wi abi a bigi tempel na ini Yerusalem, di e tanapu drape furu yarihondro kaba! Wi abi wan lespeki gran priester di e wroko drape, makandra nanga den ondropriester fu en. Ala dei sma e tyari ofrandi. Wi abi a Wet, di Moses kisi fu den engel èn di skrifi poti nanga yepi fu kefalek aparti marki na tapu a Sinaibergi. ¡A pikin sekte disi di opo kon wantronso, den Kresten disi, di fadon komoto na a Dyu bribi, den no abi no wan fu den sani disi!’ ¿A fasi disi fa sma ben skempi den, ben wroko? Te fu kaba, den ogri sani disi di sma ben taki ben trobi son Hebrew Kresten. A brifi fu Paulus ben kon na a yoisti ten fu yepi den.
Fu San Ede Den No Musu Hari Densrefi Puru Noiti fu Go Pori
9. (a) Sortu prakseri de krin fu si na ini a heri brifi gi den Hebrewsma? (b) Fa den Kresten ben de na ini wan moro betre tempel leki a wan na ini Yerusalem?
9 Kon meki wi go luku tu sani di Paulus ben taigi den brada nanga den sisa fu en drape na Yudea di ben musu yepi den fu den no hari densrefi puru noiti fu go pori. A fosi sani — taki a Kresten sistema fu anbegi ben moro hei — de fu si krin na ini a heri brifi gi den Hebrewsma. Na ini a heri brifi fu Paulus, a e taki fu a tori disi. A tempel na ini Yerusalem ben de soso wan kopi fu wan trutru sani di ben moro bigi, Yehovah en tempel na yeye fasi, wan oso „di no meki nanga anu” (Hebrewsma 9:11). Den Kresten dati ben abi a grani fu dini na ini a seti dati na yeye fasi di ben sreka gi a soifri anbegi. Den ben de na ondro wan moro betre frubontu, a nyun frubontu di ben pramisi someni langa kaba, èn di ben abi wan Mindriman Yesus Krestes, di hei moro Moses.—Yeremia 31:31-34.
10, 11. (a) Fu san ede a geslaktilin fu Yesus no ben meki taki a no ben kan de Gran Priester na ini a tempel na yeye fasi? (b) Na sortu fasi Yesus ben de wan Gran Priester di ben hei moro a wan di ben dini na a tempel na ini Yerusalem?
10 Den Kresten dati ben abi wan moro betre Gran Priester tu, Yesus Krestes. Nôno, a no ben komoto na ini a geslakti fu Aron. Ma a ben de wan Gran Priester „akruderi a fasi fu Mèlkiseidèk” (Psalm 110:4). Mèlkiseidèk, di abi wan geslakti lin pe no wan sani ben skrifi fu en, ben de kownu fu owruten Salem èn a ben de a gran priester fu en tu. So bun, a ben de a yoisti sma di ben kan gebroiki leki wan prenki na ini den profeititori di e taki fu Yesus di abi wan priesterwroko di no ben anga fu wan geslaktilin fu fositen tata di de onvolmaakti libisma, ma fu wan sani di ben moro bigi — Yehovah Gado en eigi sweri. Neleki Mèlkiseidèk, na so Yesus no ben de Gran Priester wawan, ma a ben de Kownu tu, wan di noiti no ben o dede.—Hebrewsma 7:11-21.
11 Moro fara, Yesus no ben abi fu tyari ofrandi ibri yari baka, leki san a gran priester fu a tempel na ini Yerusalem ben musu du. Na ofrandi fu en ben de en eigi volmaakti libi, di a ben òfer wan leisi fu ala ten (Hebrewsma 7:27). Ala den ofrandi di den ben tyari na a tempel ben de soso skaduw, prenki fu san Yesus ben òfer. En volmaakti srakti ofrandi ben meki taki ala sma di ben abi bribi ben kan kisi trutru pardon fu sondu. San moi fu si tu, na Paulus en wortu di e sori taki a Gran Priester disi na a srefi Yesus di no e kenki èn di den Kresten na ini Yerusalem ben sabi kaba. A ben abi sakafasi, a ben abi switifasi, èn a ben de wan sma di kan „firi nanga wi na ini den swakifasi fu wi” (Hebrewsma 4:15; 13:8). ¡Den salfu Kresten dati ben abi a howpu fu dini leki ondropriester fu Krestes! Fa den ben kan prakseri srefi fu hari densrefi puru èn go du den „den swaki èn pôti” sani baka fu a pori Dyu bribi?—Galasiasma 4:9.
12, 13. (a) Sortu di fu tu sani Paulus ben taki di musu yepi wi fu no hari wisrefi puru noiti? (b) Fu san ede a historia di den Hebrew Kresten ben abi kaba ben o gi den deki-ati fu no hari densrefi puru noiti fu go pori?
12 Èn moro ete, Paulus ben taigi den Hebrewsma wan di fu tu sani di ben musu yepi den taki noiti den ben o hari densrefi puru fu go pori — den eigi historia di ben sori taki den ben horidoro. A ben skrifi: „Tan memre den dei fu fositen, pe, baka di unu kon frustan den sani, unu horidoro na ini wan hebi strei na ondro furu pina.” Paulus ben memre den taki den ’ben kisi fu du nanga’ syen èn nanga benawtu ’neleki na ini wan komedi-oso’. Son wan ben sidon na strafu-oso; trawan ben firi gi den wan di ben sidon na strafu-oso èn den ben yepi den. Iya, den ben sori bribi èn den ben horidoro na wan fasi di ben de wan bun eksempre (Hebrewsma 10:32-34). Ma fu san ede Paulus ben aksi den fu „tan memre” den sortu hati ondrofeni dati? ¿Dati no ben o de wan sani di ben o meki den lasi-ati?
13 Kwetikweti, te den ben o „memre den dei fu fositen”, dan dati ben o memre den Hebrewsma fa Yehovah ben yepi den di den ben kisi tesi. A ben yepi den kaba fu kakafutu gi furu ogri di Satan ben wani du den. Paulus ben skrifi: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en” (Hebrewsma 6:10). Iya, Yehovah ben memre ala den getrow wroko fu den, fu di a ben kibri den na ini en prakseri di no abi kaba. A e meki wi prakseri a frumane di Yesus ben gi fu kibri gudu poti na hemel. No wan fufuruman kan fufuru den gudu disi; no wan motu noso frustu kan nyan den (Mateus 6:19-21). Te yu luku en bun, dan den gudu disi kan pori soso te wan Kresten e hari ensrefi puru fu go pori. Dati ben o meki a lasi ala gudu di a ben kibri poti na hemel. ¡Dati ben de wan krakti sani trutru di Paulus ben taigi den Hebrew Kresten taki noiti den ben musu du so wan sani! Fu san ede den ben o trowe ala den yari di ben du getrow diniwroko? A ben o yoisti èn moro bun efu den ben tan horidoro.
Fu San Ede Wi No Musu Hari Wisrefi Puru Noiti fu Go Pori
14. Sortu problema wi abi di gersi den wan di den fosi yarihondro Kresten ben kisi?
14 Tru Kresten na ini a ten disi abi den srefi krakti sani di musu meki taki den no e hari densrefi puru. Na a fosi presi, meki wi prakseri sortu blesi wi abi na ini a soifri anbegi di Yehovah gi wi. Neleki den fosi yarihondro Kresten, na so wi e libi na ini wan ten pe den memre fu den moro pôpi relisi e spotu nanga wi èn den e skempi wi, ala di den e sori na wan heimemre fasi na den kefalek bigi gebow fu den èn na a de di den gwenti fu den de bun langa kaba. Ma Yehovah e gi wi a dyaranti taki a feni na anbegi fu wi bun. Trutru, wi abi blesi na ini a ten disi di den fosi yarihondro Kresten no ben abi. Kande yu ben sa aksi: ’Fa dati kan?’ Te yu luku en bun, dan den ben libi na a ten di a tempel na yeye fasi ben bigin wroko. Kresten ben tron a Gran Priester fu a tempel di a ben dopu na ini 29 G.T. Son wan fu den ben si a Manpikin fu Gado di ben e du wondru. Srefi baka di a dede, moro wondru ben du. Ma soleki fa ben taki na fesi kaba, dan te fu kaba sma no ben kisi a krakti moro fu du den sani disi.—1 Korentesma 13:8.
15. Tru Kresten na ini a ten disi e libi na ini a ten fu sortu profeititori di e kon tru, èn san dati wani taki gi wi?
15 Ma wi e libi na ini a ten pe furu fu a langa tempel profeititori fu Esekièl kapitel 40-48 e kon tru.a So bun, wi si fa a seti di Gado sreka gi a soifri anbegi ben bigin wroko baka. Na ini a tempel dati na yeye fasi den ben puru ala sortu doti di ben abi fu du nanga relisi èn nanga na anbegi fu kruktu gado, so taki a ben kon krin (Esekièl 43:9; Maleaki 3:1-5). Prakseri den wini di a wroko dati fu krin sani tyari kon gi wi.
16. Nanga sortu situwâsi di ben meki sma lasi-ati, den fosi yarihondro Kresten ben kisi fu du?
16 Na ini a fosi yarihondro a tamara no ben luku bun gi a Kresten gemeente di ben orga. Yesus ben taki na fesi taki a gemeente ben o gersi wan gron nanga tarwe di no ben prani langa ete èn pe takru wiwiri ben sai na tapu, èn di ben o meki sma no ben o man si bun san ben de a difrenti na mindri tarwe nanga takru wiwiri (Mateus 13:24-30). Èn na so a ben pasa tu. Na a kaba fu a fosi yarihondro, di na owru apostel Yohanes ben de a lasti sani di ben hori a bribi fu no pori, dan furu sma ben fadon komoto na bribi kaba (2 Tesalonikasma 2:6; 1 Yohanes 2:18). No langa baka di den apostel dede, wan aparti grupu fu kerki tiriman ben opo kon, èn den ben kwinsi na ipi èn den ben e weri aparti sortu krosi. A fadon di sma ben fadon komoto na bribi ben panya ensrefi leki wan takru siki. !Dati ben musu meki den getrow Kresten lasi-ati trutru! Den ben si fa wan takru sortu anbegi krinkrin ben puru a nyun seti na pasi di ben sreka gi a soifri anbegi. Disi ben pasa baka di Krestes no ben opo a gemeente wan hondro yari ete.
17. Na sortu fasi a disiten Kresten gemeente horidoro moro langa leki a fosi yarihondro patna fu en?
17 Now luku wan tra sani. Na ini a ten disi, a soifri anbegi de moro langa leki a ten te leki den apostel dede. Sensi a ten di a fosiwan fu a tijdschrift disi ben kon na doro na ini 1879, Yehovah blesi wi nanga wan anbegi di kon soifri moro nanga moro. Yehovah nanga Krestes Yesus ben go na ini a tempel na yeye fasi na ini 1918 fu krin en (Maleaki 3:1-5). Sensi 1919, a seti fu anbegi Yehovah Gado meki kon moro soifri safrisafri. Wi kon frustan den Bijbel profeititori èn den gronprakseri moro krin (Odo 4:18). Suma musu kisi a grani? A no libisma di de onvolmaakti. Soso Yehovah, nanga en Manpikin di de na Edeman fu a gemeente, ben kan kibri a pipel fu En fu den no kon pori na ini a pori ten disi. Fu dati ede, meki wi noiti no frigiti fu taigi Yehovah tangi fu di a meki wi abi wan prati na a soifri anbegi na ini a ten disi. ¡Èn meki wi abi a fasti bosroiti fu no hari wisrefi puru noiti fu go pori!
18. San meki wi noiti no abi fu hari wisrefi puru fu go pori?
18 Neleki den Hebrew Kresten, wi abi ete wan sani di musu yepi wi fu no hari wisrefi puru leki wan fredeman — wi eigi historia di e sori taki wi horidoro. Awansi wi bigin dini Yehovah na ini den yari di no pasa so langa ete noso wi du dati na wan getrow fasi someni tenti yari kaba, wi abi wan historia di e sori den Kresten wroko fu wi. Furu fu wi kisi frufolgu, efu a ben de na ini strafu-oso, noso efu lanti ben tapu a wroko, sma ben handri wi na wan ogri-ati fasi, noso efu wi lasi den gudu fu wi. Furu fu wi kisi fu du nanga gens fu famiriman, skempi, spotu nanga wan mi-no-kefasi fu sma. Wi alamala horidoro, ala di wi e tan du wi diniwroko gi Yehovah na wan getrow fasi, awansi wi e kisi fu du nanga den problema nanga den tesi fu a libi. Fu di wi du dati, dan wi abi wan historia di e sori taki wi horidoro èn di Yehovah no sa frigiti, a de wan maksin nanga gudu na hemel. ¡Fu dati ede, disi a no a ten kwetikweti fu hari wisrefi puru èn go baka na a pori èn owru seti fu sani di wi ben libi na baka! Fu san ede wi musu si ala tranga wroko fu wi leki sososani? Disi de spesrutu so na ini a ten disi, pe soso „wan syatu pisi ten” de ete bifo a kaba o kon.—Hebrewsma 10:37.
19. Fu sortu sani wi sa taki na ini wi tra artikel?
19 ¡Iya, meki wi abi a fasti bosroiti taki „wi a no den sma di e hari densrefi puru fu go pori”! Ma meki wi de „den sma di abi bribi” (Hebrewsma 10:39). Fa wi kan sorgu taki den sani disi di taki dya e fiti wi, èn fa wi kan yepi tra Kresten fu du a srefi? A tra artikel fu wi sa taki fu a tori disi.
[Futuwortu]
¿Yu E Memre Disi Ete?
◻ San a wani taki te wan sma e hari ensrefi puru fu go pori?
◻ Sortu druk ben de na den Hebrew Kresten tapu, pe Paulus ben skrifi go?
◻ San Paulus ben taigi den Hebrewsma so taki den no ben abi fu hari densrefi puru fu go pori?
◻ San meki wi sa abi a fasti bosroiti fu no hari wisrefi puru noiti fu go pori?
[Prenki na tapu bladzijde 15]
A syatu momenti di Petrus ben kon frede no ben meki taki a ben de wan „sma di e hari [ensrefi] puru fu go pori”