No tapoe foe lon a streilon foe kisi libi!
„Meki wi horidoro foe lon a streilon di poti na wi fesi.” — Hebrewsma 12:1.
1, 2. Sortoe span sani di e pasa, prisiri den foetoeboi foe Jehovah na ini den lasti dei disi?
WI E libi na ini span èn moeilek ten. Moro leki 80 jari pasa kaba, na ini 1914, Jesus ben poti na tapoe a kownoestoeroe leki Kownoe foe Gado en hemel Kownoekondre. „A dei foe Masra” èn nanga dati „a ten foe a kaba” foe a seti foe sani disi ben bigin (Openbaring 1:10; Danièl 12:9). Sensi a ten dati, a kresten streilon foe kisi libi kon de tranga fanowdoe moro nanga moro. Den foetoeboi foe Gado span densrefi boen tranga foe tan skinskin nanga a hemel wagi foe Jehovah, en hemel organisâsi, di e go na fesi sondro foe stòp foe doe den sani di Jehovah abi na prakseri. — Esekièl 1:4-28; 1 Korentesma 9:24.
2 A pipel foe Gado kisi prisiri ala di den e „lon a streilon” foe kisi têgo libi? Ija, foe troe! Den prisiri foe si a tjari di den e tjari den brada foe Jesus di tan abra, kon makandra, èn den e breiti foe sabi taki a poti foe den lasti seigelmarki na tapoe den wan di tan abra foe den 144.000, e doro a kaba (Openbaring 7:3, 4). Boiti dati, den e prisiri srefisrefi foe kon sabi taki a Kownoe di Jehovah poti na wroko, hari en grasi-nefi foe koti „a njanjan di de foe koti na grontapoe” (Openbaring 14:15, 16). Èn dati na troetroe wan bigi kotiwroko! (Mateus 9:37) Te so fara, moro leki feifi miljoen sili tjari kon makandra — „wan bigi ipi, di no wan sma ben man teri, di komoto na ala nâsi nanga lo nanga pipel nanga tongo” (Openbaring 7:9). No wan sma kan taki o bigi na ipi sa de te foe kaba, foe di no wan sma man teri en.
3. San na den problema di wi e kisi, pe wi moesoe proeberi ala ten foe kweki wan prisiri jejefasi?
3 A troe taki Satan e proeberi foe meki wi naki foetoe noso doe en moro safri ala di wi e lon na ini a streilon (Openbaring 12:17). Èn a no makriki foe tan horidoro na ini a streilon ala di den feti, den angriten, den pestsiki de, nanga ala den tra problema di de wan marki foe a ten foe a kaba (Mateus 24:3-9; Lukas 21:11; 2 Timoteus 3:1-5). Tokoe wi ati e djompo foe prisiri ede foe di a kaba foe a streilon e kon moro krosibei. Wi e meki moeiti foe sori a jejefasi di Paulus ben gi kompe kresten na ini a ten foe en tranga foe abi: „Ala ten abi prisiri na ini Masra. Ete wan leisi mi sa taki: Abi prisiri!” — Filipisma 4:4.
4. Sortoe jejefasi den kresten foe Filipi ben sori?
4 Tweifri no de taki den kresten di Paulus ben taigi den wortoe dati, ben prisiri na ini a bribi foe den, bika Paulus ben taigi den: „Tan abi prisiri na ini Masra” (Filipisma 3:1). Den Filipisma ben de wan lobi-ati gemeente di ben lobi foe gi sani èn ben dini nanga faja (Filipisma 1:3-5; 4:10, 14-20). Ma a no ala fosi jarihondro kresten ben abi a jejefasi dati. Foe eksempre, son wan foe den djoe kresten di Paulus ben skrifi a boekoe Hebrewsma gi, ben gi wan reide foe abi broko-ede.
„Poti moro prakseri leki san wi gwenti”
5. (a) Sortoe jejefasi Hebrew kresten ben abi di a fosi kresten gemeente ben seti? (b) Taki foe a jejefasi foe son Hebrew kresten foe wan sani foe 60 G.T.
5 A fosi kresten gemeente na ini a historia foe grontapoe ben abi troetroe djoe nanga proselietsma na ini èn a ben seti na ini Jerusalem na ini 33 G.T. Sortoe jejefasi a gemeente ben abi? Wan sma moesoe leisi den fosi kapitel foe a boekoe Tori foe den Apostel nomo, foe kon sabi a faja nanga prisiri foe a gemeente, srefi di den kisi foe doe nanga froefolgoe (Tori foe den Apostel 2:44-47; 4:32-34; 5:41; 6:7). Ma ala di someni tenti jari pasa, a situwâsi ben kenki, èn soleki fa a sori, foeroe djoe kresten ben bigin lon moro safri na ini a streilon foe libi. Wan verwijsboekoe e taki a sani disi foe a situwâsi foe den, soleki fa a ben de na ini wan sani foe 60 G.T.: „Wan situwâsi foe a de di sma kon de nanga hebi skin èn kon weri foe froewakti di no kon troe, foe howpoe di skoifi poti na wan tra ten, èn a de di sma no de getrow ini aladei afersi. Den ben de kresten, ma den no ben abi foeroe warderi gi a hemel howpoe foe den.” Fa salfoe kresten ben kan kon na ini so wan situwâsi? Te wi e go loekoe pisi foe a brifi foe Paulus gi den Hebrewsma (di a ben skrifi wan sani foe 61 G.T.), dan dati e jepi wi foe piki na aksi dati. So wan fasi foe loekoe a tori sa jepi wi alamala na ini a ten disi foe no saka go na ini wan srefi sortoe swaki fasi na jeje sei.
6. San na wan toe difrenti na mindri na anbegi na ondro a Wet foe Moses nanga na anbegi di gron na tapoe bribi na ini Jesus Krestes?
6 Den Hebrew kresten ben kon foe a djoe bribi, wan seti di ben taki dati den e gi jesi na a Wet di Jehovah ben gi nanga jepi foe Moses. A gersi taki a Wet dati tan hari foeroe djoe kresten, kande foe di foeroe jarihondro langa a ben de a wan-enkri fasi foe kon krosibei na Jehovah, èn a ben de wan kefalek moi seti foe anbegi, nanga wan priesterwroko, srakti-ofrandi di sma ben tjari doronomo, nanga wan tempel na ini Jerusalem di sma na heri grontapoe ben sabi. Krestendom de tra fasi. A e aksi foe si sani na jejefasi, neleki Moses, di „ben poti ala en prakseri na tapoe a pai di a ben sa kisi [ma di de na ini a ten di moesoe kon ete]” èn „ben tan stanfaste neleki a ben e si a Wan di wi no kan si” (Hebrewsma 11:26, 27). Soleki fa a sori, dan foeroe djoe kresten no ben abi so wan fasi foe si sani na jejefasi. Den ben e tingatinga, na presi foe lon na wan fasi nanga wan marki na prakseri.
7. Fa a seti pe wi komoto na ini, ben sa kan abi krakti na tapoe a fasi fa wi e lon na ini a streilon foe kisi libi?
7 Wan srefi sortoe situwâsi de na ini a ten disi? A troe taki a situwâsi na ini a ten disi no de soifri a srefi. Tokoe kresten e komoto na ini wan seti foe sani di e skepi. Grontapoe e pristeri span okasi, ma na a srefi ten a e poti hebi frantiwortoe na sma tapoe. Boiti foe dati, foeroe foe wi e libi na ini kondre pe moro foeroe sma e si sani na wan tweifri fasi èn sma abi wan fasi foe soekoe den eigi belang fosi èn e prakseri densrefi nomo. Efoe wi e gi pasi meki so wan seti abi krakti na tapoe wi, dan makriki ’den ai foe wi ati’ ben kan kon doengroe (Efeisesma 1:18). Fa wi sa lon boen na ini a streilon foe libi efoe wi no kan si krin moro pe wi e go?
8. San na wan toe fasi pe a krestendom de moro hei leki na anbegi na ondro a Wet?
8 Foe man gi den djoe kresten deki-ati, dan Paulus ben memre den taki a kresten seti ben hei moro a Wet foe Moses. A troe, di a nâsi Israèl na skinfasi ben de a pipel foe Jehovah na ondro a Wet, dan Jehovah ben taki nanga a nâsi dati nanga jepi foe profeiti di ben taki na ondro a krakti foe a santa jeje. Ma, Paulus e taki, na ini a ten disi A e taki „nanga jepi foe wan Manpikin, di a poti leki erfgenaam foe ala sani, èn di nanga jepi foe en, ben meki den seti foe sani” (Hebrewsma 1:2). Moro fara, Jesus bigi moro leki ala den kownoe foe a famirilin foe David, den „patna” foe en. A hei srefi moro leki den engel. — Hebrewsma 1:5, 6, 9.
9. Foe san ede wi moesoe poti „moro prakseri leki san wi gwenti” na san Jehovah e taki, neleki den djoe kresten na ini a ten foe Paulus?
9 Dati meki Paulus ben gi den djoe kresten a rai: „Wi moesoe poti moro prakseri leki san wi gwenti, na tapoe den sani di wi ben jere, so taki noiti wi e drifi gowe” (Hebrewsma 2:1). Ala di a ben de wan moi blesi foe leri sani ini a tori foe Krestes, tokoe moro ben de fanowdoe. Den ben moesoe poti boen prakseri na tapoe a Wortoe foe Gado foe feti nanga a krakti di a djoe libimakandra lontoe den, ben abi na tapoe den. Wi toe moesoe poti „moro prakseri leki san wi gwenti” na san Jehovah e taki, nanga a propaganda di wi e kisi foe jere doronomo foe a grontapoe disi na prakseri. Disi wani taki foe kweki boen gwenti foe studeri èn foe tan abi wan boen bijbel-leisi schema. Soleki fa Paulus e taki baka ten na ini en brifi gi den Hebrewsma, dan a wani taki toe foe de doronomo na den konmakandra èn foe meki a bribi foe wi bekènti na tra sma (Hebrewsma 10:23-25). So wan aktiviteit sa jepi wi foe tan de na ai na jejefasi, so taki wi no frigiti a glori howpoe foe wi. Efoe wi e foeroe den prakseri foe wi nanga den prakseri foe Jehovah, dan iniwan sani di a grontapoe disi kan doe nanga wi no sa moro wi noso meki wi lasi a balansi foe wi. — Psalm 1:1-3; Odo 3:1-6.
„Tan froemane makandra”
10. (a) San kan pasa nanga wan sma di no e poti moro prakseri leki san a gwenti na a Wortoe foe Jehovah? (b) Fa wi kan „tan froemane makandra”?
10 Efoe wi no e poti boen prakseri na tapoe jeje afersi, dan den pramisi foe Gado kan gersi sani di no de troetroe. A sani dati ben pasa srefi na ini a fosi jarihondro, di den gemeente ben abi soso salfoe kresten na ini èn wan toe foe den apostel ben de na libi ete. Paulus ben warskow den Hebrewsma: „Loekoe boen, brada, taki noiti wan godelowsoe ati di no abi bribi, e gro na ini no wan foe oenoe, foe di a e hari ensrefi poeroe foe a libi Gado, ma tan froemane makandra ibri dei, so langa leki joe kan kari en ’Tide’, so taki a bedrigi krakti foe sondoe no tranga na ati foe no wan foe oenoe” (Hebrewsma 3:12, 13). Den wortoe foe Paulus „loekoe boen” e poti krakti na tapoe a fanowdoe foe de na ai. Kefar de! A mankeri di wi e mankeri bribi — „sondoe” — ben sa kan gro na ini wi ati, èn wi ben kan hari wisrefi poeroe foe Gado na presi foe kon moro krosibei na en (Jakobus 4:8). Paulus e memre wi foe „tan froemane makandra”. Wi abi a waran foe demakandra nanga brada fanowdoe. „Wan sma di e hori ensrefi aparti, sa soekoe en eigi wini nomo; teige ala praktis koni a sa handri” (Odo 18:1). A fanowdoe gi so wan demakandra e boeweigi kresten na ini a ten disi foe go doronomo na den gemeente konmakandra, bigi konmakandra nanga kongres.
11, 12. Foe san ede wi no moesoe de tevrede foe sabi soso den fondamenti kresten leri nomo?
11 Baka ten na ini en brifi, Paulus e gi a tra warti rai disi: „Ala di oenoe ben moesoe de leriman nanga a ten na prakseri, tokoe oenoe abi wan sma fanowdoe baka foe gi oenoe leri foe a bigin foe den fondamenti sani foe den santa wortoe foe Gado; èn oenoe tron leki den sma di abi merki fanowdoe, no tranga njanjan. . . . Tranga njanjan de gi lepi sma, den sma di foe di den gebroiki a koni di den abi foe si sani krin, e leri disi foe si san boen èn san ogri” (Hebrewsma 5:12-14). Soleki fa a sori, dan son djoe kresten no ben go na fesi ini a froestan di den ben froestan sani. Den no ben de esi foe teki a leti di ben e kon krin moro nanga moro ini a tori foe a Wet nanga a besnijdenis (Tori foe den Apostel 15:27-29; Galasiasma 2:11-14; 6:12, 13). Son wan foe den kande abi warderi ete gi den sortoe gwenti leki na alawiki sabadei nanga na alajari verzoen-dei nanga ala en seremonia. — Kolosesma 2:16, 17; Hebrewsma 9:1-14.
12 Dati meki Paulus e taki: „Now di wi gowe libi a fondamenti leri foe a Krestes na wi baka, meki wi go moro fara foe kon lepi” (Hebrewsma 6:1). Wan sma di e lon na ini wan marathon èn di e poti boen prakseri na tapoe den sani di a e njan, sa man horidoro moro boen na ini a langa hebi streilon. Na a srefi fasi a de so toe, taki wan kresten di e poti boen prakseri na tapoe den sani di a e njan na jejefasi — a no e teki soso den ’fondamenti leri’ — sa man tan moro boen na tapoe a pasi èn kaba en. (Teki gersi 2 Timoteus 4:7.) Dati wani taki foe kweki belangstelling gi „a bradi nanga a langa nanga a hei nanga a dipi” foe a waarheid, èn na so fasi e go na fesi foe kon lepi. — Efeisesma 3:18.
„Oenoe abi horidoro fanowdoe”
13. Fa den Hebrew kresten ben sori a bribi foe den na ini a ten di pasa?
13 Na ini a pisi ten wantewante baka a Pinksterfesa foe 33 G.T., den djoe kresten ben tanapoe kánkan ala di den ben kisi ogri-ati froefolgoe (Tori foe den Apostel 8:1). Kande Paulus ben abi a sani dati na prakseri di a ben skrifi: „Tan memre den dei foe fositen pe, baka di oenoe kon froestan den sani, oenoe horidoro na ini wan hebi strei na ondro foeroe pina” (Hebrewsma 10:32). A hori di den ben horidoro na so wan getrow fasi ben sori a lobi di den ben abi gi Gado èn dati ben gi den frifasi foe taki na fesi foe en (1 Johanes 4:17). Paulus e froemane den foe no trowe a frifasi dati foe taki, foe a mankeri foe bribi ede. A e gi den tranga: „Oenoe abi horidoro fanowdoe, so taki, baka te oenoe doe a wani foe Gado, oenoe kan kisi a kontroe foe a pramisi. Bika ete ’wan sjatoe pisi ten’ èn ’en di e kon, sa doro èn a no sa meki oenoe wakti’. ” — Hebrewsma 10:35-37.
14. Sortoe troe tori moesoe jepi wi foe horidoro, srefi baka di wi dini Jehovah foeroe jari kaba?
14 Fa a de nanga wi na ini a ten disi? Moro foeroe foe wi ben de fajafaja di wi ben leri a kresten waarheid a fosi leisi. Wi abi a faja dati ete? Noso wi ’libi a lobi di wi ben abi fosi’? (Openbaring 2:4) Wi kon kowroe, kande kon kisi lasi-ati pikinso noso kon weri foe wakti Armagedon? Ma stòp èn prakseri boen. A waarheid no lasi en moifasi leki fa a ben de fosi. Jesus de wi Kownoe na hemel ete. Wi e howpoe ete foe libi foe têgo na tapoe wan paradijs grontapoe, èn wi abi wi matifasi ete nanga Jehovah. Èn noiti no frigiti: „En di e kon, sa doro èn a no sa meki oenoe wakti.”
15. Fa son kresten horidoro na ondro ogri-ati froefolgoe, neleki Jesus?
15 Dati meki den wortoe foe Paulus di skrifi na ini Hebrewsma 12:1, 2 fiti srefisrefi: „Meki wi poeroe so srefi ibri hebi nanga a sondoe [mankeri foe bribi] di e kisi wi makriki, èn meki wi horidoro foe lon a streilon di poti na wi fesi, ala di wi e loekoe boen na Jesus, a Moro Prenspari Fesiman èn a Sma di e meki a bribi foe wi kon boen dorodoro. Foe a prisiri ede di ben poti na en fesi, meki a ben horidoro na wan pina-oedoe, a ben wisiwasi sjen, èn a go sidon na a reti anoe foe a kownoestoeroe foe Gado.” Foeroe sani de di den foetoeboi foe Gado horidoro na den ondro na ini den lasti dei disi. Neleki Jesus, di ben de getrow te so fara taki a ben dede wan banawtoe dede, son brada nanga sisa foe wi horidoro na wan getrow fasi na ondro den moro ogri-ati froefolgoe — strafoe-oso kampoe, a pina di sma ben pina den, a didon di sma ben didon na den nanga tranga foe abi seks, srefi dede (1 Petrus 2:21). Na ati foe wi no e kon foeroe nanga lobi gi den te wi e prakseri foe a soifri retifasi foe den?
16, 17. (a) Nanga sortoe sani di de wan tjalensi gi a bribi foe den, foeroe kresten moesoe feti? (b) San na den sani di wi moesoe memre di sa jepi wi foe tan lon na ini a streilon foe kisi libi?
16 Ma gi moro foeroe kresten, den tra wortoe foe Paulus e fiti: „Ini a feti di oenoe e feti nanga a sondoe dati, noiti ete oenoe no kakafoetoe te leki oenoe lasi broedoe” (Hebrewsma 12:4). Ma tokoe na ini a seti disi, a pasi foe waarheid no de makriki gi iniwan foe wi. Son wan lasi-ati foe „genstaki foe sondari” ede na grontapoe wroko noso na skoro, èn e kisi foe doe nanga spotoe noso e kakafoetoe gi a druk foe doe sondoe (Hebrewsma 12:3). Tranga tesi swaki a bosroiti di son wan teki foe tan hori na den hei markitiki foe Gado (Hebrewsma 13:4, 5). Sma di fadon komoto na bribi abi krakti na tapoe a balansi na jejefasi foe wan toe foe den sma di e arki na a pori propaganda foe den (Hebrewsma 13:9). Problema di abi foe doe nanga a fasi fa sma de, pori a prisiri foe trawan. Son kresten kon swaki foe di den poti toemoesi foeroe prakseri na tapoe ontspanning nanga friten aktiviteit. Èn foeroe foe den e firi taki den problema foe libi na ini a seti foe sani disi e kwinsi den.
17 A troe taki no wan foe den situwâsi disi no e meki taki wi ’kakafoetoe te leki wi lasi broedoe’. Èn son situwâsi kan kon foe fowtoe bosroiti di wisrefi teki. Ma den alamala de wan tjalensi gi a bribi foe wi. Foe dati ede meki wi moesoe hori wi ai na tapoe a toemoesi moi eksempre foe Jesus foe a hori di a ben horidoro. Meki a de so, taki noiti wi no frigiti o moi a howpoe foe wi de. Meki a de so, taki noiti wi no lasi na overtoigi di wi abi, taki Jehovah „e tron a sma di e pai den wan di e soekoe en serjoesoe” (Hebrewsma 11:6). Dan wi sa abi a krakti na jejefasi foe tan lon na ini a streilon foe kisi libi.
Wi kan horidoro
18, 19. Sortoe sani di ben pasa na ini a historia e sori taki den Hebrew kresten na ini Jerusalem ben poti prakseri na tapoe a rai foe Paulus di a ben gi na ondro a krakti foe a santa jeje?
18 San den djoe kresten ben doe na tapoe a brifi foe Paulus? So wan siksi jari baka di a brifi gi den Hebrewsma skrifi, Judea de na ini wan feti. Na ini 66 G.T., a legre foe Rome ben lontoe Jerusalem èn ben meki den wortoe foe Jesus kon troe: „Te oenoe e si taki legre kampoe lontoe Jerusalem, sabi dan taki a pori foe en kon krosibei” (Lukas 21:20). Ma gi a boen foe den kresten di ben sa de na ini Jerusalem na a ten dati, Jesus ben taki: „Dan meki den wan di de na Judea, bigin lon gowe na den bergi, èn meki den wan di de na en mindri, hari gowe foe drape, èn meki den wan di de na den boiti presi, no go na en ini” (Lukas 21:21). Foe dati ede a feti nanga Rome ben tjari wan tesi kon: Den djoe kresten dati ben o gowe libi Jerusalem, a moro prenspari presi foe a djoe anbegi èn a presi foe a toemoesi moi tempel?
19 Wantronso, èn foe wan reide di no wan sma sabi, den Romesma ben hari densrefi poeroe. Kande den djoe di ben gi densrefi na ini a dini foe Gado, ben si a sani disi leki wan boeweisi taki Gado ben e kibri a santa foto foe den. Fa a ben de nanga den kresten? A historia e froeteri wi taki den ben lowe gowe. Baka dati, na ini 70 G.T., den Romesma ben kon baka èn ben pori Jerusalem krinkrin èn ben meki sma lasi den libi na wan toemoesi ogri-ati fasi. A „dei foe Jehovah” di Joèl ben taki foe dati na fesi, ben doro na Jerusalem. Ma getrow kresten no ben de drape moro. Den ’ben lon gowe foe kisi froeloesoe’. — Joèl 2:30-32; Tori foe den Apostel 2:16-21.
20. A sabi di wi sabi taki a bigi „dei foe Jehovah” de krosibei, moesoe boeweigi wi na sortoe fasi?
20 Na ini a ten disi, wi sabi taki wan tra bigi „dei foe Jehovah” heri esi sa kisi a heri seti foe sani disi (Joèl 3:12-14). Wi no sabi o ten a dei dati sa kon. Ma a Wortoe foe Gado e gi wi a djaranti taki a sa kon seiker! Jehovah e taki dati a no sa kon lati (Habakuk 2:3; 2 Petrus 3:9, 10). Foe dati ede, meki wi „poti moro prakseri leki san wi gwenti, na tapoe den sani di wi ben jere”. Sorgoe foe no mankeri bribi, „a sondoe di e kisi wi makriki”. Teki a fasti bosroiti foe horidoro awansi o langa a e teki. Memre taki Jehovah en bigi hemel organisâsi, di gersi wan wagi, e boeweigi. A sa doe san a abi leki marki. So boen, meki a de so, taki wi alamala e tan lon èn no tapoe foe lon na ini a streilon foe kisi libi!
Joe e memre disi ete?
◻ A poti di wi e poti prakseri na tapoe sortoe froemane di Paulus ben gi den Filipisma, sa jepi wi foe horidoro na ini a streilon foe kisi libi?
◻ San sa jepi wi foe feti nanga a fasi di a grontapoe disi abi foe poeroe a prakseri foe wi?
◻ Fa wi kan jepi makandra foe horidoro na ini a streilon?
◻ San na wan toe sani di ben kan meki taki wan kresten e doe en safrisafri?
◻ Fa na eksempre foe Jesus kan jepi wi foe horidoro?
[Prenki na tapoe bladzijde 8, 9]
Neleki sma di e lon na ini wan streilon, na so kresten no moesoe meki noti poeroe a prakseri foe den
[Prenki na tapoe bladzijde 10]
No wan sani kan tapoe Jehovah en bigi hemel wagi foe doe san Gado abi na prakseri