¡Poti Prakseri na a Warskow!
¡BUDUMMM! Tapu 3 yuni 1991 nanga wan tumusi bigi babari di ben gersi dondru, Fugenbergi na ini Yapan ben spiti bun furu gas nanga asisi kon na doro. A kefalek faya gas di ben moksi nanga asisi ben fadon neleki alen na a bergi skin. Fu di a bergi ben sutu, meki 43 sma ben lasi libi. Furu sma di pikinmoro no ben tan na libi ben bron na wan tumusi ogri fasi. „Watra, watra, grantangi”, sonwan ben bari. Brandweerman nanga skowtu ben rèi kefalek tranga fu yepi den.
SO WAN tu wiki na fesi, sma ben si wan lontu ipi lava na tapu na ede fu Fugenbergi, èn dati meki den tiriman nanga den sma di ben libi drape ben de na ai. Moro leki wan wiki fosi a rampu pasa, a rai ben gi taki sma ben musu gowe libi a kontren go na wan tra presi. Wan dei bifo a bergi ben sutu, dan skowtu ben aksi nyunsuman fu no go na ini a kontren pe sma no mag go. Ma toku a ben de so taki tapu na ogri bakadina dati den 43 sma di ben lasi libi, ben de na ini a kontren pe kefar de.
Fu san ede so furu sma ben abi ati fu go na ini a kontren noso fu tan drape? Wan tu gronman di ben gowe libi den oso fu den, ben go baka fu go luku den sani nanga den gron fu den. Dri sabidensiman di e ondrosuku vulkaantori ben pruberi fu go so krosibei fu a vulkaan leki den ben kan, fu kowru a lostu di den ben abi fu kon sabi moro fu sabidensitori. Wan lo nyunsuman nanga fowtowman ben prefuru fu pasa a lin di ben sori na ini sortu kontren sma no ben mag go, bika den ben wani sabi soifri fa a vulkaan ben e wroko. Dri taximan di den nyunsuman ben yuru, ben drape tu. Skowtu nanga friwani brandweerman ben du den wroko. Ibriwan fu den ben abi wan sani fu san ede a ben go na ini a kontren pe kefar ben de — ma a bakapisi ben de taki a ben lasi en libi.
¿Yu De na ini wan Kontren Pe Kefar De?
Kande wi alamala no e libi krosibei fu wan vulkaan di kan sutu. Ma fa a ben o de efu wi ben o kisi fu du nanga wan rampu di ben o kon na heri grontapu, èn di ben o poti wi alamala na heri grontapu na ini wan kontren pe kefar de. Wan buku di buweisi tapu a kontren fu profeititori taki yu kan frutrow na tapu, e warskow wi fu wan rampu di o kon na heri grontapu. A e taki fu en na a fasi disi: „Son sa kon dungru, èn mun no sa gi a leti fu en, èn den stari sa fadon komoto na hemel, èn den krakti fu hemel sa kon seki. . . . Ala den lo fu grontapu sa naki densrefi na ini wan sari krei” (Mateus 24:29, 30). Dyaso den e taki dati den sani di e pasa na hemel èn di de fu si na a heri universum, ben o abi krakti tapu „ala lo fu a grontapu”. Nanga tra wortu, a profeititori disi abi fu du nanga wan rampu di o abi krakti tapu ibriwan fu wi.
A buku disi di abi profeititori di yu kan frutrow na tapu, na a Bijbel. A moi fu si, taki den vers lontu den tekst di den kari dyaso na tapusei e taki finifini fu den sani di sa meki a rampu disi kon na heri grontapu. Neleki fa a lontu ipi lava nanga tra sani di ben sori taki a vulkaan ben e wroko, ben meki den tiriman fu a foto Shimabara fruteri pe wan kontren ben de pe sma ben kan kon na ini kefar, na so a Bijbel e fruteri wi fu san ede wi musu tan na ai èn sreka wisrefi, so taki wi kan tan na libi. Wi kan leri wan sani fu a sari sani di ben pasa na Fugenbergi èn wi kan si krin o seryusu a sani de di de na wi fesi.
[Sma di abi a reti fu a prenki na tapu a kafti]
KAFTI: Yomiuri/Orion Press/Sipa Press
[Sma di abi a reti fu a prenki na tapu bladzijde 3]
Yomiuri/Orion Press/Sipa Press