Wan Buku Di Furu Yongu Sma No Lobi Leisi
„FA MI kan de seiker taki Bijbel na trutru a Wortu fu Gado? Bijbel a no wan buku di mi lobi leisi”, na so wan yongu uma di nen Beate, ben taki.
Na ini Doisrikondre, pe Beate e tan, furu yongu sma e prakseri neleki en fu Bijbel. Fu dati ede, den no e denki taki a prenspari fu leisi Bijbel. Wan ondrosuku di ben du drape no so langa pasa, ben sori taki wan sani fu 1 procent fu den yongu sma e leisi Bijbel bun furu. Tu procent e leisi Bijbel furutron, 19 procent e leisi en wanwan leisi, èn so wan 80 procent no e leisi Bijbel noiti. Den nomru de a srefi kande na ini tra kondre. Kande den de a srefi tu pe yu e libi. A de krin taki Bijbel na wan buku di furu yongu sma no lobi leisi.
We, a no musu fruwondru wi dan taki furu yongu sma sabi pikinso nomo fu Bijbel! Na a bigin fu a yari 2000, dan a koranti Lausitzer Rundschau ben fruteri fu wan ondrosuku di ben du. Na ondrosuku disi ben sori omeni sma ben sabi den Tin Komando èn ben gebroiki den leki tirilin na ini den libi. Fu den sma di ben abi moro leki 60 yari, dan 67 procent ben sabi den komando èn ben gebroiki den leki tirilin. Fu den sma di no ben doro 30 yari ete, soso 28 procent ben sabi den tin komando. Fu tru, furu yongu sma no sabi a Wortu fu Gado srefisrefi.
Wan Tu Yongu Sma E Prakseri Tra Fasi fu Bijbel
Na a tra sei, na heri grontapu milyunmilyun yongu sma de di kon si taki a Wortu fu Gado abi trutru waarde. Fu eksempre: Aleksander di abi 19 yari, e leisi Bijbel ibri mamanten bifo a e go na wroko. „Mi no man prakseri fu wan moro betre fasi fu bigin a dei”, na so a e taki. Sandra abi a gwenti fu leisi wan pisi fu Bijbel ibri mofoneti. „A leisi fu Bijbel tron wan pisi fu den sani di mi gwenti du ibri dei”, na so a e fruteri. Julia, di abi 13 yari, abi a gwenti kaba fu leisi no moro mendri leki wán kapitel fu Bijbel bifo a e go sribi na neti. „A e gi mi prisiri trutru, èn mi wani go doro nanga disi na ini a ten di e kon.”
Sortu fasi fu si sani na a moro bun wan èn a moro koni wan? Yu sa abi wini trutru te yu e leisi Bijbel? A abi waarde èn a prenspari trutru gi yongu sma? San yu e denki?