Fu san ede wi abi tra sma fanowdu
„Tu moro bun leki wán . . . Efu wan fu den ben sa fadon, dan a trawan kan opo en patna.”—Kownu Salomo
KOWNU SALOMO fu Israel fu owruten ben taki: „Tu moro bun leki wán, bika den abi wan bun paiman gi a tranga wroko fu den. Bika efu wan fu den ben sa fadon, dan a trawan kan opo en patna. Ma fa a sa de nanga a wan-enkri sma di e fadon te nowan trawan no de fu opo en?” (Preikiman 4:9, 10) A koniman disi di ben e ondrosuku a fasi fa libisma e tyari densrefi, e sori krin taki wi abi trawan fanowdu èn taki a de prenspari fu no hori wisrefi aparti fu trawan. Ma den wortu disi no ben de libisma denki nomo. Salomo ben taki a sani disi fu di Gado ben gi en a koni nanga santa yeye fu du dati.
A no de wan koni sani fu hori wisrefi aparti fu trawan. Libisma abi makandra fanowdu. Wi alamala abi a krakti nanga a yepi fu tra sma fanowdu. „Wan sma di e hori ensrefi aparti, sa suku en eigi wini nomo”, na so wan odo fu Bijbel e taki. „A sa handri na wan fasi di e sori taki a no e poti prakseri kwetikweti na koni rai” (Odo 18:1). Sobun, a no de fu fruwondru taki sabidensiman di e ondrosuku a libimakandra e gi sma deki-ati fu de wan memre fu wan grupu èn fu leri sabi trawan.
Professor Robert Putnam e sori taki efu wi wani dati a libimakandra kon bun baka, dan wan fu den sani di musu pasa na taki „sma musu meki a bribi fu den abi moro krakti tapu den libi”. Yehovah Kotoigi de wan tumusi moi eksempre na ini a tori disi, fu di na heri grontapu den e kisi kibri na ini gemeente di de leki osofamiri. Den e du soleki fa na apostel Petrus ben taki, namku den „abi lobi gi ala den brada”, di e „frede Gado” na wan lespeki fasi (1 Petrus 2:17). Boiti dati, den Kotoigi no e hori densrefi aparti fu trawan èn den e wai pasi gi den seryusu problema di dati e tyari kon, fu di den furu bun sani di den e du gi a tru anbegi e meki taki den tan abi furu fu du. Wan fu den sani disi na a wroko fu leri tra sma a waarheid di de fu feni na ini Gado Wortu, Bijbel.—2 Timoteyus 2:15.
Lobi èn demakandra nanga trawan kenki den libi
Yehovah Kotoigi de leki wan libimakandra pe den sma de na ini wánfasi èn pe ibri memre de prenspari. Fu eksempre, luku a kefal fu Miguel, Froylán, nanga Alma Ruth. Den de fu a srefi osofamiri di komoto fu Latino-Amerika. Den gebore nanga wan siki na den bonyo di e meki taki den no man gro bun. Den ala dri de na ini rolsturu. Fa a libi fu den kenki di den bigin abi demakandra nanga Kotoigi?
Miguel e piki: „Wan pisi ten mi ben abi wan lo problema di ben meki mi lasi-ati, ma di mi bigin abi demakandra nanga a pipel fu Yehovah, dan a libi fu mi kenki. A no de wan bun sani kwetikweti te wan sma e hori ensrefi aparti fu trawan. Ibri wiki mi e go na den Kresten konmakandra pe mi abi demakandra nanga den brada nanga sisa fu mi. Disi ben de wan bigi yepi gi mi fu feni trutru koloku.”
Alma Ruth e taki moro fara: „Mi ben abi momenti pe mi ben brokosaka srefisrefi; mi ben firi sari trutru. Ma di mi kon leri sabi Yehovah, dan mi ben firi taki mi ben kan abi wan krosibei banti nanga en. Disi kon de a moro prenspari sani na ini mi libi. A famiri fu mi ben meki furu muiti fu gi wi trowstu nanga deki-ati, èn dati tyari a famiri fu wi kon moro krosibei na makandra.”
Na wan lobi-ati fasi a papa fu Miguel leri en fu leisi èn skrifi. Baka dati, Miguel ben yepi Froylán nanga Alma Ruth sosrefi fu leisi èn skrifi. Disi ben de prenspari gi den fu man du moro na yeye fasi. Alma Ruth e taki: „Wi ben kisi bigi wini fu di wi leri leisi, bika na so wan fasi wi ben man kisi nyanyan na yeye fasi te wi e leisi Bijbel nanga Bijbel publikâsi.”
Now, Miguel e dini leki wan Kresten owruman. Froylán leisi a heri Bijbel neigi tron kaba. Alma Ruth e du moro na ini a diniwroko gi Yehovah fu di a e dini leki wan pionier, noso wan furuten Kownukondre preikiman, sensi 1996. A e taki: „Nanga a blesi fu Yehovah mi ben man doro a marki disi. Boiti dati, den lobi Kresten sisa fu mi yepi mi fu preiki èn sosrefi fu hori sowan 11 bijbelstudie di mi ben man bigin.”
Wan tra moi eksempre na di fu Emelia. Na uma disi ben de na ini wan ongoloku pe a ben kisi mankeri na en futu èn na en baka. Now a de na ini wan rolsturu. Yehovah Kotoigi na ini Meksikow City ben studeri Bijbel nanga en, èn a ben teki dopu na ini 1996. Emelia e taki: „Bifo mi ben kon leri sabi waarheid, dan mi ben wani kiri misrefi; mi no ben wani libi moro. Mi no ben de koloku srefisrefi èn mi ben e firi leki mi no warti noti, mi ben e krei dei nanga neti. Ma di mi ben abi demakandra nanga a pipel fu Yehovah, dan mi ben e firi taki den brada nanga sisa lobi mi trutru. Den e meki ten gi mi, èn disi ben de wan deki-ati gi mi. Wan fu den owruman de leki wan brada noso wan papa gi mi. Na owruman disi nanga wan tu dinari ini a diniwroko e tyari mi na ini mi rolsturu go na den konmakandra nanga a preikiwroko.”
José di ben teki dopu na ini 1992 leki wan fu den Kotoigi fu Yehovah, e libi en wawan. A abi 70 yari èn a go nanga pensyun na ini 1990. José no ben firi koloku srefisrefi, ma baka di wan Kotoigi preiki gi en, dan wantewante a bigin go na den Kresten konmakandra. A ben lobi den sani di a ben e yere drape èn sosrefi den sani di a ben e si. Fu eksempre, a ben si fa den brada ben de leki mati gi makandra èn a ben firi taki den ben e broko den ede nanga en trutru. Den owruman nanga den dinari ini a diniwroko na ini a gemeente pe a de, e sorgu gi en now (Filipisma 1:1; 1 Petrus 5:2). Den brada disi na ’wan bigi yepi’ gi en (Kolosesma 4:11). Den e tyari en go na datra, den e fisiti en na en oso, èn den ben gi en trowstu nanga deki-ati tu di a ben musu du den fo oparâsi fu en. A e taki: „Den e broko den ede nanga mi. Den na mi famiri trutru. Mi e firi switi fu de na den mindri.”
Wan sma sa de koloku trutru te a e gi sani
Leti bifo Kownu Salomo ben taki dati „tu moro bun leki wán”, dan a ben taki dati a de fu soso te wan sma e gi ala en krakti fu kisi gudu nomo (Preikiman 4:7-9). Ma dati na soifri san furu sma e du na ini a ten disi. Den e du ala san den man fu kisi gudu, awansi dati o pori a banti di den abi nanga den famiri noso nanga tra sma.
Furu sma no abi wan banti nanga trawan fu di den gridi èn fu di den e prakseri densrefi nomo. Disi no meki den koloku èn a no gi den prisiri na ini a libi, bika furu tron den sortu sma disi abi wan lo broko-ede nanga problema di e bruya den. Kontrari fu dati, den ondrofenitori di wi ben gi didyonsro e sori wi san na den bun bakapisi te sma abi demakandra nanga den wan di e dini Yehovah, èn di e du sani fu di den abi lobi gi Yehovah èn gi tra sma. Den sma disi di ben brokosaka noso di ben firi sari fu di den no ben abi demakandra nanga trawan, ben man wini den firi disi. Den ben man du dati fu di den ben e go na den Kresten konmakandra doronomo, fu di den ben e kisi yepi fu Kresten brada nanga sisa di e broko den ede nanga den, èn fu di den ben de fayafaya na ini a diniwroko.—Odo 17:17; Hebrewsma 10:24, 25.
Fu di wi abi makandra fanowdu meki wi e firi wisrefi bun te wi e du sani gi tra sma. Albert Einstein, di ben du wroko di tyari wini gi tra sma, ben taki: „A no san wan sma man kisi fu trawan e meki taki a de prenspari, ma na san a sma e gi.” Disi e kruderi nanga den wortu fu wi Masra Yesus Krestes: „Wan sma sa de moro koloku te a e gi sani, leki te a e kisi sani” (Tori fu den Apostel 20:35). Fu dati ede, aladi a de wan bun sani te trawan lobi wi, toku a bun tu te wisrefi e sori lobi gi trawan, fu di a sa meki wi firi switi èn a bun gi a gosontu fu wi sosrefi.
Wan opziener di fisiti difrenti gemeente wan tu yari kaba fu yepi den na yeye fasi ben yepi sosrefi fu bow konmakandra presi gi den Kresten di pôti. A e fruteri fa a e firi: „A e gi mi prisiri fu dini den brada nanga sisa fu mi. Te mi e si na den fesi fa den abi warderi srefisrefi, dan disi e gi mi deki-ati fu tan suku okasi fu yepi den. Mi kon si taki te yu e broko yu ede nanga trawan, dan dati e meki yu koloku trutru. Mi sabi tu taki wi leki owruman musu de leki ’wan kibripresi gi a winti . . . , leki watra di e lon na ini wan kondre sondro watra, leki a kowrupe fu wan bigi klepston di tanapu leti-opo na ini wan kondre di drei.’”—Yesaya 32:2.
O switi a de te brada e libi makandra na ini wánfasi!
Te wan sma e yepi trawan èn te a e suku fu abi demakandra nanga den wan di e dini Yehovah, dan a no abi misi taki a sma dati sa kisi furu wini èn taki a sa de koloku trutru. „Luku!”, na so a psalm skrifiman ben bari taki. „O bun èn o switi a de te brada e libi makandra na ini wánfasi!” (Psalm 133:1) A de tumusi prenspari fu abi wánfasi na ini na osofamiri fu man horibaka gi makandra, soleki fa a de na ini a kefal fu Miguel, Froylán, nanga Alma Ruth. Èn a de wan blesi trutru te den de na ini wánfasi nanga makandra na ini a tru anbegi! Baka di na apostel Petrus ben gi rai na Kresten masra nanga wefi, dan a skrifi: „Now dan, un alamala musu abi a srefi fasi fu denki, sori firi gi trawan, abi brada lobi, abi safu sari-ati fasi, abi wan yeye fu sakafasi.”—1 Petrus 3:8.
Te wan sma abi wan trutru mati, dan dati e meki a kisi furu wini; a e meki a firi bun èn a e gi en wini na yeye fasi. Di na apostel Paulus ben skrifi den brada nanga sisa fu en, dan a ben gi den a frumane: „Taki nanga den sili di brokosaka fu gi den trowstu, yepi den swakiwan, abi langa pasensi nanga ala sma. . . . Du muiti ala ten fu du san bun, na mindri unsrefi èn na ala tra sma.”—1 Tesalonikasma 5:14, 15.
Fu dati ede, suku okasi pe yu kan du bun gi tra sma. „Du bun gi ala sma, ma spesrutu gi den wan di de na ini a srefi bribi leki [yu]”, bika disi sa meki yu abi wan marki na ini a libi, èn a sa yepi yu fu de koloku (Galasiasma 6:9, 10). Yakobus, wan disipel fu Yesus, ben skrifi: „Efu wan brada noso wan sisa no abi nofo krosi fu tapu en skin èn a no abi nofo nyanyan gi a dei, ma toku wan fu unu e taigi den: ’Tan bun, waran yu skin, sorgu taki yu nyan yu bere furu’, ma unu no e gi den san den abi fanowdu gi den skin, dan sortu bun unu du?” (Yakobus 2:15, 16) A piki tapu na aksi dati de krin. Wi ’no musu poti prakseri na wi eigi afersi wawan, ma wi musu poti prakseri na den afersi fu trawan tu’.—Filipisma 2:4.
Boiti fu yepi trawan te den abi sani tranga fanowdu noso te wan rampu pasa, dan Yehovah Kotoigi e wroko tranga fu yepi tra libisma na wan moro prenspari fasi, namku den e preiki a bun nyunsu fu a Kownukondre fu Gado (Mateyus 24:14). Moro leki 6.000.000 Kotoigi e meki a boskopu bekènti di e gi sma howpu nanga trowstu. Disi e sori taki den e broko den ede trutru nanga tra sma èn taki den lobi tra sma. Ma den Santa Buku fu Bijbel e yepi wi fu kisi wan tra sani di libisma abi fanowdu. San na a sani dati?
Fa fu kisi a sani di wi abi tranga fanowdu
Efu wi wani de koloku trutru, dan wi musu abi wan bun banti nanga Gado. Sma e taki dati: „Sensi a bigin te go miti a dei fu tide, a de so taki libisma na ala presi abi a firi fu suku yepi na wan sani di hei moro den èn di makti moro den. Disi e sori taki libisma gebore nanga a firi fu anbegi wan Gado èn sabidensiman srefi musu erken dati. . . . Wi musu fruwondru srefisrefi èn wi musu abi dipi lespeki te wi e si taki ala libisma na heri grontapu e suku èn e bribi na ini wan moro hei sma.”—Man Does Not Stand Alone, wan buku di A. Cressy Morrison skrifi.
Yesus Krestes ben fruklari: „Koloku fu den sma di sabi taki den abi Gado fanowdu” (Mateyus 5:3). A no abi bun bakapisi gi libisma te den e tan hori densrefi aparti fu trawan. Ma a abi moro takru bakapisi te wi e hori wisrefi aparti fu a Mekiman fu wi (Openbaring 4:11). Wan prenspari sani na ini wi libi musu de fu kisi „a sabi fu Gado” èn fu du den sani di wi e leri (Odo 2:1-5). Fu tru, wi musu abi a fasti bosroiti fu kon abi wan bun banti nanga Gado, fu di wi abi En fanowdu. Efu wi wani abi wan koloku libi èn wan libi di warti trutru, dan wi musu abi wan bun banti nanga Yehovah, „a Moro Heiwan na heri grontapu”.—Psalm 83:18.
[Prenki na tapu bladzijde 5]
Miguel: „Wan pisi ten mi ben abi wan lo problema di ben meki mi lasi-ati, ma di mi bigin abi demakandra nanga a pipel fu Yehovah, dan a libi fu mi kenki”
[Prenki na tapu bladzijde 5]
Alma Ruth: „Di mi kon leri sabi Yehovah, dan mi ben firi taki mi ben kan abi wan krosibei banti nanga en”
[Prenki na tapu bladzijde 6]
Emelia: „Bifo mi ben leri sabi waarheid, . . . mi no ben de koloku srefisrefi èn mi ben e firi leki mi no warti noti”
[Prenki na tapu bladzijde 7]
Te wi abi demakandra nanga tru anbegiman, dan dati sa yepi wi fu abi wan bun banti nanga Gado