Kisi blesi nanga yepi fu a Kownu di e meki a santa yeye fu Gado tiri en!
„A yeye fu Yehovah o de na en tapu.”—YES. 11:2.
1. San son sma taki fu den problema na grontapu?
„TE YU e luku den problema di de na ini politiek, a bruya di de na ini a libimakandra, èn te yu e luku a fasi fa sma e pori grontapu, dan fa a libisma famiri o man tan libi ete 100 yari na ini a grontapu disi?” Na dati Stephen Hawking, wan sabiman, ben aksi na ini a yari 2006. Wan tijdschrift ben taki: „Wi no tyari wan kaba kon na pôtifasi, èn wi no tyari vrede kon na grontapu. Na presi fu dati, wi meki sani kon moro ogri. A no taki wi no pruberi fu tyari wan kenki kon. Wi pruberi ala sortu sani. Wi meki lanti tiri den bisnis afersi fu a kondre, wisrefi pruberi fu tiri den bisnis afersi, wi seti a Volkenbond fu tapu pasi gi orloku, èn wi meki ogri-ati fetisani srefi fu tapu pasi gi orloku. Wi feti someni orloku soso fu tyari wan kaba kon na orloku, taki wi no e bribi moro taki oiti wan kaba o kon na orloku” (New Statesman).
2. Fa Yehovah heri esi sa sori taki na en abi a reti fu tiri grontapu?
2 Futuboi fu Yehovah no e fruwondru te sma e taki den sortu sani disi. Bijbel e taki dati Gado no meki libisma fu tiri densrefi (Yer. 10:23). Yehovah wawan abi a reti fu tiri hemel nanga grontapu. Fu dati ede, na en wawan abi a reti fu poti wet gi wi, fu sori wi sortu marki wi musu abi na ini wi libi, èn fu tiri wi so taki wi kan doro a marki dati. Boiti dati, heri esi a o gebroiki a makti fu en fu tyari wan kaba kon na libisma tirimakti di no tyari nowan wini kon gi sma. Na a srefi ten, a o pori ala sma di no wani si en leki a sma di abi a reti fu tiri, fu di den sma dati ben o meki taki libisma tan srafu fu sondu èn fu Satan Didibri, „a gado fu a grontapu sistema disi”.—2 Kor. 4:4.
3. San a profeiti Yesaya ben taki fu a Mesias?
3 Na ini a Paradijs di o kon, Yehovah o tiri a libisma famiri na wan lobi-ati fasi nanga yepi fu a Mesias Kownukondre (Dan. 7:13, 14). A profeiti Yesaya ben taki fu a Kownu fu a Kownukondre dati: „Wan pikin taki o bigin gro na a tompu fu Isai. A rutu fu en o gi wan pransun di o meki furu froktu. A yeye fu Yehovah o de na en tapu. Fu dati ede a o koni, a o frustan sani bun, a o gi bun rai, a o tranga, a o abi furu sabi, èn a o abi bigi lespeki gi Yehovah” (Yes. 11:1, 2). Na sortu fasi a santa yeye fu Gado yepi Yesus Krestes, ’a pikin taki di bigin gro na a tompu fu Isai’, fu de wan bun tiriman? Sortu blesi a tiri fu en o tyari kon gi libisma? Èn san wi musu du fu kisi wini fu den blesi dati?
Gado yepi Yesus fu tron wan bun tiriman
4-6. Sortu prenspari sani di Yesus sabi, o yepi en fu de wan lobi-ati Kownu, Granpriester, nanga Krutuman di koni trutru?
4 Yehovah wani taki den anbegiman fu en kon volmaakti na ondro a tiri fu wan lobi-ati Kownu, Granpriester, nanga Krutuman di koni trutru. Na fu dati ede Gado teki Yesus Krestes èn a gi en a santa yeye so taki a ben kan tyari den tumusi prenspari frantwortu disi. Wi sa poti prakseri na wan tu reide fu san ede Yesus o man tyari den frantwortu di Gado gi en, na wan heri bun fasi.
5 Yesus sabi Gado moro iniwan sma. A wan-enkri Manpikin di Gado srefi meki, sabi a Tata moro langa leki iniwan tra sma, èn dati kan de milyardmilyard yari langa. Na a ten dati, Yesus kon sabi Yehovah so bun, taki Bijbel e kari en „a prenki fu a Gado di sma no man si” (Kol. 1:15). Yesus ben taki fu ensrefi: „A sma di si mi, si a Tata tu.”—Yoh. 14:9.
6 Boiti Yehovah, nowan sma sabi moro fu den sani di Gado meki èn fu libisma, leki Yesus. Kolosesma 1:16, 17 e taki: „Nanga yepi fu en, Gado meki ala tra sani na hemel èn na grontapu, iya, den sani di sma man si . . . Sosrefi, a ben de fosi ala tra sani, èn ala tra sani ben kon de nanga yepi fu en.” Denki a tori! Leki a „tumusi bun wrokoman” fu Gado, Yesus yepi fu meki ala den tra sani. Dati meki a sabi finifini fa ala den sani meki na hemel èn na grontapu, èn a sabi heri bun tu fa na edetonton fu libisma meki. Iya, Krestes e prenki koni trutru!—Odo 8:12, 22, 30, 31.
7, 8. Fa a yeye fu Gado yepi Yesus fu du a diniwroko fu en?
7 Gado salfu Yesus nanga En santa yeye. Yesus ben taki: „A yeye fu Yehovah de na mi tapu, bika a salfu mi fu meki a bun nyunsu bekènti na den pôtisma; a seni mi go fu preiki taki den strafuman o kon fri, taki den breniwan o si baka, èn taki a o meki den sma di e kisi kwinsi gowe leki friman, fu meki a yari bekènti pe Yehovah o feni sma bun” (Luk. 4:18, 19). Soleki fa a sori, dan di Yesus ben teki dopu, a santa yeye yepi en fu memre sani di a ben leri fosi a ben kon na grontapu leki libisma. A ben man memre tu sortu diniwroko Gado ben wani taki a du na grontapu leki a Mesias.—Leisi Yesaya 42:1; Lukas 3:21, 22; Yohanes 12:50.
8 Fu di Yesus ben kisi krakti fu a santa yeye, èn fu di en skin nanga en frustan ben de volmaakti, meki a no ben de soso a moro bigi sma di oiti libi na grontapu, ma a ben de sosrefi a moro bun Leriman. Fu taki en leti, den sma di ben e arki en ben „fruwondru fu a fasi fa a ben gi leri” (Mat. 7:28). Fu eksempre, Yesus ben man taki fu den moro prenspari reide fu san ede libisma abi problema. Na fu di den abi sondu, èn fu di den no sabi Gado. Boiti dati, a ben kan si san de trutru na ini sma ati, èn a ben sabi fa fu handri nanga den.—Mat. 9:4; Yoh. 1:47.
9. Te yu e prakseri den sani di Yesus ondrofeni na grontapu, dan fa dati e yepi yu fu abi moro frutrow taki a sa de wan bun Tiriman?
9 Yesus ben de wan libisma. Den sani di Yesus ondrofeni leki libisma, èn a demakandra di a ben abi nanga sondu libisma, yepi en tu fu de wan bun Kownu. Na apostel Paulus ben skrifi: „[Yesus] ben musu kon de leki den ’brada’ fu en na ala fasi, so taki a ben kan tron wan granpriester di abi sari-ati èn di de getrow na ini a diniwroko fu Gado. Na so fasi a ben kan tyari wan ofrandi di e tapu den sondu fu a pipel èn di e meki den kon bun baka nanga Gado. Bika fu di ensrefi nyan pina di a ben e kisi tesi, meki a man kon yepi den sma di e kisi tesi” (Hebr. 2:17, 18). Fu di Yesus „kisi tesi”, meki a man firi gi den wan di e kisi tesi. A sari-ati di Yesus ben abi gi sma, ben de krin fu si na a ten di a ben du a diniwroko fu en na grontapu. Den sikiwan, den malengriwan, den wan di sma ben e kwinsi, no ben frede fu go na en. Iya, srefi pikin-nengre no ben frede fu go na en (Mark. 5:22-24, 38-42; 10:14-16). Den safri-ati sma èn den sma di ben e angri fu kon sabi Gado, ben lobi tu fu go na en. Na a tra sei, den heimemre sma, nanga den wan di ’no ben abi lobi gi Gado’, no ben wani arki en, den ben abi bita-ati gi en, èn den ben e gens en.—Yoh. 5:40-42; 11:47-53.
10. Na sortu moi fasi Yesus sori lobi gi wi?
10 Yesus dede gi a bun fu wi. Kande a moro bigi buweisi taki Yesus na a moro bun Tiriman, na taki a ben de klariklari fu dede gi wi. (Leisi Psalm 40:7-11, Da Bijbel na ini Sranantongo.) Krestes ben taki: „Nowan sma abi moro lobi leki a sma di gi en libi gi den mati fu en” (Yoh. 15:13). Iya, tra fasi leki sondu libisma tiriman di e libi wan gudu libi fu a moni di den e kisi fu den borgu fu den, Yesus dede gi a libisma famiri.—Mat. 20:28.
Yesus kisi a frantwortu fu meki libisma kisi wini fu a lusu-paiman
11. Fu san ede wi kan abi ala frutrow taki Yesus sa de wan bun Frulusuman?
11 A fiti srefisrefi taki Yesus, a Granpriester, na a sma di o meki wi kisi wini fu a frulusu-ofrandi fu en! Fu taki en leti, di Yesus ben e du a diniwroko fu en na grontapu, a meki wi kon sabi pikinso san a o du leki wi Frulusuman, na a ten fu a Dusun Yari Tiri fu en. Wi kan kisi wini fu den sani dati efu wi e tan gi yesi na Gado. Yesus ben dresi den sikiwan nanga den malengriwan, a ben wiki dedesma, a ben gi ipi-ipi sma nyanyan, èn a basi sosrefi a winti nanga a se (Mat. 8:26; 14:14-21; Luk. 7:14, 15). Boiti dati, a no du den sani disi fu meki bigi taki a abi makti nanga krakti, ma a du den fu sori taki a e firi gi libisma èn taki a lobi den. Di wan gwasiman aksi Yesus efu a ben wani dresi en, dan Yesus taki: „Mi wani” (Mark. 1:40, 41). Yesus o sori a srefi lobi dati gi sma na a ten fu a Dusun Yari Tiri fu en, èn a sa du dati gi sma na heri grontapu.
12. Fa den wortu di skrifi na Yesaya 11:9 o kon tru?
12 Krestes nanga den wan di o tiri makandra nanga en o tan du a wroko di Yesus ben bigin sowan 2000 yari pasa, èn dati na fu gi sma leri fu Gado. Na so den wortu disi di skrifi na Yesaya 11:9 o kon tru: „Heri grontapu o furu nanga a sabi fu Yehovah, neleki fa a se furu nanga watra.” A no de fu taki dati Gado sa leri wi tu fa wi musu sorgu gi grontapu èn gi den someni sani di e libi na tapu, soleki fa a ben taigi Adam fu du na a bigin. Na a kaba fu den 1000 yari, a sani di Gado ben taki na Genesis 1:28 o kon tru, èn libisma o kisi wini dorodoro fu a frulusu-ofrandi.
Gado yepi Yesus fu tron wan bun Krutuman
13. Fa Yesus sori taki a lobi retidu?
13 Krestes na „a Sma di Gado poti fu krutu den libiwan nanga den dedewan” (Tori. 10:42). A de wan trowstu fu sabi taki Yesus no sa handri kruka, taki ala ten a sa du san reti, èn taki wi sa man frutrow na en tapu. Iya, den fasi disi sa de leki wan leribuba na en mindribere! (Yes. 11:5) Yesus sori taki a no lobi en kwetikweti te sma abi bigi-ai, te den e hoigri, èn te den e du tra ogri. Boiti dati, a ben e krutu den wan di no ben broko den ede nanga tra sma di ben e pina (Mat. 23:1-8, 25-28; Mark. 3:5). Yesus ben sori tu taki sma no ben man kori en, ’bika ensrefi ben sabi fa sma ben e denki’.—Yoh. 2:25.
14. Na sortu fasi Yesus sori taki a lobi retidu, èn san wi musu aksi wisrefi?
14 Yesus e tan sori taki a lobi retidu, fu di a e tiri a moro bigi preikiwroko nanga leriwroko di du oiti na grontapu. Nowan libisma tirimakti, èn nowan ogri yeye man tapu den futuboi fu Gado fu du a wroko disi teleki Gado srefi taki dati a sari. Sobun, te Armagedon pasa, dan wi kan de seiker taki sani waka na wan reti fasi, soleki fa Gado ben wani dati. (Leisi Yesaya 11:4; Mateyus 16:27.) Aksi yusrefi a sani disi: ’Te mi de na ini a diniwroko, dan mi e handri nanga sma neleki fa Yesus ben e du dati? Mi e dini Yehovah nanga ala mi krakti, awinsi mi siki, noso awinsi a situwâsi fu mi e meki taki mi no man du furu?’
15. San wi musu hori na prakseri fu man dini Gado nanga ala wi krakti?
15 Te wi e hori na prakseri taki na Gado e tiri a preikiwroko, dan dati o yepi wi fu dini en nanga wi heri ati. Na en gi wi a komando fu du a wroko disi, a e tiri a wroko disi nanga yepi fu en Manpikin, èn nanga yepi fu en santa yeye a e horibaka gi den sma di e teki prati na a wroko disi. Yu e si en leki wan grani fu wroko makandra nanga Gado èn nanga en Manpikin di a e tiri nanga yepi fu en santa yeye? Nowan tra sma boiti Yehovah man gi moro leki seibi milyun sma deki-ati fu prati a Kownukondre boskopu gi sma na ini 236 kondre. Furu fu den preikiman disi ’no kisi furu skoro èn den de leki ala tra sma’.—Tori. 4:13.
Gi yesi na Gado fu man kisi blesi nanga yepi fu Krestes!
16. San Genesis 22:18 e sori fu den blesi di Gado o tyari kon?
16 Yehovah ben taigi Abraham: „Na yu bakapikin o meki taki ala den pipel fu grontapu o man kisi blesi gi densrefi trutru, fu di yu arki mi” (Gen. 22:18). A sani disi e sori taki den wan di e si en leki wan grani fu dini Gado nanga en Manpikin kan abi a frutrow taki den o kisi den blesi di a Mesias o tyari kon. Èn den e dini Gado fayafaya aladi den e hori den blesi dati na prakseri.
17, 18. San Yehovah pramisi na Deuteronomium 28:2, èn san dati wani taki gi wi?
17 Wan leisi, Gado ben taigi a pipel Israel di de bakapikin fu Abraham, a sani disi: „Efu unu e arki Yehovah un Gado ala ten, dan a o blesi unu. Iya, unu o kisi ala den blesi disi [di skrifi na ini a Wet frubontu] trutru” (Deut. 28:2). Wi kan taki a srefi sani fu den futuboi fu Gado na ini a ten disi. Efu yu wani taki Yehovah blesi yu, dan yu musu ’arki en sten ala ten’. Te yu e du dati, dan ’yu o kisi den blesi disi trutru’. Ma san a wani taki fu „arki” Yehovah?
18 A no de fu taki dati te wi e arki Gado, dan wi e poti bun prakseri na den rai di skrifi na ini a Wortu fu en, èn na a yeye nyanyan di a e gi wi (Mat. 24:45). Boiti dati, wi musu gi yesi na Gado èn na a Manpikin fu en. Yesus ben taki: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini” (Mat. 7:21). Te wi e arki Gado, dan dati wani taki tu dati wi de klariklari fu wroko makandra nanga a Kresten gemeente di a seti, èn pe owruman di ’a gi leki presenti’, e teki fesi.—Ef. 4:8.
19. San wi musu du fu kisi blesi?
19 Wan tu fu den ’libisma di a gi leki presenti’ na den memre fu a Tiri Skin, di e teki presi gi a heri Kresten gemeente (Tori. 15:2, 6). Fu taki en leti, a fasi fa wi e handri nanga wi Kresten brada nanga sisa na wan prenspari sani di Krestes o luku te a o krutu wi na a ten fu a bigi banawtu di de fu kon (Mat. 25:34-40). Sobun, wan fasi fa wi kan kisi blesi, na te wi e tan horibaka gi den salfuwan fu Gado.
20. (a) San na wan prenspari frantwortu di den ’libisma di gi leki presenti’ abi? (b) Fa wi kan sori taki wi de nanga tangi gi den brada disi?
20 Tra ’libisma di gi leki presenti’, na den brada fu den Bijkantoro komte, den opziener di e go luku den difrenti gemeente, nanga den gemeente owruman. Ala den brada disi kisi a frantwortu fu den nanga yepi fu santa yeye (Tori. 20:28). A moro prenspari frantwortu di den brada disi abi, na fu gi a pipel fu Gado deki-ati „teleki wi alamala kon de wán na ini a bribi èn na ini a sabi di wi sabi a Manpikin fu Gado soifri; na so fasi wi kan tron wan sma di gro kon bigi èn di kon lepi leki Krestes” (Ef. 4:13). A tru taki neleki wi, den brada dati abi swakifasi tu. Toku a e tyari blesi kon gi wi te wi de nanga tangi gi a lobi-ati fasi fa den e tiri wi, èn te wi e teki a tiri dati.—Hebr. 13:7, 17.
21. Fu san ede a prenspari taki wi e gi yesi na a Manpikin fu Gado?
21 Heri esi Krestes sa tyari wan kaba kon na a ogri sistema fu Satan. Te dati o pasa, dan wi libi sa de na ini Yesus anu, fu di Gado gi en a makti fu tyari a „bigi ipi” go na den „peti di abi watra di e gi libi” (Openb. 7:9, 16, 17). Fu dati ede, meki wi du ala san wi man fu saka wisrefi na ondro a Kownu di Yehovah e tiri nanga yepi fu en santa yeye, èn meki wi du dati nanga wi heri ati.
San yu leri fu . . .
[Prenki na tapu bladzijde 17]
A sari-ati fu Yesus ben de krin fu si di a gi na umapikin fu Yairus wan opobaka
[Prenki na tapu bladzijde 18]
Yesus Krestes e tiri a moro bigi preikiwroko di du oiti