A muiti di yu e meki no sa de fu soso!
EFU papa nanga mama wani kweki den pikin fu den ’nanga a leri fu Yehovah èn efu den wani frumane den’, dan a de prenspari taki den e hori na Osofamiri Anbegi èn taki den e studeri Bijbel makandra nanga den (Ef. 6:4). Ma efu yu na wan papa noso wan mama, dan yu sabi taki pikin-nengre kan fruferi esi-esi fu wan sani. Fa yu kan sorgu taki den e tan poti prakseri na a tori di yu e studeri nanga den? Luku san son papa nanga mama du.
George, di de fu California, na Amerkankondre, e taki: „Di den pikin fu wi ben moro yongu, dan mi nanga mi wefi pruberi fu du difrenti sortu sani nanga den te wi ben e studeri leki osofamiri. Son leisi, wi alamala ben e weri leki sma fu Bijbel, èn wi ben e prei wan tori di wi ben leisi na ini Mi buku nanga Bijbel tori. Wi meki preisani srefi soleki feti-owru, tiriman-tiki, baskita, nanga tra sortu sani. Wan tra sani di wi ben e prei, na ’Suma na mi’. Na ini a prei disi, wan fu wi ben e du leki wan spesrutu sma fu Bijbel, èn wan trawan ben musu taki suma na dati. Wi ben e meki sani tu. Fu eksempre, wi ben e bow wan pikinwan fu na ark fu Noa, noso wi ben e poti tapu papira o ten prenspari sani na ini Bijbel ben pasa baka makandra. Son leisi, wi ben e teken sma fu Bijbel noso pisi tori di abi fu du nanga Bijbel. Nownowde wi abi na prakseri fu teken den fetisani di Gado gi wi, soleki fa a skrifi na Efeisesma 6:11-17. Te wi du dati, dan ibriwan fu wi musu fruklari san wan spesrutu pisi e prenki. Den sani disi di wi du, yepi wi fu kisi prisiri fu wi osofamiri studie.”
Debi, wan mama na ini Michigan, na Amerkankondre, e fruteri: „Mi nanga mi masra ben feni en muilek fu hari a prakseri fu wi umapikin di a ben abi sowan dri yari. Ne wan dei di mi ben e leisi a tori fu Isak nanga Rebeka na ini a buku Mi buku nanga Bijbel tori, dan wantronso mi teki tu popki èn mi bigin du leki den na Isak nanga Rebeka. Now na umapikin fu wi ben e kaka en yesi arki! Na ini den mun baka dati, mi gebroiki den tu popki dati fu prei difrenti sma fu Bijbel. Baka te wi ben leisi wan Bijbel tori, dan na umapikin fu wi ben e suku a heri oso fu feni preisani noso tra sani di wi ben kan gebroiki fu prei wan tori. A ben de neleki a ben e suku gudu! Wan susu dosu pe wan redi lenti ben tai na en, ben e prenki na oso fu Rakab pe wan redi titei ben tai na en. Wi abi wan sneki di meki fu krosi èn wi ben e tai en na wan sisibi. Wi ben e gebroiki a sneki disi di ben langa wán nanga afu meter fu prenki a kopro sneki na ini Numeri 21:4-9. Wi ben e kibri ala den preisani disi na ini wan bigi saka. Wi ben lobi fu si fa na umapikin fu wi ben e sidon na ini a foroisi e suku sani na ini a ’Bijbel tori’ saka fu en. A ben e gi wi prisiri trutru fu si fa a ben e prei den tori disi na en eigi fasi.”
A no makriki fu kweki pikin. Papa nanga mama musu yepi den pikin fu kon abi na angri fu dini Yehovah. Den musu du disi ibri dei èn na furu difrenti fasi. Ma wan prenspari fasi fa den kan yepi den pikin fu den, na te den e hori na Osofamiri Anbegi ibri wiki, èn te den e studeri Bijbel ibri wiki tu nanga den. A no de fu taki dati a muiti di den e meki no sa de fu soso!