Sortu wini a libi disi abi gi wi trutru?

„SORTU wini a libi disi abi gi wi?” Furu sma aksi densrefi a sani disi. A de wan sari sani taki awansi fa den e prakseri fu a libi, toku furu fu den musu fu agri nanga san Datra Viktor E. Frankl fu Oostenrijk ben taki. A datra disi ben taki dati sma e firi taki a libi fu den na „fu soso èn taki a leigi”.

Fu san ede so furu sma e firi so? Wan sani di e meki taki dati pasa, na taki milyunmilyun sma na heri grontapu e libi na ini kefalek muilek situwâsi. Ibri dei den e kisi fu du nanga pôtifasi, siki, sma e du ogri nanga den, èn sma e kwinsi den. Iya, a libi fu den „lai problema”, soleki fa Yob fu owruten ben taki fu a pina di sma e pina (Yob 14:1). A moro prenspari sani gi den, na fu doro a dei fu tamara.

Milyunmilyun trawan gudu èn den abi en bun. A gersi leki den abi ala sani di den abi fanowdu fu man de koloku trutru na ini a libi. Ma toku furu fu den no de koloku. Fu san ede? Fu di ibri leisi baka „broko-ede nanga pina” e miti den. Den e kisi moni problema noso sari sani e miti den, soleki te den lasi wan pikin na ini dede. Den sani disi e meki den lasi howpu èn den no abi prisiri moro na ini a libi.​—Psalm 90:10.

Wan tra sani de di e meki taki a libi fu den na „fu soso èn taki a leigi”. San na dati? A libi syatu srefisrefi. Furu sma no man frustan fa a kan taki libisma di man du someni kefalek sani, e libi so syatu. Den no man frustan na ogri sani disi di e miti wi alamala te fu kaba: Srefi efu wi no e kisi fu du nanga den moro ogri problema di e miti libisma, toku wi o lasi ala sani te wi dede te fu kaba.​—Preikiman 3:19, 20.

Na so a libi o tan fu ala ten?

Kownu Salomo fu owruten Israel ben taki krin fa sani e waka te fu kaba. A ben si fa sma na ini a ten dati ben e wroko tranga, den ben e gebroiki a koni fu den fu prani gron, fu bow, èn fu sorgu gi den osofamiri, neleki fa wi e du na ini a ten disi. Fu taki en leti, a ben aksi: ’Sortu wini ala den sani disi e tyari kon te fu kaba?’ A ben taki dati ala sani di sma e du na ’soso sani èn na winti nomo den e feti fu fanga’.​—Preikiman 2:17.

Aladi Kownu Salomo ben taki dati ala sani di libisma e du na soso sani èn na winti nomo den e feti fu fanga, a ben bribi taki na so sani ben o waka fu ala ten? Nôno, a ben taki nomo fa sani e waka na ini a libi na ini a grontapu disi. Ma a Wortu fu Gado kan gi yu a dyaranti taki sani no o tan so fu ala ten!

San yu kan du fu abi a dyaranti dati? Grantangi leisi den tu artikel di e kon now. Den kan yepi yu fu frustan fu san ede a gersi leki a libi na fu soso, fa a situwâsi disi o lusu, èn fa yu kan abi wan warti libi nownow kaba.