Theokrasia Diniwroko-skoro
Fu san ede a e hori: Fu leri den preikiman fu preiki moro bun èn fu yepi den tron moro bun leriman fu a bun nyunsu.
O langa a e hori: Doronomo.
Pe a e hori: Na wan Kownukondre zaal.
Suma kan go: Ala sma di e kon na den konmakandra doronomo, di e agri nanga den leri fu Bijbel, èn di e libi soleki fa wan Kresten musu libi.
Fa yu kan teki prati: A Theokrasia Diniwroko-skoro opziener e poti sma na a skoro disi.
Sharon di abi wan siki di meki en kon lan (ALS), taki: „Na a Theokrasia Diniwroko-skoro mi leri fa fu ondrosuku sani moro bun na ini den buku fu wi èn fa fu taki na wan fasi di makriki fu frustan. Mi leri tu fa fu de wan moro bun mati fu Gado èn fa mi kan yepi trawan fu du a srefi tu.”
Arnie di de wan kring-opziener langa ten kaba, taki: „Di mi ben de moro yongu, mi ben e gagu èn mi ben e frede fu luku sma na ini den fesi te mi ben e taki nanga den. A skoro disi yepi mi fu abi moro frutrow na ini misrefi èn a yepi mi fu si taki den sani di mi e du e teri trutru. Yehovah yepi mi trutru. Na a skoro disi mi leri fu bro tra fasi so taki mi man taki moro bun èn mi leri fu poti moro prakseri na san mi e taki. Mi de nanga tangi trutru taki mi man prèise Gado na ini a gemeente èn na ini a preikiwroko.
Skoro gi nyun sma na Betel
Fu san ede a e hori: Fu yepi den nyun sma di kon na Betel, so taki den kan du a Betelwroko fu den na wan bun fasi.
O langa a e hori: Tin na siksi wiki langa, 45 miniti ibri wiki.
Pe a e hori: Betel.
Suma kan go: A sma musu de wan memre fu a Betelfamiri noso a musu de wan sma di den aksi fu kon wroko na Betel fu wán yari noso moro langa.
Fa den kan teki prati: Ala nyun memre fu a Betelfamiri e go na a skoro disi.
Demetrius di go na a skoro disi baka 1980, taki: „A skoro disi yepi mi fu kisi wan moro bun gwenti fu studeri Bijbel èn a yepi mi fu sreka misrefi fu tan na Betel fu wan langa ten. Den leriman, den sani di mi leri èn den rai di mi kisi meki mi si krin taki Yehovah lobi mi, taki a e broko en ede nanga mi, èn taki a wani yepi mi fu du mi Betelwroko bun.”
Kaitlyn taki: „A skoro yepi mi fu si taki a prenspari srefisrefi fu du sani na a fasi fa Yehovah wani. Na a skoro disi mi leri furu fu Yehovah, en oso, nanga en organisâsi èn mi kisi furu warderi gi den.”
Kownukondre Diniwroko-skoro
Fu san ede a e hori: Fu leri kring-opziener, distrikt-opziener, owruman èn son leisi dinari ini a diniwroko fa den musu teki fesi èn fa den musu tyari den frantwortu di den kisi na ini na organisâsi (Tori 20:28). Na a skoro disi den e taki fu a situwâsi fu den gemeente, sani di e pasa furu na ini den gemeente, èn sani di den gemeente abi fanowdu. A skoro disi e hori ibri leisi, baka wan tu yari. A Tiri Skin e bosroiti o ten a o hori.
O langa a e hori: Na ini den lasti yari di pasa, a skoro disi hori tu dei noso tu nanga afu dei gi den kring-opziener nanga distrikt-opziener, wán nanga afu dei gi den owruman, èn wán dei gi den dinari ini a diniwroko.
Pe a e hori: Nofo tron a e hori na wan Kownukondre zaal noso na wan kongreshal.
Suma kan go: Kring-opziener, distrikt-opziener, owruman nanga dinari ini a diniwroko.
Fa den kan teki prati: Owruman nanga dinari ini a diniwroko e kisi wan kari fu a kring-opziener. Den kring-opziener nanga den distrikt-opziener e kisi wan kari fu a bijkantoro.
„Aladi a skoro disi e gi furu leri na ini wan syatu pisi ten, toku a e gi den owruman deki-ati èn a e den yepi fu tan abi prisiri èn fu ’tyari densrefi leki mansma’ na ini a diniwroko fu Yehovah. Brada di de owruman fu wan syatu ten noso fu wan langa ten, e leri fu de bun skapuman èn fu ’de wán na ini a fasi fa den e denki èn e prakseri.’”—Quinn (na tapu a fowtow na ondrosei).
„Na a skoro wi kisi moi leri di abi fu du nanga a bribi fu wi, wi kisi prenspari warskow, èn wi kisi bun rai fu yepi wi sorgu den skapu moro bun. A yepi di wi kisi e sori krin taki Yehovah abi bun-ati trutru.”—Michael.
Pionierskoro
Fu san ede a e hori: Fu yepi den pionier fu ’du den wroko finifini’.—2 Tim. 4:5.
O langa a e hori: Tu wiki.
Pe a e hori: A bijkantoro e taki pe a e hori. Nofo tron a e hori na wan Kownukondre zaal.
Suma kan go: Den wan di de gewoon pionier wán yari noso moro langa.
Fa den kan teki prati: Te den pionier kisi wan kari fu go, a kring-opziener o taigi den dati.
Lily, na tapu a fowtow na a reti-anusei, taki: „A skoro yepi mi furu nanga den problema di mi e kisi na ini a preikiwroko èn na ini mi libi”, na so. A fasi fa mi e studeri, fa mi e gi leri èn fa mi e gebroiki Bijbel kon moro bun. Now mi kan yepi trawan moro bun, mi e horibaka moro bun gi den owruman, èn mi kan du moro tu fu meki a gemeente gro.”
Brenda di go na a skoro disi tu leisi kaba, taki: „A skoro yepi mi fu poti ala prakseri na a diniwroko fu mi, a meki mi konsensi wroko moro bun, èn a yepi mi fu poti moro prakseri na trawan. A krin taki Yehovah lobi fu gi sani!”
Skoro gi gemeente owruman
Fu san ede a e hori: Fu yepi den owruman fu tyari den frantwortu fu den na ini a gemeente èn fu yepi den frustan moro bun san den musu du na ini na anbegi fu Yehovah.
O langa a e hori: Feifi dei.
Pe a e hori: A bijkantoro e taki pe a e hori. Nofo tron a e hori na wan Kownukondre zaal noso na wan kongreshal.
Suma kan go: Owruman.
Fa den kan teki prati: Den owruman e kisi wan kari fu a bijkantoro.
Luku san son owruman di go na a di fu 92 klas na ini Amerkankondre taki:
„A skoro yepi mi furu. A yepi mi fu luku mi eigi libi èn a yepi mi fu si fa mi musu sorgu den skapu fu Yehovah.”
„Now mi de fayafaya fu gi ala sma deki-ati nanga yepi fu den moi Bijbel leri di mi kisi na a skoro.”
„A leri di mi kisi, mi o gebroiki mi heri libi langa.”
Skoro gi kring-opziener èn distrikt-opziener nanga den wefi fu den
Fu san ede a e hori: Fu leri den kring-opziener nanga den distrikt-opziener fa fu yepi den gemeente moro bun, aladi den e „wroko tranga fu taki fu a wortu fu Gado èn fu leri sma a wortu dati”.—1 Tim. 5:17; 1 Petr. 5:2, 3.
O langa a e hori: Tu mun.
Pe a e hori: A bijkantoro e taki pe a e hori.
Suma kan go: A brada musu de wan kring-opziener noso wan distrikt-opziener.
Fa den kan teki prati: Kring-opziener nanga distrikt-opziener makandra nanga den wefi fu den e kisi wan kari fu a bijkantoro.
„Wi kon frustan moro bun fa Yesus e tiri na organisâsi. Wi kon si o prenspari a de fu gi wi Kresten brada nanga sisa deki-ati èn fu yepi den gemeente fu abi wánfasi. A skoro yepi wi fu si taki wan kring-opziener noso wan distrikt-opziener kan gi rai èn son leisi piri-ai. Ma a moro prenspari sani di a musu du, na fu yepi den brada nanga sisa frustan taki Yehovah lobi den.”—Joel fu a fosi klas na ini 1999.
Bijbelskoro gi brada di no trow
Fu san ede a e hori: Fu sreka owruman nanga dinari ini a diniwroko di no trow, fu tyari moro frantwortu na ini Yehovah en organisâsi. Furu fu den brada di klari a skoro o go yepi na ini den eigi kondre pe dati de fanowdu. Ma den kan seni sonwan fu den tu fu go yepi na ini wan tra kondre, efu den de klariklari fu du dati. Den o poti sonwan fu den brada disi leki spesrutu pionier fu wan pisi ten, so taki den kan yepi nanga a preikiwroko na farawe presi èn na presi pe furu sma no e tan. A kan tu taki den seni den fu bigin a preikiwroko na den sortu presi dati.
O langa a e hori: Tu mun.
Pe a e hori: A bijkantoro e taki pe a e hori. Nofo tron a e hori na wan Kownukondre zaal noso na wan kongreshal.
Suma kan go: Brada di no trow, di no yongu moro 23 yari èn di no owru moro leki 62 yari. Den musu de gosontu èn den musu wani dini pe yepi de fanowdu (Mark. 10:29, 30). Den musu de gewoon pionier tu yari kaba noso moro langa. Den musu dini leki owruman noso dinari ini a diniwroko tu yari baka makandra noso moro langa.
Fa yu kan teki prati: Na den kring konmakandra den e hori wan konmakandra fu fruteri den wan di wani go, wan tu sani fu a skoro disi.
„A skoro disi meki taki a yeye fu Yehovah wroko moro bun na mi tapu èn mi kenki furu”, na so Rick taki baka di a go na a di fu 23 klas na ini Amerkankondre. „Te Yehovah gi yu wan wroko, a e yepi yu fu du a wroko bun. Mi leri taki Gado o gi mi krakti efu mi poti prakseri na a wani fu en, na presi fu poti prakseri na misrefi nomo.”
„Mi kon frustan taki a fasi fa Gado en organisâsi e wroko na ini a ten disi na wan wondru”, na so Andreas di e dini na Doisrikondre taki. „A leri di mi kisi sreka mi gi a wroko di mi ben o du. Boiti dati, mi leri wan prenspari sani fu den Bijbel eksempre di wi ben taki fu den. Mi leri taki wi o de koloku trutru te wi e dini Yehovah èn te wi e yepi den brada nanga sisa fu wi.”
Bijbelskoro gi Kresten trowpaar
Fu san ede a e hori: A skoro disi e gi trowpaar spesrutu leri, so taki Yehovah nanga na organisâsi fu en kan gebroiki den moro bun. Furu fu den trowpaar di klari a skoro o go yepi na ini den eigi kondre pe dati de fanowdu. Ma den kan seni sonwan fu den fu go yepi na ini wan tra kondre tu, efu den de klariklari fu du dati. Den o poti sonwan fu den trowpaar disi leki spesrutu pionier fu wan pisi ten, so taki den kan yepi nanga a preikiwroko na farawe presi èn na presi pe furu sma no e tan. A kan tu taki den seni den fu bigin a preikiwroko na den sortu presi dati.
O langa a e hori: Tu mun.
Pe a e hori: A skoro disi e hori na Amerkankondre. Bigin nanga september 2012, wan tu tra bijkantoro na heri grontapu kisi a frantwortu tu fu hori a skoro disi na ini a kondre fu den. Nofo tron a e hori na ini wan Kownukondre zaal noso na wan kongreshal.
Suma kan go: Trowpaar di no yongu moro 25 yari èn di no owru moro leki 50 yari. Den musu de gosontu èn den musu man dini na iniwan presi pe yepi de fanowdu. Den musu abi a srefi denki leki Yesaya di ben taki: „Dya mi de! Seni mi” (Yes. 6:8). Den musu trow tu yari kaba noso moro langa. Den musu du furuten diniwroko tu yari baka makandra noso moro langa. Sosrefi, a masra musu de wan owruman noso wan dinari ini a diniwroko tu yari baka makandra noso moro langa.
Fa unu kan teki prati: Na den distrikt kongres den e hori wan konmakandra fu fruteri den wan di wani go, wan tu sani fu a skoro disi. Efu den no e hori a konmakandra disi na den distrikt kongres na ini a kondre fu unu, ma unu wani go na a skoro disi, dan unu kan skrifi wan brifi go na a bijkantoro na ini un kondre fu kon sabi moro.
„Disi na wan heri moi okasi gi iniwan trowpaar di wani du moro gi Yehovah. Den aiti wiki te a skoro e hori e kenki yu libi trutru! Now wi de seiker taki wi wani tan libi na so wan fasi taki wi man gebroiki wi ten na wan koni fasi.”—Eric nanga Corina di go na a fosi klas na ini 2011 (luku a fowtow na ondrosei).
Waktitoren Bijbelskoro Gilead
Fu san ede a e hori: Den sma di e go na a skoro disi e kisi leri fu go preiki leki zendeling na presi pe furu sma e libi, fu wroko leki kring-opziener noso distrikt-opziener, noso fu wroko na Betel. Den e seni den sma disi fu seti a preikiwroko na wan presi noso fu yepi na ini a preikiwroko. Den kan seni den tu fu yepi nanga a wroko na den bijkantoro noso fu orga a wroko drape.
O langa a e hori: Feifi mun.
Pe a e hori: Na a Waktitoren Skoro Centrum na ini Patterson, New York, na Amerkankondre.
Suma kan go: Trowpaar di e du furuten diniwroko. Kande den e wroko leki zendeling di no go na a skoro disi ete, kande den de spesrutu pionier, kande den brada na kring-opziener noso distrikt-opziener, noso kande den e wroko na Betel. Den ala tu musu du furuten diniwroko dri yari baka makandra noso moro langa. Den musu man taki, leisi, èn skrifi Ingrisitongo bun.
Fa unu kan teki prati: A Bijkantoro Komte kan gi trowpaar wan kari fu go na a skoro disi.
Lade nanga Monique na wan trowpaar fu Amerkankondre di e dini now na Afrika. Lade taki: „A Gileadskoro sreka wi fu go wroko na iniwan presi na grontapu makandra nanga wi lobi brada nanga sisa.”
Monique taki: „Fu di mi e du san mi leri fu Gado Wortu, meki mi e prisiri trutru nanga a wroko di mi e du. A prisiri disi e meki mi si krin taki Yehovah lobi mi.”
Skoro gi brada fu Bijkantoro Komte nanga den wefi fu den
Fu san ede a e hori: A skoro disi e yepi den brada fu a Bijkantoro Komte fu teki fesi moro bun na den Betel-oso, fu poti prakseri na sani di abi fu du nanga a preikiwroko fu den gemeente, èn fu luku a wroko fu den kring-opziener nanga distrikt-opziener. Den e leri sani tu di abi fu du nanga vertaal-wroko, sani di abi fu du nanga a wroko fu meki buku èn sani di abi fu du nanga a wroko fu seni den buku go na den gemeente.
O langa a e hori: Tu mun.
Pe a e hori: Na a Waktitoren Skoro Centrum na ini Patterson, New York, na Amerkankondre.
Suma kan go: A brada musu de wan memre fu wan Bijkantoro Komte noso fu wan Kondre Komte, noso a musu de wan sma di kisi so wan frantwortu.
Fa den kan teki prati: A Tiri Skin e gi den brada nanga den wefi fu den wan kari fu go na a skoro disi.
Lowell nanga Cara di go na a di fu 25 klas, e dini na Nigeria. Lowell taki: „Den memre wi taki awinsi omeni wi abi fu du noso awinsi sortu wroko wi musu du, efu wi wani plisi Yehovah, wi musu du sani soleki fa en wani. Na a skoro wi leri tu taki Yehovah lobi den futuboi fu en èn disi musu de fu si na ini a fasi fa wi e libi nanga trawan.”
Cara taki: „Wan sani di mi hori na prakseri na disi: Efu mi no man tyari wan pisi tori kon na krin makriki, mi musu go ondrosuku moro fu a tori dati, fosi mi go fruteri sma dati.”