„Krei nanga sma di e krei”

1, 2. Fu san ede a de fanowdu fu luku fa wi kan trowstu den wan di lasi wan sma na ini dede? (Luku a prenki na a bigin fu na artikel.)

„WÁN yari ben pasa kaba baka di a boi fu wi dede, ma toku wi ben e firi sari èn a ben hati wi srefisrefi”, na so Susi ben taki. Wan Kresten brada ben taki dati di en wefi dede wantronso, „en heri skin ben e hati en”. A sari taki furu tra Kresten e ondrofeni den sani disi tu. Kande furu sma na ini a Kresten gemeente no ben fruwakti taki wan lobiwan fu den ben o dede fosi Armagedon kon. Efu yu srefi lasi wan lobiwan na ini dede noso efu yu sabi wan sma di e sari, dan kande yu e aksi yusrefi: ’Fa sma di e sari kan feni trowstu?’

² Kande yu yere sma e taki dati ten e dresi ala soro. Ma disi wani taki dati ten wawan e meki taki wan sma no e sari moro? Wan uma di ben lasi en masra na ini dede ben taki: „Mi feni taki na san yu e du nanga yu ten o yepi yu fu no sari moro.” Iya, neleki fa wan soro di wi abi na wi skin kan dresi baka wan pisi ten te wi e sorgu en bun, na so wi no o sari so furu moro te wi e du sani di e meki wi firi bun baka. Ma san kan yepi sma fu no sari moro te den lasi wan lobiwan na ini dede?

YEHOVAH, „A GADO FU ALA TROWSTU”

3, 4. Fu san ede wi kan de seiker taki Yehovah e frustan taki wan sma di e sari abi trowstu fanowdu?

³ A no de fu taki dati a moro prenspari sma di kan trowstu wi, na wi lobi-ati hemel Tata, Yehovah. (Leisi 2 Korentesma 1:3, 4.) Yehovah, di e firi gi wi moro leki iniwan sma, ben pramisi a pipel fu en: „Mi srefi o trowstu unu.”​—Yes. 51:12; Ps. 119:50, 52, 76.

⁴ Wi Tata di abi furu sari-ati, ben lasi lobiwan fu en tu na ini dede. Wan tu fu den na Abraham, Isak, Yakob, Moses, nanga Kownu David (Num. 12:6-8; Mat. 22:31, 32; Tori 13:22). Gado Wortu e gi wi a dyaranti taki Yehovah e angri gi a ten te a o gi den libi baka (Yob 14:14, 15). Den o de koloku èn den o abi wan bun gosontu. Prakseri tu taki Gado en lobi Manpikin di „ben e gi en bigi prisiri”, dede na wan ogri-ati fasi (Odo 8:22, 30). Wi no man frustan srefisrefi fa a ben musu hati Yehovah fu si fa a Manpikin fu en pina.​—Yoh. 5:20; 10:17.

5, 6. Fa Yehovah e trowstu wi?

⁵ Wi kan abi ala frutrow taki Yehovah o du wan sani fu trowstu wi. Dati meki wi no musu frede fu taigi en na ini begi fa wi e firi. A de wan trowstu trutru fu sabi taki Yehovah e frustan fa wi e sari èn taki a e gi wi a trowstu di wi abi tranga fanowdu! Ma fa a e du dati?

⁶ Wán fasi fa Gado e yepi wi, na taki a e meki wi „kisi krakti fu a santa yeye” (Tori 9:31). Gado en santa yeye na wan bigi krakti di e trowstu wi. Yesus ben pramisi taki a Tata na hemel ben o de klariklari fu „gi santa yeye na den sma di e aksi en” (Luk. 11:13). Susi di wi ben kari kaba ben taki: „Someni leisi wi saka tapu wi kindi èn wi begi Yehovah fu trowstu wi. Ibri leisi a freide fu Gado ben kibri wi ati nanga wi frustan.”​—Leisi Filipisma 4:6, 7.

YESUS, WAN GRANPRIESTER DI E FIRI GI WI

7, 8. Fu san ede wi kan abi a frutrow taki Yesus o trowstu wi?

⁷ Den sani di Yehovah en lobi-ati Manpikin Yesus ben du èn ben taki di a ben de na grontapu, e sori krin taki Yehovah e firi gi wi (Yoh. 5:19). Gado seni Yesus kon na grontapu fu trowstu „den wan di e firi brokosaka”, sosrefi „ala den sma di e sari” (Yes. 61:1, 2; Luk. 4:17-21). Dati meki sma ben sabi en leki wan man di ben frustan heri bun fa sma ben e pina èn di ben e angri fu tyari wan kaba kon na a pina dati.​—Hebr. 2:17.

⁸ A no de fu taki dati di Yesus ben de wan yongu boi, famiriman fu en nanga sma di a ben sabi kon dede tu. Soleki fa a sori, dan Yesus en kweki papa Yosef, dede di Yesus ben yongu ete.a Prakseri fa a ben muilek gi so wan yongu boi di ben e broko en ede nanga sma. Boiti taki en srefi ben e sari, a ben e si tu fa en mama, en brada, nanga den sisa fu en ben e sari.

9. Di Lasarus dede, dan fa Yesus sori taki a ben e firi gi trawan?

⁹ Di Yesus bigin nanga a diniwroko fu en, a ben man frustan libisma heri bun èn a ben e firi gi den. Luku fu eksempre di en lobi mati Lasarus dede. Yesus ben sabi taki a ben o gi Lasarus wan opobaka, toku a ben e firi gi Maria nanga Marta di ben e sari srefisrefi. A ben sari den so te taki a bigin krei srefi.​—Yoh. 11:33-36.

10. Fu san ede wi kan de seiker taki Yesus e firi gi wi na ini a ten disi?

¹⁰ Te wi e luku fa Yesus ben e firi gi trawan èn fa a trowstu den, dan fa dati e yepi wi na ini a ten disi? Bijbel e gi wi a dyaranti taki „esde, tide èn fu ala ten Yesus Krestes na a srefi” (Hebr. 13:8). Fu di „a Moro Prenspari Fesiman di e gi libi” e frustan fa a de fu firi sari, meki ’a man yepi den sma di e kisi tesi’ (Tori 3:15; Hebr. 2:10, 18). Dati meki wi kan abi a frutrow taki na ini a ten disi, Krestes e firi tu gi den wan di e sari, a e frustan fa den e firi èn a e trowstu den „na a yoisti ten”.​—Leisi Hebrewsma 4:15, 16.

„TROWSTU FU GADO BUKU”

11. Sortu Bijbeltekst na wan bigi trowstu gi yu?

¹¹ A Bijbel tori di e sori fa Yesus ben e sari srefisrefi di Lasarus dede, na wan fu den someni tori na ini Gado Wortu di e gi wi trowstu. A sani disi no e fruwondru wi „bika ala sani di sma skrifi fositen, ben skrifi fu leri wi wan sani. Disi e yepi wi fu horidoro èn fu kisi trowstu fu Gado Buku, so taki wi kan abi howpu” (Rom. 15:4). Efu yu e sari, yu kan feni trowstu tu fu den Bijbeltekst disi:

• „Yehovah de krosibei fu den sma di lasi-ati. A e frulusu den wan di brokosaka.”​—Ps. 34:18, 19.

• „Di den prakseri fu mi di ben e trobi mi, ben kon hebi gi mi, dan na yu [Yehovah] ben e trowstu mi, so taki mi ben man prisiri baka.”​—Ps. 94:19.

• „Wi Masra Yesus Krestes srefi nanga Gado wi Tata, ben lobi wi èn den gi wi trowstu fu ala ten. Den e meki taki wi kon abi wan moi howpu tu fu di den sori wi bun-ati. Sobun, meki den trowstu unu. Meki den gi unu deki-ati.”​—2 Tes. 2:16, 17.b

WI E FENI FURU TROWSTU NA INI A GEMEENTE

12. San na wan prenspari fasi fa wi kan de wan trowstu gi trawan?

¹² Den wan di e sari kan feni trowstu na ini a Kresten gemeente tu. (Leisi 1 Tesalonikasma 5:11.) Fa yu kan tranga èn trowstu ’sma di e sari’? (Odo 17:22) Hori na prakseri taki „wan ten de fu tan tiri èn wan ten de fu taki” (Preik. 3:7). Dalene, wan uma di en masra dede, e taki: „Sma di lasi wan lobiwan na ini dede, musu man taki san den e denki èn fa den e firi. Dati meki a moro prenspari sani di yu kan du gi so wan sma, na fu arki en, sondro fu koti en mofo.” A brada fu Junia kiri ensrefi. Junia e taki: „Awansi yu no man frustan krin fa den e firi, san prenspari, na taki yu wani frustan fa den e firi.”

13. San wi musu hori na prakseri te wan sma e sari?

¹³ No frigiti tu taki a no ala sma e sari a srefi. Son leisi na a sma wawan sabi fa a e sari èn kande a muilek gi en fu taki fa a e firi dipi na ini en ati. Gado Wortu e taki: „Na ati wawan sabi fa wan sma e sari èn tra sma no man firi a prisiri fu en” (Odo 14:10). Awansi wan sma e taki fa a e firi, toku a no makriki gi trawan fu frustan san a e pruberi fu taigi den.

14. San wi kan taki fu trowstu wan sma di lasi wan lobiwan na ini dede?

¹⁴ A no ala ten wi sabi san fu taigi wan sma di e sari srefisrefi. Toku Bijbel e taki dati „a tongo fu den koniwan na dresi” (Odo 12:18). Furu sma ben man gebroiki den sani di skrifi na ini a brochure Wanneer iemand die u dierbaar is, sterft, fu trowstu trawan.c Furu tron a de so taki a moro bun sani di yu kan du na fu „krei nanga sma di e krei” (Rom. 12:15). Gaby e taki dati baka di en masra dede, dan son leisi na soso krei a ben man krei. A e taki moro fara: „Dati meki a de wan trowstu gi mi te den mati fu mi e krei nanga mi. Dan mi no e firi leki na mi wawan e sari.”

15. Fa wi kan trowstu trawan te a muilek gi wi fu go taki nanga den? (Luku sosrefi a faki di nen „Wortu di kan trowstu sma”.)

¹⁵ Efu a muilek gi yu fu go na wan sma fu trowstu en, dan kande a moro makriki fu seni wan karta, wan e-mail, wan sms, noso wan brifi gi en. Son leisi a nofo fu skrifi wan Bijbeltekst di kan trowstu a sma. Wi kan taki tu fu wan tu moi sani fu a dedesma, noso fu wan tu fasi fu en di wi no o frigiti. Kande wi kan fruteri wan prisiri tori fu a sma dati. Junia e taki: „Te wan sma e skrifi wan syatu boskopu fu gi yu deki-ati noso te brada nanga sisa kari yu fu abi demakandra nanga den, dan dati e yepi furu. Den sani disi e meki mi firi taki sma de di lobi mi èn di e broko den ede nanga mi.”

16. San na wan bun fasi fu trowstu trawan?

¹⁶ No frigiti taki te wi e begi gi wi brada nanga sisa di lasi wan lobiwan na ini dede, noso te wi e begi nanga den, dan dati kan yepi tu. Awinsi a muilek fu begi nanga den fu di wi wani krei, noso fu di wi sten e beifi, toku a o de wan trowstu gi den te wi e begi nanga wi heri ati. Dalene e taki: „Son leisi te den sisa ben e kon trowstu mi, mi ben e aksi den efu den ben wani begi nanga mi. Na a bigin fu a begi fu den a sten fu den ben e beifi son tron, ma ibri leisi baka mi ben kan yere fa safrisafri a sten fu den ben e kon moro krakti te den ben e tan begi komoto fu den ati. A tranga bribi fu den, a lobi fu den, nanga a fasi fa den ben e broko den ede nanga mi, gi mi furu deki-ati.”

TAN TROWSTU TRAWAN

17-19. Fu san ede wi musu tan du muiti fu trowstu den sma di lasi wan lobiwan na ini dede?

¹⁷ A no ala sma e sari na a srefi fasi. Te wan sma lasi wan lobiwan na ini dede, dan na a bigin furu mati nanga famiriman de na en sei fu trowstu en. Ma bakaten, sma e go doro nanga den libi, aladi a sma di e sari abi trowstu fanowdu ete. Sobun, de klariklari fu yepi a sma na a ten dati. „Wan trutru mati e sori lobi ala ten. En na wan brada di gebore fu te nowtu de” (Odo 17:17). Kresten brada nanga sisa kan de wan bigi trowstu gi wan sma awinsi o langa a sma disi e sari fu di a lasi wan lobiwan.​—Leisi 1 Tesalonikasma 3:7.

¹⁸ Memre taki sani soleki a dei di wan sma ben trow, son poku, fowtow, sani di a sma e du, son smeri, sani di wan sma e yere, noso son spesrutu ten fu a yari, kan meki wan sma firi sari baka, fu di a e prakseri a lobiwan fu en. Now a sma di lasi en trowpatna o abi fu du son sani en wawan. Dati meki a kan hebi gi en a fosi leisi te en wawan musu go na wan bigi konmakandra noso na a Memrefesa. Wan brada e fruteri: „Mi ben sabi taki a ben o hebi gi mi tapu a dei di wi ben trow èn trutru a no ben makriki. Ma wan tu brada nanga sisa ben kari wan tu bun mati fu mi kon so taki mi no ben o de mi wawan.”

¹⁹ Hori na prakseri taki a no soso na spesrutu okasi den sma disi abi deki-ati fanowdu. Junia e taki: „Nofo tron a bun te wan mati e yepi yu nanga wan sani awinsi a no de na wan spesrutu dei te yu e memre wan prenspari sani. A de wan bigi trowstu te den e du dati.” A tru taki wi no man puru ala a pen di wan sma e firi èn wi no kan teki a presi fu a sma di a lasi. Ma wi kan trowstu den te wi e yepi den nanga sani di den abi fanowdu (1 Yoh. 3:18). Gaby e memre: „Mi e taki Yehovah tangi gi den lobi-ati owruman di yepi mi fu pasa a muilek ten disi. A ben de neleki Yehovah ben e brasa mi hori.”

20. Fu san ede den pramisi fu Yehovah e trowstu wi?

²⁰ A switi srefisrefi fu sabi taki Yehovah, a Gado fu ala trowstu o meki taki sma no sari moro te ’ala den sma di de na ini den grebi o yere [Krestes] sten èn o komopo drape’ (Yoh. 5:28, 29). Bijbel e pramisi wi taki „a Moro Hei Masra Yehovah o swari dede fu têgo èn a o figi den watra-ai fu ala sma puru na den fesi” (Yes. 25:8). Na a ten dati wi no o abi fu „krei nanga sma di e krei”. Na presi fu dati ala sma na grontapu o „prisiri nanga sma di e prisiri”.​—Rom. 12:15.