Pina na wan strafu fu gado?

LUZIA MALENGRI NA EN KRUKTUSEI FUTU. Di a ben pikin, dan a kisi polio, wan siki di sma kan kisi makriki fu trawan èn di e pori den senwe-titei na ini a skin. Di a ben abi 16 yari, dan na uma di Luzia ben e wroko gi, taigi en: „Gado strafu yu nanga a siki disi fu di yu ben trangayesi èn fu di yu no sori lespeki gi yu mama.” Furu yari baka dati, Luzia e memre ete fa a sani dati ben broko en saka.

DI DAMARIS KON SABI TAKI A BEN ABI KANKER NA EN EDETONTON, dan en papa aksi en: „San yu du taki a sani disi pasa nanga yu? A musu de taki yu du wan ogri. Dati meki Gado e strafu yu.” Damaris lasi-ati di en papa taigi a sani dati.

Dusundusun yari kaba sma e bribi taki pina na wan strafu fu Gado. Wan buku e taki dati furu sma na ini a ten fu Krestes ben e bribi taki „wan sma ben e siki fu di en srefi noso wan famiri fu en ben du sondu, èn taki a siki ben de wan strafu gi a sondu dati” (Manners and Customs of Bible Lands). Furu hondro yari baka Krestes, „son sma ben e bribi taki Gado ben e meki rampu pasa fu strafu sma gi den sondu fu den”. Na so a buku Medieval Medicine and the Plague e taki. Sobun, di wan pestsiki kiri milyunmilyun sma na ini Europa sowan 600 yari pasa, dan na Gado ben strafu ogrisma? Noso a de so taki na wan bakterie ben tyari a siki dati kon, soleki fa ondrosukuman kon sabi now? Kande son sma e aksi densrefi: A tru taki Gado e meki sma kon siki fu strafu den gi den sondu fu den?a

PRAKSERI A SANI DISI: Fu san ede Yesus ben o dresi sikisma efu na Gado ben e gebroiki siki nanga pina fu strafu den? A sani dati ben o sori taki Gado no e du san reti, a no so? (Mateyus 4:23, 24) Noiti Yesus ben o gens Gado. Yesus ben taki: „Ala ten mi e du san e plisi en”, èn „mi e du san a Tata taigi mi fu du.”​—Yohanes 8:29; 14:31.

Bijbel e taki krin taki Yehovah Gado „no e du kruktudu” (Deuteronomium 32:4). Fu eksempre, noiti Gado ben o meki wan opolani fadon fu meki hondrohondro sma lasi den libi, soso fu di a ben wan strafu wán sma nomo na ini na opolani dati! Fu di Gado lobi retidu, meki Abraham, wan reti-ati futuboi fu Gado taki dati noiti Gado ben o „kiri den reti-ati sma makandra nanga den ogriwan”. A taki dati Gado ’noiti ben o du so wan sani’ (Genesis 18:23, 25). Bijbel e taki tu dati „Gado no e du ogri”. A no e du „kruktu sani”.​—Yob 34:10-12.

BIJBEL E LERI WI FU SAN EDE WI E PINA

Te wi e pina, dan a no Gado e strafu wi gi wan sondu di wi du. Yesus srefi ben sori disi krin di en nanga den disipel fu en si wan man di ben breni sensi a gebore. Bijbel e taki: „Den disipel fu en aksi en: ’Leriman, efu a man disi breni sensi di a gebore, dan suma sondu? Na a man disi srefi, noso na en papa nanga mama?’ Yesus piki den: ’A no den sondu fu a man disi noso fu en papa nanga en mama meki a breni.’”​—Yohanes 9:1-3.

Na ini a ten dati, sma ben abi wan fowtu denki fu a tori disi. Dati meki den disipel fu Yesus ben musu fu fruwondru di a fruteri den taki a man no ben e pina fu di en srefi noso en papa nanga mama ben du wan sondu. Yesus dresi a breniman so taki a ben man si baka, èn a sani di a du meki sma kon si taki a no tru taki Gado e gebroiki siki fu strafu sma (Yohanes 9:6, 7). Na ini a ten disi, sma di e siki seryusu kan feni trowstu te den sabi taki a no Gado meki taki den siki.

Gado Wortu e taigi wi:

• „Nowan sma kan tesi Gado nanga ogri sani èn Gado srefi no e tesi sma tu” (YAKOBUS 1:13). A tru taki „ogri sani” soleki siki, pina, nanga dede e miti libisma hondrohondro yari kaba, ma heri esi den o kon na wan kaba.

• Yesus Krestes „ben meki ala siki sma kon betre” (MATEYUS 8:16). Di a Manpikin fu Gado dresi ala den sikiwan di ben kon na en, dan na so a sori san Gado Kownukondre o du na heri grontapu.

• „[Gado] o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”​—OPENBARING 21:3-5.

SUMA ABI A FOWTU?

Ma fu san ede pina lai na grontapu? Libisma e aksi densrefi a sani dati hondrohondro yari kaba. Efu a no Gado abi a fowtu, dan suma abi en? Wi o kisi piki tapu den aksi dati na ini a tra artikel.