Sani di seti gi na districtskongres 1986

Gado leri e meki vréde kon. Den wortoe foe na proféti Jesaja, nanga di santa jeje ben wroko tapoe en, ben sori tranga a tapoe ini a tori foe den agersi manpikin foe Gado en agersi wefi ofoe hemel organisaatsi di a ben taki: „Èn ala oen manpikin sa de sma di Jehovah ben leri den, èn na vréde foe oen manpikin sa kon de bigi” (Jes. 54:13). Foe na ferklari disi e kon na krin taki wan wantewante kroederi de a mindri gado leri nanga vréde. Boiti dati, na apostel Paulus ben ferklari ini en brifi gi den Filippisma: „Na vréde foe Gado, di de moro hé leki iniwan tra prakseri, sa kibri joe ati nanga joe jeje krakti nanga jepi foe Kristus Jezus” (Fil. 4:7). Foedi den sma di e teki èn poti na ini den libi sowan sortoe leri foe Gado, nanga wan jeje di de klarklari e kisi èn e njan boen foe na „Vréde disi foe Gado”, meki wi abi na overtoigi dati oenoe abi na lostoe foe de tapoe na „Gado Vréde”-kongres di sa orga ini 1986 gi Sranan. Disi troetroe sa aksi boen moeiti foe na sé foe oenoe. Ini en fosi brifi gi den fosten kristen na apostel Petrus ben skrifi taki den ben moesoe „soekoe vréde èn feti baka en” (1 Petr. 3:11). Den paiman sa de troetroe moro warti leki den moeiti di wi sa doe foe de drape.

DE ALA DEN FO DÉ DRAPE: Ini Psalm 119:33 na skrifiman ben begi: „Leri mi, o Jehovah, ini a pasi foe joe wet, sodati mi kan kibri disi te na kaba.” Den wortoe disi troetroe e tjari den firi foe ala den dienstknekti foe Jehovah di e wroko tranga kon a doro. „Na getrow èn koni srafoe” ben seti fo dé tapoe san den „ordroe” foe Jehovah sa taki èn demonstreer. Joe sa tan sidon arki nanga ala prakseri te ala programmapisi o hori, foe bigin na biginsingi nanga biginbegi tapoe fodewroko mamanten te na kriboibegi tapoe sondeneti. Nowan sma sa wani foe misi wan sani foe na programma, a no so! A no boo de wan boen sani foe kisi a prakseri taki wan spesroetoe dé ofoe srefi wan pisi foe wan dé de moro mendri prenspari leki na tra pisi. Ala den fo dé makandra wi moesoe si den leki wan eri jeje njanjantafra di de fanowdoe alamala foe wi jeje gesontoe nanga gro.

Foeroe sma sa moe tjari kenki kon ini den ala wiki schema foe kan de drape tapoe na heri kongres. Disi wani taki dati joe moesoe aksi fri foe joe grontapoewroko noso teki fakansidé. Ooktoe brada nanga sisa di e libi ini osofamiri di prati na bribisé, moesoe doe foeroe nanga bigi moeiti foe no abi foe misi nowan dé. Boen owroe brada nanga sisa èn malengriwan sa abi na spesroetoe prakseri foe na skin foe owroeman, sodati den toe kan njanboen someni leki a kan foe na goedoe jeje fesa.

Foeroe sma sa moesoe foe tjari ofrandi èn meki moeiti foe kan kon tapoe wan districtscongres. Den moesoe meki boen foeroe moeiti sodati wan sma ini na osofamiri no misi noti foe na programma. A de wan sani di wi kan ferstan dati omstandigheden de di sa meki taki wawan sma so na sa man foe de drape ala fo dé, ma ini den sortoe okasi dati a ben sa de wan lobifasi foe doe efoe sonwan foe wi ben sa prati den moro prenspari punt nanga den.

Ete wantron wi wani sori tranga a tapoe foe no misi no wan pisi foe na kongres. Sma na ini na gemeente di abi spesroetoe moeilekheid foe fisiti fo dé baka makandra wan kongres sa kisi ekstra jepi nanga prakseri foe meki ala sani so koemakriki èn switi leki a kan gi den. Sondro degedege a sori foe lobi disi sa jepi soleki a no kan trafasi dati den kan de drape someni leki a kan. A sa de na winsi foe ibriwan sma foe kan de tapoe na „Gado-vréde”-districtkongres, a no kan tra fasi toe foe na spesroetoe fasi di a kongres disi sa abi. Na kongresorganisaatsi e meki boen foeroe moeiti foe meki a switi gi ibriwan sma so meni leki a kan.

ARKI NANGA ALA PRAKSERI E TJARI BLESI KON: Ini Jesaja 55:2 Jehovah ben komanderi Israël: „Arki nanga ala prakseri na mi”. Na „nanga ala prakseri”, joe e denki na prakseri di span. Israël ben abi réde foe arki boen nanga ala prakseri, bikasi Jehovah ben taki wan boskopoe foe fri gi den di ben de leki njanjan di abi foeroe krakti èn dringi di ben meki den firi switi. A boskopoe di Jehovah abi now gi en pipel, no de moro mendri ini warti. Efoe joe loekoe en fini a abi moro warti bikasi a abi foe doe nanga tégo libi. Soema no wani ferstan Jehovah prakseri nanga libisma? Efoe wi e kaka wi jesi, wi sa ’arki nanga wi heri ati èn teki moro leri ini wi’ (Odo 1:5). Na arki èn leri tapoe wan districtkongres gewoonlek ai teki moro moeiti nanga krakti foe poti jesi leki ini wan Kownoekondrezaal. Na sidon e teki moro ten èn moro sani de foe poeroe joe prakseri. San wi kan doe na dati?

Wi moesoe tan hori na prakseri nanga sortoe marki wi e fisiti na kongres. Nanga na troe tori ini prakseri taki ibriwan sma di de drape tokoe ben abi foe tjari foeroe ofrandi na na sé foe ten nanga moni, a no boo de wan ferstandiki sani foe gebroiki na okasi krinkrin? Sondro degedege! A no ben sa de wan ferstandiki sani foe kon froekoe, seti ala sani san joe moesoe doe soleki a bai foe kongresbon nanga boekoe èn dan go sidon tapoe joe presi efoe na programma e bigin? Dan joe no sa de ini djoegoedjoegoe èn joe geest no sa span nanga sani di no abi noti foe doe nanga na programma. Noti no de di de moro boen toe leki wan boen neti sribi. Wan kongres de wan heri mi okasi foe meki owroe matifasi kon njoen baka, ma efoe wi e teki na bosroiti foe doe disi foe di te lati neti wi e go fisiti sma ete, wi ben sa kan de krin foe ferstan nofo foe kan arki ’nanga wi heri ati’? Kande wi moe feti foe wi ai no fadon tapoe. Wan boen neti sribi sa meki en moro koemakriki gi foe wi kan poti boen prakseri na san e taki. Wegi te joe e arki den bodoi di joe e kisi. Gersi den ini joe geest nanga san joe sabi kaba. Na meki foe sjatoe aantekening sa jepi toe, bikasi efoe joe e proberi foe skrifi toemsi, joe kan misi prenspari punt.

Papa nanga mama nanga pikinnengre tanapoe a fesi wan ekstra tjalansi foe poti den prakseri na tapoe wan boenfasi. Gi den pikinwan gewoonlek a de wan moro moeilek sani foe tan sidon pi foe wantoe joeroe. A no de trafasi den abi moro libi ini den skin. Na bakapisi de dati den papa nanga mama èn sontron den sma di de lontoe den, den prakseri e komoto foe san e taki. Èn tokoe sma ben si taki pikinnengre di no e go srefi ete na skoro, foe na moro bigi pisi foe a ten den e sidon safri te na programma e hori. Fa dati doe kon? Sondro degedege a de wan afersi foe joisti leri na oso èn na ini na Kownoekondrezaal. Papa nanga mama di abi dipi respeki gi na jeje njanjan di e komoto foe na podium, sa doe ala moeiti di den kan foe leri ooktoe den pikin foe den a lespeki èn warderi disi. Den kan leri den pikin foe sidon pi na oso èn na den gemeente komakandra èn no foe go foe soso na na WC. Na boen leri disi sa gi boen froktoe foe di soboen papa nanga mama leki den pikin e njan boen foe na programma. Na foe nature sjatoe pisi ten di den pikin kan arki nanga prakseri, kan kon moro langa efoe papa nanga mama e gi den pikin foe den na rai foe skrifi den bijbeltekst tapoe wan papira presi foe den sidon teken. A no kan tra fasi taki a sa psa taki papa nanga mama moesoe libi den sidonpresi foe teki wan pikinnengre go na WC ofoe foe gi tranga leri. Tangitangi doe disi so safri leki a kan.

KRISTEN MANIRI, WAN MARKI FOE LOBI: Dorosé sma ben gafa na boen maniri èn den boenfasi foe tjari densrefi foe Jehovah Kotoigi, spesroetoe ini a tori foe den bigi kongres. Wan sma di e sorgoe foe wan komakandrapresi foe wan foto ben ferklari: „Nanga na brifi disi mi wani foe oen kon sabi o switi a ben de, foe di Jehovah Kotoigi ben hori den kongres djaso . . . Den ben ferteri mi a fesi kaba o boen orga èn krin na groepoe boo de, èn ala sani di den ben barwroko foe en no ben de lé. Mi no e bribi taki wan ten mi ben wroko nanga wan groepoe sma di ben de klarklari foe jepi wroko na ini ala sani, ini pikin èn ini bigi sani.” Wi boen nen tapoe na kontren foe heri boen kristen maniri ben de gron gi wan edeman foe skoro pe wan moi ipi skoro pikin ben de kotoigi, foe seni wan barwroko papira gi ala méstri foe na skoro nanga na rai foe efoe a de fanowdoe, den boo kenki den laatste eksamendé gi den jongoe kotoigi di ben denki foe fisiti wan foe den froekoe kongres.

Wawan presi de ete pe wi kan tjari wan kenki kon? We, wi e gi dek’ati foe tan prakseri na afersi foe a hori foe presi gi trawan. Na problema disi tokoe e ferdini wi prakseri morofara. Prakseri pikinso fa a e gi brokosaka gi wan sma di e kon spesroetoe froekoe foe feni wan boen presi, e kon foe si taki srefi mamanten froekoe kaba a hebi foe feni wan presi na fes’sé foe di foeroe stoeroe den tapoe den hori, foe di den poti ala sortoe sani a tapoe den. Meki wi tan hori den wortoe foe na njoensoe skrifiman ini Brasionkondre na prakseri, di ben gafa na „lobi nanga wanfasi” foe Jehovah Kotoigi. Den ben taki dati lobi wani taki ooktoe wan volmaakti banti foe sondro-gridifasi. Ooktoe Kristus Jezus ben tjari kon na krin dati sondro gridi lobi boo de wan prenspari sani foe tjari kon a krin soema de en discipel (Johannes 13:35). Na hori foe foeroe sidonpresi gi trawan a no kan trafasi no de wan boen eksempre foe a Gado lobi disi di de a wroko. Prakseri fa disi boo de wan ogri sani efoe son presi di ben kibri no boo gebroiki. A psa srefi dati efoe sontron dienstjepiman ben proberi foe gi wan tra sma a presi dati, den ben toeka nanga pikinso gens. Wi wani aksi joe foe hori disi toe na prakseri tangitangi èn foe wrokomakandra nanga den dienstjepiman, di na kongresorganisaatsi ben gi den wroko foe proberi taki ibriwan sma feni wan sidonpresi èn ooktoe foe sorgoe taki wan situwasi de di e wroko boen foe sma kan kisi leri. Na a fasi dati wi no ben sa waka na baka na gowtoe regel? — Matteus 7:12.

HERI BOEN FASI FOE TJARI WISREFI: Na koniman ben taki. „Gi ala sani wan faste ten de, . . . wan ten foe tan pi èn wan ten foe taki” (Prékiman 3:1, 7). Te na programma e hori a de a ten foe tan pi. Wantoe kongres ben e meki rapport taki foeroe babari ben meki èn taktaki ben de di na programma ben e hori, a no wawan a dorosé ma ooktoe na mindri den arkiman. Son sma e taki tranga nanga den sma di sidon na den sé èn nanga dati den e stoor den sma di de lontoe den èn di e proberi foe arki na programma. Soboen jongoewan leki bigisma e doe disi. Boiti a taktaki nanga makandra dan sontron a e psa toe taki den e langa njan nanga dringi gi mati èn famiri di sidon ini a birti. Sontron den takmakandra nanga na woenjoewoenjoe a dorosé ben kon so tranga dati den sma di sidon na bakasé noso na den doro, ben abi foeroe moeiti foe kan arki na programma. Wan brada ben skrifi. „Wi no ben kan jere foeroe bikasi sma ben e waka lontoe èn ben e taktaki. Wan brada ben sidon na a laatste rij di ben taktaki na heri kongres.” Wan trawan: „A sori taki sonwan no ben teki na rai di ben gi na ini na fesiman-lezing na ati foe no e waka-waka lontoe foe soso èn e taktaki.”

Na apostel Paulus ben skrifi: „Meki ibriwan foe wi no tan soekoe en égi wini, ma di foe na trawan” (1 Korinte 10:24). A sa psa taki pikinnengre kan sekseki pikinso èn dati njoenjoe pikin kan kré foe di wan sani e foega den. Ini akroederi nanga a bijbel gronprakseri foe soekoe a wini foe wan trawan, joe no ben sa sorgoe taki a pikin no hendri den sma di sidon lontoe joe? Dati sa wani taki dati foe wan momenti joe sa moesoe foe libi joe sidonpresi, foe wan sjatoe pisten, ma trawan di e proberi foe arki, sondro degedege sa de joe tangi foe joe fasi foe sori broko-ede gi den.

SANI DI SREKA FOE VELDDIENST: A de wan prisiri sani gi wi foe kan taigi oenoe dati ooktoe a jari disi spesroetoe sani ben sreka gi na velddienst tapoe fréda mamanten, wantewante baka wan sjatoe takmakandra. Bifo joe loesoe kon na a kongres, foe san-ede joe no sa meki séker plan foe teki prati na a diniwroko? A no wawan taki wan heri boen kotoigi sa gi ini na foto foe na kongres, ma joe faja gi na heri programma sa gro efoe joe gi wan pisten na a velddienst. A ben sa de boen efoe joe e go teki gebied wantewante te joe doro na a kongres, presi foe joe wakti te fodewroko neti baka na programma. Ooktoe oenoe moe orga pikin groepoe di e go nanga oto, sodati wi no lasi ten. Den prékiman sa tjari den égi tijdschrift foe gebroiki na ini a veld, foe di tapoe na kongres soso wan pikinso de.

FRI-WANI-DIENST: Den sma di boo man foe gi awinsi na wan pikinso ten na a kongres ini na fri-wani-dienst, wi wani gi wan kari agen foe dati. Ibriwan sma di gi wan pisten èn en koni foe meki na kongres waka boen, abi wan moro bigi firi foe satisfaksi. Srefi efoe joe e kisi na grani foe krin na kongresdjari, joe sa wani foe doe dati nanga joe heri ati, leki wan prenki foe na boen eksempre di Jezus ben gi ini Johannes 13:14-17.

Joe oiti ben prakseri foe doe fri-wani-dienst leki wan osofamiri? A sani disi ben sori foe de wan kefarlek boen prakseri. Na heri osofamiri kan wroko makandra èn srefi den pikin di no de ete 16 jari owroe, kan teki prati toe, wan sani di no boo kan efoe den boo de den wawan.

Netleki fosten den kongresafdeling sa aksi den brada foe den gemeente ini foto foe gi den nen a fesi. Soleki fa a de dan dati no o sari na heri fanowdoe foe fri-wani-wrokoman. Den moro bigi afdeling soleki na dienst foe njanjan nanga krinpresi, nofotron abi moro jepi fanowdoe. Na a fasi dati den sma di abi wan geest foe doe sani nanga den heri ati kan abi wan pikin prati na ini taki na kongres waka boen. Joe kongres-mindriman ini a gemeente sa jere biten sortoe afdeling abi jepi fanowdoe ete èn a sa ferteri na gemeente foe dati.

NJANJAN: Wán sani foe wan district-kongres di wi alaten e warderi, de na di foe njanjan nanga dringi, gewoonlek dati e prati ini na oso pe ooktoe na programma e hori. A no de so taki dati de koemakriki wawan ma a e meki wi e wini a ten toe di a boo teki foe wi go na wan restaurant. Morofara a e gi wi na okasi foe te wi abi pauze wi njan boen foe na demakandra nanga wi brada nanga sisa. Wi no abi warderi gi na tranga wroko foe den brada ini den afdeling foe njanjandienst, nanga san wi e kisi boen njanjan tége, wan boen prijs?

Kongresbon foe bai njanjan nanga dringi de foe kisi. Den bon sa de foe kisi a fesi ini den gemeente. Wi wani gi oen na rai dati joe loekoe omeni bon joe sa abi kande fanowdoe èn bai na fanowdoe aantal foe den fosi toe noso dri dé a fesi. Njanjansani di tan abra na a kaba foe na kongres, sa seri toe. Joe kan gebroiki joe bon foe dati.

Ini a ten disi foe troe wi de a moro blesi pipel na grontapoe. Eri esi wi sa abi na prisiri foe kon agen makandra nanga doesoendoesoen foe wi brada nanga sisa tapoe na districtkongres. Den wortoe foe David ini Psalm 122:1 e tjari den firi foe wi kon a fesi: „Mi ben prisiri di den ben taigi mi: ’Meki wi go na na oso foe Jehovah.’” Meki wi ferstan boen san den kongres disi de — wan foeroe nanga lobi seti foe wi hemel Tata foe tranga wi na ini den laatste dé disi foe na disiten seti foe sani èn foe meki wi krakti. Soema ben sa wani foe prakseri srefi pikinso foe misi wán foe den jeje presenti, di Jehovah abi gi wi na ini en prakseri? Te wi de na ini na congresfoto èn te wi e reis wi no wani foe frigiti noiti taki a boen fasi fa wi e tjari wisrefi wantewante de wroko tapoe na prakseri di sma e abi foe na Gado di wi e anbegi. Na sani di de na ini wi ati, de wi troetroe lobi gi Jehovah èn gi wi brada. Meki a de so taki disi sori taki a de alaten wan „volmaakti banti foe wanfasi”. — Kol. 3:14.

KRINGKOMAKANDRA NA GODOHOLO:

4 nanga 5 april