Go doro nanga wi diniwroko sondro fu stòp
1 Na toneel fu na grontapu disi e kenki esi-esi o moro nanga moro wi e go na ini a ten fu na kba (1 Kor. 7:31). Leki wan kontru fu beybri profeytitori sani e feni presi di e seki grontapu. Te wi e luku den sani di e psa na ini na grontapu di lontu wi èn so srefi na ini na teyokrasiya organisâsi, dan wi kan frustan o tranga fanowdu a de taki wi e preyki „na bun nyunsu” fu na Kownukondre. — Mark. 13:10.
2 A ben de wi Tiriman èn wi Eksenpre, Yeyses Krestes, di ben gi na komando fu meki disipri. Ala di a ben du dati, a ben dyaranti na bun bakapisi fu na wroko dati fu di a pramisi: „Mi de nanga unu ala den dey te na a bosroyti fu na seti fu sani” (Mat. 28:19, 20). Den disipri fu Yeyses ben teki den wortu fu en seryusu, èn srefi di den ben miti hebi gens, dan ’sondro fu stòp den ben tan meki ala dey na bun nyunsu fu na Krestes, Yeyses, bekenti’ (Tori. 5:42). Fa den ben gi wi wan tumusi bun eksenpre!
3 Te wi leysi na Yaribuku 1990, dan wi e si taki Yehovah blesi wi diniwroko fu di a gi gro psa marki na ini nyun disipri. Na ini son kondre na gro di den ben seni rapport fu en go na a bijkantoro, ben bigi srefisrefi. Na gro na heri grontapu ala nanga ala ben psa krinkrin san wan fu wi ben kan prakseri wantu yari psa (Yes. 60:22). Ma fa a de nanga na kontren fu wi gemeente? Èn fa a de nanga wi eygi diniwroko? Wi e prisiri netso fu wi prati na a diniwroko leki fu wi diniwroko makandra nanga wi konpe wrokoman ala presi na grontapu? Wi e tan meki muyti leki aparti sma na ini na diniwroko sondro fu stòp?
NA PRATI DI WI SREFI ABI
4 A de krin srefisrefi taki a no ala kontren e gi froktu a srefi. (Teki gersi Mateyus 13:23.) A de so srefi tru taki son kontren, so leki Ierland nanga Quebec, no so langa psa ete bigin fu gi froktu baka omeni yari fu tranga wroko fu na sey fu fayafaya bedinari. Na ini son kontren furu gensman de, èn na ini tra kontren sma moro furu abi wan mi-no-ke-fasi èn no e du noti na tapu na Kownukondre-boskopu. Na tra presi baka someni wrokoman de na ini na veld taki pikinso kontren de fu wroko. Ma awasi na sortu fu kontren di wi musu wroko na ini, na faya fu wi — noyti no musu kon mendri. Na apostru Paulus ben skrifi : „No meki wi . . . tapu fu du san de tumusi bun, bikasi na a yoysti ten wi sa koti efu wi no kon weri” (Gal. 6:9). Den wortu fu frumane fu en fiti gi ala kresten. Fa wi sa man fu du dati? San sa yepi wi fu go doro nanga wi diniwroko sondro fu stòp?
5 Wi kan tan wroko fayafaya èn meki wi diniwroko abi bun bakapisi, efu wi poti wi frutrow na ini Yehovah èn e frutrow na tapu en krakti fu hori baka gi wi. Hori ala ten na ini prakseri taki Yehovah na a sma di e meki na veld gi froktu (1 Kor. 3:6). Leki wan piki tapu den begi fu wi fu kisi yepi, Yehovah e gi ray, praktis bodoy èn wan nomru fu beybribuku psa marki fu kobroyki gi wi srefi èn fu yepi trawan fu leri sabi en. Wi e nyanbun dorodoro fu den seti disi?
KIBRI WAN YOYSTI YEYEFASI
6 Efu wi abi wan negatief yeyefasi, dan dati kan de wan seryusu gens na a bow fu wan diniwroko di e gi froktu. Efu wi kon abi wan takru prakseri fu den sma fu unu kontren, tapu a gron taki den no du bun a fesi na tapu san wi preyki, dan a yeyefasi dati o sori en srefi na ini a fasi fa wi sten e piki, na wi fesi èn na ini a mankeri fu sreka wi srefi fayafaya na tapu a velddienst. Wi kisi na ordru fu preyki èn fu gi leri, èn den no fruteri wi taki a wroko kon na wan kba. A winsi fu wi fu gi yesi èn saka wi srefi na ondro a tiri fu Gado, musu buweygi wi fu go doro nanga wi diniwroko sondro fu stòp.
7 Na prakseri fu Yehovah na ini na tori fu na warskow fu den gadolowsu sma èn a tyari kon makandra fu disipri sa du, bifosi na kba kon. Nownow wi kan abi prati na ini prisiri fu na diniwroko èn luku go na fesi na den têgo blesi na ondro Gado pipri, efu wi sori wi bribi èn wi lobi fu di wi e go doro nanga wi diniwroko sondro fu stòp.