De nanga joe heri-ati ini a velddienst
Pisi 1: A waarde foe warderi gi Jehovah
1 De nanga joe heri ati ini a diniwroko e kon foe wan dipi warderi gi Jehovah èn gi ala sani di a ben doe gi wi (2 Sam. 22:2, 3). Te wi e poti wisrefi ini a moeilek situwâsi pe na heri grontapoe, di kon de leki wan freimde libisma famiri gi Gado, de na ini, dan disi moesoe boeweigi wi foe doe moeiti ini a dienst (Mat. 9:36; 2 Kor. 5:14, 15). Omoro wi e gi wisrefi foe dini Jehovah èn omoro wi e firi gi sma, omoro wi sa abi reide foe teki, foeroe nanga faja, prati na a velddienst (Mat. 22:37-39). Dan wi diniwroko e kon de wan diri goedoe (2 Kor. 4:7). Ma fa wan sma kan kweki so wan warderi gi na diniwroko?
DEN SROTO FOE KAN BOW WARDERI
2 Studeri a bijbel nanga joesrefi èn nanga a gemeente, makandra nanga begi pe wi e denki dipi foe sani, e jepi wi foe bow wan matifasi nanga Jehovah. Na so fasi wi sa man kon si a moi foe den eigifasi foe en èn a sma di a de. Joe e gebroiki wan schema foe na ala wiki leisi foe a bijbel? Joe e poti doronomo ten na wan sei foe studeri den poeblikâsi foe a Genootschap? Joe e sreka joesrefi gi ala den gemeente konmakandra, joe e fisiti den alamala èn joe e abi wan prati na den? (Hebr. 10:24, 25) Prakseri dipi foe sani nanga wan spesroetoe marki, so srefi na a ten foe èn na baka ibri pisiten foe studeri nanga wisrefi, sa bow dipi warderi gi na switifasi foe wi Gado di de nanga lobi èn den seti foe en gi na troe anbegi.—Ps. 27:4.
3 Ete wan fasi fa wi kan meki wi warderi kon moro bigi, na foe loekoe soifri a eksempel foe tra dienstknekti di ben dini Gado nanga den heri-ati. Na profeiti Jeremia ben bron foe faja gi a wroko di a ben kisi foe doe (Jer. 20:9). Jesus libi wan model na baka foe di a ben sori wan jeje foe warderi èn faja (Joh. 4:34). Na apostel Paulus ben sori nanga a tranga moeiti foe en ini a diniwroko taki a ben de grantangi gi na sari-ati fasi di Gado ben sori en (1 Tim. 1:12, 13, 17). Te wi e prakseri foe den eksempel dati nanga so srefi foe den eksempel foe now, dan wi kan bow wan warderi di sa meki taki wi de nanga wi heri-ati ini a diniwroko.
4 Te wi e kon sabi moro foe na glori moifasi foe na wartifasi foe Jehovah èn efoe wi e broko-ede nanga den wondroe wroko foe en, dan disi e boeweigi wi foe meki a granfasi foe en bekènti èn foe bari foe prisiri foe prèise en (Ps. 145:5-7). Te wi soekoe aktief na pasi foe panja a kownoekondreboskopoe na wan fajafaja fasi, wi e sori taki wi abi bigi warderi gi den okasi di wi abi foe gi kotoigi foe na nen foe Gado.—Luk. 6:45.
5 Ma tra sani de ete di sa gi wi deki-ati foe teki prati nanga wi heri-ati na a diniwroko? Efoe so, sortoe sani dan? Fa owroeman, dinari ini a diniwroko, pionier nanga tra preikiman di abi ondrofeni ini a meki bekènti foe a kownoekondre, kan gi jepi? Sortoe ròl, marki di wi wani doro, e prei ini a kweki foe wan faja fasi? San na den wini di wi kan froewakti? Den aksi disi nanga tra aksi sa kisi wan piki ini a lo disi foe feifi pisi, di den sa go doro nanga den na ini den tra nomroe foe Wi Kownoekondredienst.