De nanga joe heri-ati ini a velddienst
Pisi 5: Den bigi blesi foe dienst di doe nanga joe heri-ati
1 Jehovah abi bigi blesi pasa marki gi en dienstknekti di e dini en nanga den heri-ati, ini a ten di e kon (Ps. 116:12). Fa wi kan prisiri dorodoro foe den blesi foe Jehovah na ini wi diniwroko? Sortoe winimarki e wakti wi? San wi moesoe doe foe de seiker taki a feni wi boen èn taki wi kan kisi en boen-ati?
2 A e aksi taki wi persoonlijk moesoe doe moeiti: A fasi fa joe e njan boen foe den blesi di Gado gi joe, e anga foe wan bigi pisi foe joe eigi tranga moeiti di joe e doe, foe doe Gado wani. Paulus ben skrifi ini a tori foe sani di abi foe doe nanga a diniwroko disi: „Ibriwan sa kisi en eigi pai akroederi en eigi wroko” (1 Kor. 3:8). Meki wi abi foe dati-ede wan dorodoro prati na a diniwroko. Na a apostel Paulus ben kisi persoonlijk na pai foe di a ben kan jepi foeroe sma, srefi heri gemeente, foe den leri sabi Gado. Fa disi ben gi en prisiri foe si taki den ben tanapoe fasti ini bribi! (1 Tes. 2:19, 20) Leki fa a sori dan joe situwâsi no e gi pasi foe joe gi joesrefi krinkrin ini a diniwroko neleki Paulus. Ma a no ben sa kan de wan goedoe blesi foe jepi wan sma, noso kande srefi wan heri osofamiri foe sma di joe kan teki gersi nanga skapoe, foe den kan go koiri a pasi foe libi na wan stanfasti fasi? Fa disi na wan deki-ati foe wroko tranga na ini na oso-foe-oso diniwroko èn baka dati tjari gobaka èn hori bijbelstudie!
3 Tra wini: Wan wini, di warti srefisrefi, foe doe diniwroko nanga joe heri-ati de taki leki wan kompe wrokoman, joe e hari kon moro krosibei na Jehovah nanga Jesus Krestes (Mat. 11:29, 30; 1 Kor. 3:9). Fa a de wan prisiri foe firi fa Jehovah jeje e jepi joe ini a diniwroko! (Mat. 10:20; Joh. 14:26) Boiti dati, a fajafaja wroko di wi e wroko sei na sei nanga trawan ini a gemeente, e meki wi banti foe lobi nanga wanfasi e kon moro tranga.
4 Wi kan njanboen soso foe den blesi foe Jehovah efoe wi e horibaka dorodoro gi na organisâsi di en e gebroiki foe doe en wani ini den lasti dei disi. (Teki gersi 2 Kownoe 10:15.) Te wi e waka soifri èn nanga wi heri-ati na baka na tiri di wi e kisi nanga jepi foe Gado kanari, èn e teki wan fajafaja prati na gemeente-aktiviteit, dan disi e kibri wi na jeje fasi foe den triki plan foe Satan. So wi e man foe abi wan moro boen prati di e meki moro froktoe ini na diniwroko.
5 Na ini den artikel disi foe 5 pisi, di e go foe de nanga joe heri-ati ini a velddienst, wi ben tjari wan toe penti kon a fesi di abi foe doe nanga disi. Joe kan memre ete san na den sroto foe a bow foe warderi gi Jehovah, san e meki wan sma wani de nanga en heri-ati? (augustus) Foe san-ede sreka a fesi de prenspari foe kisi faja ini na velddienst? Fa wi kan sreka wi srefi? (september) Fa preikiman nanga ondrofeni kan jepi trawan foe de nanga den heri-ati? (oktober) Fa wan boen persoonlijk orga kan jepi wi foe de nanga wi heri-ati ini a diniwroko? (november) Joe e gebroiki den boen rai disi?
6 Jehovah wani meki wi feni boen foe di wi e gi jesi na en (Jes. 48:17). Den wini foe a dini nanga joe heri-ati, abi foe doe toe nanga den sma di e arki joe (1 Tim. 4:15, 16). Efoe joe poti joesrefi nanga faja tapoe a wroko di moesoe doe, joe kan de seiker taki Jehovah sa si disi èn dati „joe sa kisi na goedoe leki reti pai” — têgo libi. — Kol. 3:23, 24.