Handri a wortoe foe waarheid na wan bekwaamfasi
1 Wi bekwaamfasi na ini a gebroiki foe Gado Wortoe kan abi makti a tapoe a fasi fa sma e piki tapoe a boen njoensoe. Foe dati-ede Paulus ben e gi deki-ati foe meki a konifasi fa wi e doe wi diniwroko gro, nanga den wortoe: „Doe ala moeiti foe pristeri joesrefi na Gado, foe a feni joe boen leki wan wrokoman di no abi foe sjen foe noti, di e handri a wortoe foe waarheid na wan joisti fasi”. — 2 Tim. 2:15.
2 Bekwaamfasi foe gebroiki a bijbel moesoe gro. Poti ten aparti foe studeri nanga joesrefi nanga a fisiti foe kresten konmakandra, prenspari srefisrefi. Ma den sani di wi e leri wi moesoe doe toe foe di te wi de ini a diniwroko wi e gebroiki a bijbel doronomo. Disi e aksi doronomo tranga moeiti, ala di wi e soekoe Gado jepi èn tiri. — 1 Joh. 3:22.
3 Poti sma prakseri tapoe Gado Wortoe: A de prenspari foe sma sabi taki a boskopoe foe wi no e kon foe wisrefi, ma foe a skrifi Wortoe foe Gado (Joh. 7:18). Te wi e meki wan sma si ini bijbel san Gado abi foe taki foe wan spesroetoe tori a kan abi wan krakti bakapisi. Reti-ati sma e feni taki a krakti boskopoe foe bijbel e taki nanga den. Te wi e gebroiki den Boekoe moro foeroe, dan wi man gebroiki en moro boen èn wi sa man foe tjari trawan foeroe tron moro ini kontakti nanga Gado Wortoe, san sa de wan wini gi den.
4 Moro foeroe sma no sabi bijbel. Te wi e gebroiki en, wi moesoe doe moro leki soso leisi tekst gi den. Finifini sreka nanga sorgoe de fanowdoe foe bepaal fa joe kan hori na inleiding foe kon tapoe wan tekst. Den kan meki gebroiki foe aksi noso foe wan problema di den e poti foe kan wiki na belangstelling. Prakseri moesoe poti so toe na san wi e taki baka te wan tekst leisi. Kande a sma no man foe graboe a penti foe san a e go te disi ben leisi soso wan tron gi en. Te wi e sori ete wan tron krakti na tapoe srotowortoe èn e sori fa den kan gebroiki, dan prakseri sa kisi okasi foe pasa go dipi. — Loekoe Anoeboekoe foe na Theokrasia Diniwrokoskoro, studie 24 en 25.
5 Na pristeri: Ini december wi sa pristeri na Njoen-Grontapoe Vertaling foe den Santa Boekoe makandra nanga Bijbel — Gado wortoe noso di foe libisma? Fa wi ben sa kan bigin taki nanga sma foe a pristeri disi? Baka te wi kari wi nen wi ben sa kan taki: „Ini a ten disi foeroe sma e loekoe go na difrenti sma noso boekoe foe kisi tiri. San de, leki fa joe e si dati, na moro boen fonten foe praktis rai? [Gi okasi foe piki.] Loekoe pikinso san bijbel e taki foe na troe fonten foe koni. [Leisi Odo 2:6, 7.] Libisma koni ben boeweisi na wan sari fasi taki a e mankeri foeroe èn taki a e tjari rampoe kon èn e meki sma lasi ati. Ma a koni foe Gado alaten ben sori taki a de foe froetrow èn a boen. (Leisi Jesaja 48:17, 18.) Foe dati-ede wi moesoe loekoe go na Gado, di e gi na tiri di wi abi fanowdoe foe kan kakafoetoe gi den problema nanga san wi e kisi foe doe.” Baka dati wi ben sa kan opo kapitel 12 foe na Gado wortoe-boekoe èn poti den prakseri tapoe paragraaf 2. Dan joe kan gebroiki wan penti, di e fiti, di de na ini a kapitel.
6 Pristeri na Njoen-Grontapoe Vertaling baka te joe gebroiki Odo 2:6, 7 èn poti prakseri na tapoe na toemoesi hei fasi foe Gado koni èn tjari kon a krin gi na ososma foe san-ede joe ben kisi respeki gi na bijbel èn ben kon si na warti foe en. Froeteri en taki den leri foe a bijbel sa tjari wini gi en èn den e gi wan howpoe, di de foe froetrow, gi a ten di e kon. So wan takimakandra kan opo na okasi foe poti prakseri a tapoe wan toe koni rai foe a bijbel ini a tori foe ala dei problema, èn a kan meki wan bijbelstudie bigin.
7 Foe kan jepi opregti sma èn foe poti den gensman foe en na den presi, dan Jesus ala ten ben e sori go na den Boekoe. A ben de a gwenti foe Paulus foe ’gi froeklari èn boeweisi foe den tekst foe di a ben e sori go na den’ (Tori. 17:2, 3). Wi sa doe a diniwroko nanga moro froetrow èn prisiri te wi e doe opregti moeiti foe kon moro nanga moro bekwaam ini a gebroiki foe a wortoe foe waarheid.