A gemeenteboekoestudie seti
Pisi 4: Tan bow makandra
1 Ibriwan sma ini wan gemeenteboekoestudie groepoe kan prei wan prenspari ròl ini a jeje gro foe trawan ini a groepoe. Wi alamala wani foe gi jesi na a gebod di skrifi ini den Boekoe ’foe gi trawan tranga foe sori lobi èn toemoesi boen wroko, spesroetoe te a kaba e kon krosibei.’—Hebr. 10:24, 25.
2 Jepi makandra: Ala sma kan jepi foe meki wan waran, switi sfeer kon na a boekoestudie. Efoe ibriwan foe wi e sori persoonlijk belangstelling gi den trawan, dan disi e jepi foe a groepoe kon moro krosibei na makandra. Na ini Galasiasma 6:10 wi e kisi na gebod „foe doe boen na ala sma, ma spesroetoe na den wan di de nanga wi ini a bribi”. Joe e si kande te wan toe foe a boekoestudie siki èn no de na den konmakandra? Kande joe ben sa kan meki kontakti nanga den nanga jepi foe telefon ofoe go fisiti den joesrefi. So wan jeje ini a boekoestudiegroepoe e tjari den brada nanga sisa kon moro krosibei na makandra.
3 Wan toe sma de di abi deki-ati fanowdoe foe den aladei sorgoe, famiri frantiwortoe ofoe foe tra problema ede? San joe kan doe foe jepi? Doe spesroetoe moeiti foe bigin wan takimakandra nanga trawan tapoe den konmakandra èn no gi den odi wawan. Son kande e sjen ma tokoe lobi foe taki nanga wan sma èn den ben sa piki na wan boen fasi efoe joe ben go na den (uw blz. 137, 138). Na apostel Paulus ben gi kresten a deki-ati foe ’taki foe gi deki-ati na den sili di firi brokosaka, horibaka gi den swaki wan, de nanga langa pasensi gi ala sma’ ( 1 Tes. 5:14). Fa a de wan trowstoe gi wan sma di siki ofoe e firi brokosaka efoe brada noso sisa e lon pasa foe tjari wan fisiti ofoe e gi den jepi! Foeroe leisi dan a sabi taki tra sma e broko-ede nanga den, de a wan enkri sani di den abi fanowdoe.
4 Wi wani gi wi jepi toe na a velddienst seti. Wi moesoe proberi foe wroko makandra nanga difrenti sma ini wi groepoe. (2 Kor. 6:11-13; 12:15). Sontron kande a boekoestudieleider e aksi wi foe jepi wan sma. Fa wi e piki dan? A boekoestudiegroepoe e kon tranga srefisrefi te preikiman nanga pionier e wroko nanga makandra ini den difrenti pisi foe a preikiwroko èn a meki foe disipel.
5 Na eksempel foe joesrefi: Moro fasi de fa joe kan gi jepi na a gemeenteboekoestudie seti. Na boen eksempel foe joe de prenspari. Foe di, foe eksempel, joe e drès so leki fa joe ben sa doe dati te joe e fisiti wan konmakandra na ini a kownoekondrezaal, joe e sori respeki. Joe na wan boen eksempel gi den wan di kweki na gwenti kande foe no abi bisi fa den e weri krosi. Joe meki en wan gwenti foe kon biten, so dati joe no e troeboe a konmakandra?
6 A gemeenteboekoestudie seti na wan lobi sreka foe Jehovah, di wi moesoe horibaka gi en dorodoro (Jes. 40:11). A de wan presi pe wi kan kisi persoonlijk jepi èn na a srefi ten kan jepi foe meki trawan kisi kowroe na jejefasi. Meki wi alamala ’tan trowstoe makandra èn tan bow makandra’ foe di wi e horibaka dorodoro gi na seti disi.—1 Tes. 5:11.