Wroko nanga joe heri sili!
1 Wi abi boen foeroe reide foe gi Jehovah tangi. Disi abi na ini den sani di a doe na ini a ten di pasa, di a e doe nownowde, èn sa doe ete gi wi na ini a ten di e kon. San a tangi foe wi moesoe boeweigi wi foe doe? Wan psalm foe David e piki: „Mi sa blesi Jehovah ala ten; en prèise sa de na ini mi mofo doronomo.” — Ps. 34:1.
2 Bijbel e sori krinkrin taki wi kisi a komando foe preiki. Disi na wan wroko di wi e doe „nanga wi heri sili leki gi Jehovah” (Kol. 3:23). O foeroe wi sa doe na ini a diniwroko efoe wi e wroko troetroe nanga wi heri sili? Te wi e prakseri foe a lobi foe Jehovah gi wi, dan seiker wi ati e boeweigi wi foe abi wan opregti prati foe froeteri trawan foe en èn foe den warti prakseri foe en! A e boeweigi wi foe doe san wi kan.
3 A ben sa de reidelek foe froewakti taki wan sma di e wroko nanga en heri sili wani foe poti en prakseri na tapoe santa diniwroko. A psalm singiman, di krinkrin ben abi so wan firi, ben froeklari: „Seibi tron na ini wan dei mi e prèise joe” (Ps. 119:164). Den wan di abi den srefi firi foe a psalm singiman, e soekoe foe gebroiki okasi foe prèise Jehovah. Efoe den situwâsi foe den e gi pasi foe doe so, den e dini nanga faja someni leki den man.
4 Okasi foe prèise Jehovah lai lontoe wi: Wi no abi foe wakti te wi e teki prati na a oso-foe-oso wroko foe preiki a boen njoensoe. Den wroko kompe foe wi, kompe na skoro, famiri, èn sma di wi sabi, den alamala abi foe jere a Kownoekondre boskopoe. Te wi e rèis, wi kan bigin takimakandra di kan meki wi gi kotoigi na sma di e wroko na ini hotel, sma di e wroko na ini restaurant, sma di e wroko na service-station, noso na taximan. Te wi de na oso, wi kan gi kotoigi na birtisma noso sma di e tjari sani di wi bai, kon gi wi na oso. Te wi e didon na ati-oso, dan zuster, datra, nanga tra sikisma de, soema wi kan gi okasi preiki.
5 Okasi preiki abi boen bakapisi: Toe Kotoigi ben e waka na ini wan park wan dei èn ben bigin wan takimakandra nanga wan jonkoeman di ben e koiri nanga en pikin. Te foe kaba, en nanga en wefi ben teki waarheid. A jonkoeman ben taki baka dati, taki wan sjatoe pisiten nomo na fesi, fosi a ben miti nanga den toe Kotoigi, a ben aksi Gado na ini begi: ’Efoe joe de, grantangi meki mi kon sabi joe.’ A e si a miti di a miti nanga den Kotoigi na ini a park leki a piki foe Jehovah na tapoe en begi.
6 Den wan di abi a tranga winsi foe wroko nanga den heri sili foe jepi trawan na jejefasi, e ondrofeni foeroe prisiri. Den sabi taki so wan diniwroko „nanga wan heri ati” e plisi Jehovah. — 1 Kron. 28:9.