A seti foe na gemeenteboekoestudie
Pisi 2: A fanowdoe foe sreka èn foe teki prati
1 Jehovah en Wortoe e prèise a sma kolokoe di e feni koni èn di e kisi a koni foe man si sani, bikasi na paiman bigi (Odo 3:13, 14, 16-18). Jeje koni de wan diri sani èn a e kibri sma libi. A e meki wan kresten man foe meki boen gebroiki foe den a sabi di a e kisi foe Gado Wortoe na en fajafaja anbegi, na a loesoe foe den ala dei problema èn na a teki foe bosroiti di abi foe doe nanga den marki foe en ini a libi.
2 Na gemeenteboekoestudie abi a marki foe jepi wi foe studeri a Wortoe foe Gado èn foe gebroiki en, foe gro na a fasi dati ini koni nanga a froestan foe jeje sani. A doronomo fisiti foe a gemeenteboekoestudie moesoe de foe dati-ede wan fasti pisi foe wi eigi programa foe a kisi foe koni.— Odo 4:7-9.
SREKA JOESREFI BOEN
3 Sonwan di ben de ini na fosi jarihondro gemeente, no ben doe foeroe moeiti foe leri sabi na waarheid èn waka skinskin nanga a leti di ben go na fesi dorodoro. Den ben tan leki pikin-nengre ini Krestes èn so boen no ben sabi a wortoe foe regtfardikifasi (Hebr. 5:11-13). Na apostel Paulus ben froemane a gemeente foe ‘tan go na fesi foe kon lepi’ (Hebr. 6:1). A de krin taki djaso moro de fanowdoe leki foe arki wawantron te trawan e taki foe na waarheid. Foe „wiki a man di wi man foe denki krin”, wi moesoe denki foe sani èn ondrosoekoe sani, èn wi moesoe doe tranga moeiti.—2 Petr. 3:1, 2; Luk. 13:24.
4 Sreka boen finifini tapoe a gemeenteboekoestudie e meki wi go na fesi ini froestan foe sani èn a e meki wi warderi gi a materiaal kon moro bigi. Ma sreka boen e aksi moro leki foe leisi den paragraaf èn poti strepi gawgaw ondro den piki na tapoe den aksi. Wi abi ten fanowdoe foe njanboen foe na materiaal foe di wi e go denki dipi foe san a wani taki èn san na a waarde foe en gi wisrefi. Soekoe den tekst di kari èn denki foe en san den abi foe doe nanga den penti ini den paragraaf. Soekoe den wortoe di joe no e froestan krinkrin.
5 Gi sonwan foe wi studeri nanga wisrefi kan wani taki tranga wroko, èn a e teki ten foe troe; ma fa dati e pai! Paulus ben e sori tapoe a bakapisi foe na dipi studie disi foe di a e taki: „Ma fasti njanjan na foe lepi sma di e gebroiki dati, foe di den oefen na koni di den abi foe man foe si sani, foe si boen nanga ogri” (Hebr. 5:14). Na studeri disi nanga wisrefi e jepi wi foe gro kon lepi, so taki wi kan teki na joisti pasi te wi e kon tanapoe na fesi foe bosroiti di wi moesoe teki.
ABI WAN PRATI
6 Wi moe soe proeberi foe abi wan prati na ibri konmakandra. Foe san-ede? Den komentaar foe wi di wi sreka boen, no de soso wan sori foe wi bribi, ma nanga disi wi e gi deki-ati na den brada nanga sisa foe wi èn e bow toe (Rom. 10:10; Hebr. 10:23-25). Teki faja prati na a gemeenteboekoestudie e prei so srefi wan prenspari ròl ini a gro foe wi na jeje fasi. Te sma nanga ondrofeni so boen leki pikin-nengre èn sma di sori belangstelling no so langa pasa, alamala e gi komentaar fri, a groepoe kan njanboen foe foeroe difrenti komentaar. Disi e meki alamala leri sani èn e gi den kowroe-ati.—km 4/86 blz.3.
7 Te wi e sreka wisrefi fajafaja tapoe a gemeenteboekoestudie, e fisiti disi doronomo èn abi wan prati na disi na wan fri fasi, dan a soekoe di wi e soekoe koni sa de nanga boen bakapisi èn wi ‘sa feni na sabi foe Gado’.—Odo 2:4, 5.