De nanga joe heri-ati ini a velddienst
Pisi 3: Jepi foe meki tra sma go na fesi
1 A matifasi a mindri na bigi brada Paulus èn a jongoe Timoteus di ben e gi ensrefi foe dini, den ben kari foeroetron leki wan toemoesi boen eksempel foe skoro wan sma ini a diniwroko (1 Kor. 4:17). Timoteus ben kisi rai foe Paulus foe gi tra sma a srefi sabi èn foe skoro den na a srefifasi leki en ben kisi leri (2 Tim. 2:1, 2). Wi e doe boen foe waka na baka a srefi fasi foe doe sani ini den gemeente foe now.
2 Skoro tra sma: Taki a de fanowdoe foe skoro sma, wi sa si krin te wi sa froestan taki now na ini Sranankondre pikinmoro 300 preikiman de moro leki dri jari pasa. Leki fa sani e sori tranga, dan moro foeroe foe den ben sa abi wini nanga na skoro di preikiman nanga ondrofeni kan gi. Wan sisa di leki fa a ben gwenti, ben e gi ibri moen wan ofoe toe joeroe na a velddienst, ben leri foe taki nanga boen marki na den doro di a ben kisi jepi foe wan preikiman di abi ondrofeni. A hori di a ben e hori ensrefi na a bigin a baka, foe teki prati na a diniwroko, ben gowe èn a ben tron wan fajafaja preikiman foe a boen njoensoe. Leki wan bekwaam pionier a e loekoe now na a ten na en baka èn e taki: „A wan enkri sani di mi ben abi fanowdoe, ben de taki wan sma ben moesoe leri mi san mi ben moesoe taki, èn dan mi ben bigin foe feni a diniwroko wan switi sani.”
3 Efoe joe de wan owroeman, wan dinari ini a diniwroko, wan pionier ofoe wan preikiman nanga ondrofeni dan fa joe kan wroko na en foe meki tra sma go na fesi? Na a fosi presi joe kan meki joe gemeente boekoestudieleider kon sabi taki joe feni en wan prisiri sani foe jepi wan tra preikiman.
4 Orga èn sreka joesrefi: A de boen foe meki wan serjoesoe mofo foe wroko makandra. Joe kompe de kande nanga span firi èn a no de seiker foe ensrefi, ma a feni en wan boen sani taki wan sma e wrokomakandra nanga en foe kan horibaka gi en efoe a de fanowdoe (Preik. 4:9). Efoe a kan dan soekoe wan gebied pe a tjans de moro bigi taki joe sa feni sma di wani foe taki foe bijbeltori. Disi sa jepi a njoen sma foe abi wan prati èn foe kisi moro froetrow na ini ensrefi.
5 Foe kan go doro foe skoro sma na wan progressief fasi a ben sa boen foe takimakandra fa joe kan tjari wan gobaka na sma di sori belangstelling. Na a fosi fisiti kaba a fondamenti moesoe poti gi disi, foe di joe e libi na ososma na baka nanga wan aksi di joe sa piki na joe tra fisiti. Sorgoe taki joe jepi a preikiman di abi moro mendri ondrofeni foe sreka ensrefi, èn go nanga en na a gobaka. Efoe wan studie e opo èn a njoen preikiman no de seiker foe en eigi konifasi, dan a preikiman nanga moro ondrofeni sa hori a studie wan toe tron te leki a njoenwan de koni nofo foe teki en abra.
6 Nanga a esi-esi kon foe njoenwan na ini na organisâsi, a e kon krin taki foe skoro sma boen ini a velddienst de a pasi foe koni. Jepi de fanowdoe foe na sei foe den di gro kaba ini a bekwaamfasi foe den ini a preikiwroko. Efoe joe kan jepi wan sma, dan baka wan pisiten a sa abi „nofo koni. . . foe gi leri na tra sma”. — 2 Tim. 2:2.