Teki wi frantiwortoe foe doe boen na tra sma
1 Na apostel Paulus ben gi den kresten foe na fosi jarihondro na froemane:„No frigiti. . . foe doe boen èn gi tra sma afoe” (Hebr. 13:16). A moeiti foe den foe jepi den brada srefi ini takroe situwâsi, ben sa tranga den lobi gi makandra èn gi Gado (Joh. 13:35). Wi toe e kisi na deki-ati foe doe boen èn gi tra sma afoe.
2 Nanga disi na prakseri, meki Jehovah seti sani gi wi, so taki na jejefasi wi kan kisi boen njanjan èn de srekasreka boen. Fa wi abi boen foeroe bodoi na ini ibri Waktitoren nanga Ontwaakt! Fa a e gi wi prisiri foe leisi ibri uitgave so esi leki a kan baka te wi kisi en! Ala di wi e go denki dipi foe den bijbel bodoi, wi kan skrifi penti di wi wani gebroiki ini a velddienst èn ini wi takimakandra nanga tra sma. So wi kan bai a ten fri foe kan sreka wisrefi tapoe ala konmakandra, spesroetoe na alawiki Waktitoren-takimakandra. A studeri nanga wisrefi foe a Wortoe foe Gado e jepi wi foe kweki na denki foe Krestes èn e meki wi man foe prati san boen nanga den sma di wi e miti. — 1 Kor. 2:14-16; Ps. 19:14.
3 Frantiwortoe di de warti foe teki: Ala sma di kon lobi Jehovah, e gi den libi abra na en. Foe di wi teki den frantiwortoe ini a tori foe na gi di wi gi wisrefi abra, dan wi e sori taki wi de foe Jehovah èn taki wi poti wisrefi aparti foe a grontapoe foe Satan nanga den tegoe pasi foe en. Efoe wi waka na baka a model di Jesus ben libi na baka gi wi, dan wi e gi tra sma wan boen eksempel (1 Petr. 2:21). Programa foe den Kringkonmakandra, so leki a wan di seti gi a dienstjari 1992 nanga a thema „Tjari wi eigi lai foe frantiwortoe”, e gi wi a deki-ati foe wi libi ini akroederi nanga a gi di wi gi wisrefi abra.
4 Te wi e fisiti gemeente konmakandra doronomo dan disi e meki wi man foe prati nanga trawan den prakseri di e bow sma. A studeri nanga wisrefi èn a sreka di wi e sreka gi konmakandra e meki wi de nanga foeroe toemoesi boen bodoi di wi kan prati nanga makandra. Te wi e sori taki wi abi sowan belangstelling gi tra sma, dan disi e meki wan waran, switi famiri sfeer kon. Efoe wi abi prati na den konmakandra, dan wi e sori taki wi e agri troetroe nanga den wortoe foe Paulus na ini Hebrewsma 10:24, 25 èn taki wi e teki wi frantiwortoe foe gi tra sma deki-ati.
5 Feti baka moro frantiwortoe: Wi ben sa kan feti baka moro frantiwortoe ini a dienstjari 1992, so leki a gewoon noso a jepi-pionierdienst? Foe san-ede, na presi foe wi poti toemoesi prakseri na tapoe den joeroe di wi moesoe abi, wi no ben sa poti wi prakseri a tapoe taki wi abi moro okasi foe teki prati na a wroko foe tjari sma kon a wan? (Joh. 4:35, 36) Te wi e wroko doronomo nanga tra koni preikiman èn pionier, den disi sa jepi wi foe meki wi konifasi na ini a diniwroko kon moro betre. Te moro nanga moro jepi-pionier e kon, dan disi toe de wan gesontoe poesoe gi na gemeente. Efoe disi kan, foe san-ede joe no sa gi na papira pe joe e seni aksi foe de wan gewoon pionier, noso sorgoe taki doronomo noso someni tron leki a kan na ini a jari disi joe kan de wan jepi-pionier?
6 Nanga prisiri den e gi frantiwortoe na koni dopoeman ini a gemeente di gi densrefi abra (1 Tim. 3:1-10, 12, 13). Ala sma kan sori taki den wani dini foe di tapoe den konmakandra den e gi boen komentaar, di den go prakseri dipi foe den, foe di den e teki prati na a theokrasia diniwrokoskoro, èn foe di den e teki toewijzing foe wan demonstrâsi noso e hori tra prati na a dienstkonmakandra. Srefi pikin-nengre kan de wan eksempel ini disi èn ini a fasi fa den e tjari densrefi na ini a kownoekondrezaal. Den kan sori taki den lobi jepi doe sani foe di den e wroko makandra nanga a boekoestudie-groepoe foe den te a moesoe krin a Kownoekondrezaal ofoe moesoe sorgoe foe den sortoe sani disi. — km 4/76 blz. 1, 7, 8 [Bakratongo].
7 Jesus ben taki foe a wani di a ben wani foe teki a frantiwortoe foe doe tra sma boen, nanga den wortoe: „Mi wani” (Luk. 5:12, 13). Efoe wi e waka na baka na eksempel foe en, dan wi toe kan gi wi brada nanga sisa nanga sma di abi belangstelling èn opregti sma di wi e miti ini a velddienst deki-ati èn jepi foe abi doronomo demakandra nanga Jehovah organisâsi. A teki foe wi frantiwortoe foe „doe boen na ala sma” e aksi foe wi sei tranga moeiti èn kande srefi persoonlijk òfer (Gal. 6:10). Ma te wi e si a boen di kon foe disi, wi kan agri nanga den wortoe foe Paulus: „Nanga den sortoe ofrandi disi Gado abi prisiri.” — Hebr. 13:16.