Poti oensrefi krinkrin na ini Jehovah dienst
1 Wan foe den hémarki foe na dienstjari di psa ben de a gro foe 19% na ini na gemiddelde nomroe foe pioniers na ini na heri grontapoe. Na aparti gro disi ben kon foe wan prenspari pisi foe a moro bigi groepoe foe den di ini a waka foe na jari ben dini leki jepi pionier. Foe eksempre, joe ben abi a jari di psa soso ini april kaba na ini Amerkankondre 84.285 jepi pionier. Disi ben de 13% foe na nomroe foe ala prékiman di ini na moen dati ben gi wan rapport. Na ini Sranankondre na ini a moen dati 128 jepi pionier ben de ofoe bijna 14% foe na nomroe foe ala prékiman.
2 Den sma di e de na ini na jepi pionierdienst e kisi foe dati foeroe prisiri. (Neh. 8:10; Tori foe den Apostel 20:35). Den de ini na okasi dati den kan abi wan moro bigi prati na a panja foe na waarheid foe na, Wortoe foe Gado èn sortoe moro bigi grani wan sma ben kan abi? Wan sma ben sa kan de druk bezig nanga sortoe tra wroko di e pai so? Gemeente di abi wan boen nomroe foe jepi pionier e go na fesi, foe di den sma disi e prati den moi ondrofeni tori foe den nanga trawan, èn e kari den foe de nanga den makandra na ini na velddienst.
WI KAN DOE MORO?
3 Ma a moro bigi pisi foe wi no kan de alaten na ini na jepi pionierdienst. Ma wi e span wisrefi alaten srefsrefi ini na dienst foe Jehovah? Wi kan doe moro? Na ini Trinidad a jari di psa ini april 62% foe ala prékiman ben de ini na jepi pionierdienst. A ben aksi boen foeroe planning a fesi èn wan faja lostoe ben de fanowdoe foe kraka a baka foe na spesroetoe moen disi foe activiteit. Ma prakseri pikinso den toemsi moi bakapisi di a ben abi tapoe na wroko dati moro leki afoe foe ala prékiman ben de na ini na jepi pionierdienst na ini na wan moen dati. Moro foe wi na ini na kondre disi ben kan abi wan prati ini na jepi pionierdienst?
4 Sonwan foe wi kande tapoe wan moro regelmatig basis ben kan de na ini na jepi pionierdienst. Efoe wi e poti wisrefi krinkrin ini na dienst foe Jehovah, dan disi ben sa wani taki dati moro foe wi ben sa kan go na ini na gewoon pionierdienst? Trawan baka ben sa de ini na okasi foe dini pe na fanowdoe de moro tranga. Son osofamiri toe kotoigi di ben abi na kwinsi foe doe moro dienst, ben gebroiki den fakansi foe wroko na ini bepaalde gebied.
5 Efoe wi no man foe gi moro ten na ini na velddienst ofoe froisi go na ini na gebied pe moro jepi de fanowdoe, dan kande wan pasi de pe wi kan doe moro ete efoe a e go na wi foe gi wisrefi krinkrin na ini Jehovah dienst. Wi kan meki na kwaliteit foe wi dienst kon moro boen foe gebroiki na ten di wi e gi na a dienst boenboen. Wi e go na ini a dienst na wan ten pe someni sma de leki a kan na oso, sodati wi kan ferwakti moro foeroe winimarki? Wi e proeberi na a ten, foe wi dienst foe fiti na pristeri foe wi na a ososma? Wi moe poti prakseri na na sani di na ososma e taki èn loekoe na en fesi. Na ososma jongoe ofoe owroe, ofoe na wan man ofoe frow? Wi moe proeberi foe tjari wi pristeri fiti boen a den aparti sma nanga den omstandigheden.
6 Now di wi e pristeri den abonnement wi e kisi na dek’ati foe gebroiki ala okasi foe doe na pristeri: Efoe sma abonneer na tapoe Na Wachttoren, dan toe tron ini wan moen jeje njanjan e kon na inisé foe den oso di ibriwan sma na ini na osofamiri kan lési. Efoe boiti dati den abonneer tapoe na Ontwaakt! dan den e kisi ibri moen tijdschrift. Efoe wi e loekoe omeni wisrefi e leri foe den tijdschrift èn omeni waarde den abi gi wisrefi, dan séker wi sa doe ala sani foe gi trawan na okasi foe abonneer.
JEPI TRAWAN TOE
7 Na a jari di psa na a heri grontapoe 6.767.707 sma ben de na tapoe na Avondmaal. Wan bigi pisi foe den sma disi ben de ooktoe na tapoe den kringkomakandra nanga district-congres. Na sorgoe foe wi e go na den miljoenmiljoen sma di te nanga now ete no tai na wan actief nanga geregeldfasi a na Jehovah organisaatsi. Wi wani doe definitief sani foe jepi na bijbelstudenti nanga sma di abi belangstelling foe fisiti alaten den gemeente komakandra. Boiti foe dati, wi wani jepi den go so fara taki den kan teki prati na a georganiseerde velddienst. Na winsi foe wi de foe jepi den tron dopoe kotoigi di gi densrefi abra leki sma di e waka na baka Jezus Kristus. Soboen wi wani doe ala san wi man foe jepi someni leki a kan foe den sma disi foe go sroiti densrefi na wi gemeente. Wan bigi wroko de na wi fesi ete foe tjari njoen sma go na a organisaatsi.
8 O moro wi e tan gi wisrefi krinkrin na Jehovah dienst, o moro wi sa kon tranga foe tan faste na ini na waarheid awinsi sortoe moeilekheid Satan kan tjari kon na tapoe wi pasi (1 Korintesma 15:58). Moro bigi prisiri sa kon de foe wi efoe na a kaba foe na jari wi kisi na tra Jariboekoe foe Jehovah Kotoigi en lési fa na wroko di wi ben teki prati na en, e tan gro na ini na heri grontapoe, leki wan grani gi Jehovah. — Psalm 150:6.