De nanga joe heri-ati ini a velddienst
Pisi 4: Orga foe doe wi diniwroko na wan fasi di e meki wi abi boen bakapisi
1 Foe doe wi poebliki diniwroko nanga wi heri-ati e aksi wan boen orga foe wisrefi. Jesus ben gi wi wan toemoesi moi model gi na wroko foe wi ini a diniwroko ini a ten disi (Luk. 10:1, 2; Tori. 1:8). Wi kan leri toe foe a fasi fa den fosi jarihondro disipel foe en ben doe na diniwroko foe den (Tori. 5:42; 2 Tim. 4:5). Ma fa joe ben sa kan orga joesrefi moro boen èn abi den sèm boen bakapisi ini a ten disi?
2 Poti ten na wan sei gi a velddienst: A diniwroko foe wi no de wan wan frafra pisi noso wan seisei pisi foe wi libi. Omeni ten wi o gi na a doe foe wi diniwroko, no de wan sani di wi moesoe libi abra na a okasi. Foe kan orga wi diniwroko na wan fasi di e meki wi abi boen bakapisi, dan wi moesoe poti ten na wan sei gi den difrenti fasi foe dienst (Ef. 5:15, 16). Foeroe preikiman e feni en wan boen sani foe poti na marki gi densrefi foe wan nomroe foe joeroe di den wani gi ala moen na a diniwroko. Disi e aksi foe den, taki den moesoe seti den afersi so taki ibri wiki den kan teki prati na a velddienst. Kresten papa nanga mama moesoe jepi den pikin foe den foe den poti ten na wan sei foe teki prati doronomo na den difrenti fasi foe dienst. — Deut. 6:7; Odo 22:6.
3 Poti marki gi joesrefi di wani taki wan sani: Marki di joe kan doro sa gi joe wan sani di joe kan feti na en baka. Te joe doro joe marki joe sa ondrofeni na satisferi di e gi prisiri (Odo 13:12). Na apostel Paulus ben froemane: „Meki wi ini a fasi fa wi ben go na fesi, go doro foe waka na wan orde fasi ini a srefi routine disi” (Fil. 3:16). Neleki ala tra sei foe joe jeje go-na-fesi, na sosrefi joe velddienstaktiviteit moesoe kotoigi foe wan routine di abi wan orde fasi.
4 Joe abi foe eksempel, traktaat nanga strooibiljet pasa marki? Joe abi nofo njoen tijdschrift na joe èn den sori boen ete? Joe e meki boen gebroiki foe den oso-foe-oso-raport, foe di joe e gebroiki wan pe joe e skrifi soema ben sori belangstelling èn wan trawan gi den sma di no ben de na oso?
5 Bifo joe e go na ini a velddienst, dan teki a ten foe loekoe a Tori foe takimakandra di den e gebroiki now ini a velddienst. Teki wan toe penti foe taki, foe a poeblikatie di joe e pristeri èn sreka joesrefi na tapoe foe gebroiki den disi nanga boen bakapisi foe wiki a belangstelling foe den sma. Abi toe na Taki-go-taki-kon-boekoe klariklari foe gebroiki en. Srefi a mindri toe fisiti joe kan lokoe esi-esi wan toe foe den foeroe rai di skrifi na ini. Te joe sa gebroiki den praktis penti disi, joe sa meki taki joe boen bakapisi ini a diniwroko sa kon moro boen.
6 A de wan blesi grani foe abi wan dorodoro prati na „a santa wroko foe a boen njoensoe” ini den lasti dei disi (Rom. 15:16). Wi moesoe feti na baka foe doe wi diniwroko foe di wi e gi so boen kotoigi leki wi man, „a froktoe foe den mofoboeba” (Hebr. 13:15; teki gersi Hosea 14:2). Meki wi poti foe dati-ede ten na wan sei foe abi wan doronomo prati na a velddienst, èn poti gi wisrefi reidelek marki di sa meki wi man doe wi diniwroko, foe Jehovah kisi prèise.