Meki ala sma kon sabi taki seikerfasi na a heri grontapoe de krosibei
1 Heri esi, na „Kownoe foe Vrede” sa tjari troe vrede nanga seikerfasi kon na heri grontapoe. A bribi foe wi ini a bijbel pramisi disi, moesoe boeweigi wi foe prati en nanga trawan. Ini den moen februari nanga maart, wi sa pristeri a boekoe Troe Vrede nanga Seikerfasi—Fa joe kan feni dati? foe wan bijdrage foe Sƒ 3,-.
2 Foe san ede a de so wan boen èn toemoesi prisiri sani foe wroko nanga a pristeri disi? Ini a ten di wi ben pristeri boekoe ini a dienstjari di pasa, dan na ini wi kondre wan totaal foe moro leki 22.000 boekoe ben prati, èn foeroe ben de owroe boekoe. Disi no ben de nomo wan penti foe prisiri gi den preikiman èn pionier di ben libi den boekoe na baka na den ososma, ma na a srefi ten tapoe a fasi disi siri foe a waarheidboskopoe ben sai bogobogo.
3 Ini wi inlegvel foe januari 1988 den ben taki na ini paragraaf 7: „Foeroe moro moe sai leki o gro kon te foe kaba! A leri foe Jesus ben de ini akroederi nanga na gronprakseri disi ini na natuur. A ben taki foe siri di ben fadon ’a seipasi, tapoe den stonpresi, a mindri den maka’. Ma wan toe siri ben fadon ’tapoe na boen gron èn ben go meki froktoe’ (Mat. 13:3-9). . . . Omoro ’wortoe foe a kownoekondre’, e sai, efoe a de now nanga wortoe di wi e taki noso nanga wortoe di druk, o moro bigi a kans de tapoe wan boen koti foe froktoe.” Foe di na ini den moen pe wi e wroko nanga a spesroetoe pristeri moro boekoe e prati leki tra moen, meki wi kan froewakti so toe wan moro bigi koti foe froktoe.
4 Ini kapitel toe a aksi e poti èn a piki e gi, „Libisma man tjari vrede nanga seikerfasi di e tan?” Aksi di e poti na tapoe dati na „Libisma sa man foe poeroe feti krinkrin?”, „Libisma sabi san foe doe nanga a kon moro foe libisma, san de leki wan bom?”, „Libisma man foe meki vrede nanga grontapoe?” Spesroetoe sma di den tirimakti foe den no ben meki den froewakti kon troe srefisrefi èn di kon froestan now taki wan tra sani de fanowdoe, sa wani kon sabi nanga prisiri san Gado ben doe te now (Loekoe kapitel 6) èn seiker den sa abi belangstelling foe teki a sei di e djaranti libi ini troe vrede nanga seikerfasi.
5 Go abra: Baka te joe leisi Jesaja 9:6, 7 drai go na bladzijde 4 èn aksi na ososma: „Sortoe situwâsi foe vrede joe e si na a prenki disi?” Gi okasi foe piki, dan go doro foe taki: „Djaso wi e si taki vrede de a mindri libisma èn nanga den meti. Son sma kande e denki taki libisma tirimakti sa tjari na sortoe vrede disi kon. Ma troe vrede nanga seikerfasi so leki fa den ben taki na fesi foe en na ini bijbel, moesoe kon foe Gado, no foe libisma. Joe e agri nanga dati?” Gi okasi foe piki, dan leisi paragraaf 28 èn 30 tapoe bladzijde 20 èn 21 èn tjari kon na krin taki a boekoe disi e gi piki tapoe foeroe foe den aksi di e go foe a Kownoekondre èn vrede na grontapoe. Efoe na ososma abi opregti belangstelling gi na Kownoekondre boskopoe èn wani leisi a boekoe, wi kan pristeri dati gi en.
6 Kande joe teki wan inleiding di joe lobi foe bladzijde 6 foe Wi Kownoekondredienst. Baka te joe loekoe a go abra ini na artikel disi baka, joe sa feni wan spesroetoewan di joe sa lobi foe gebroiki. Teki ten foe oefen joe inleiding nanga a go abra bifosi joe go ini na velddienst. A sreka di joe sreka joesrefi na fesi nanga joe persoonlijk overtoigi, taki troe vrede nanga seikerfasi sa kon nanga jepi foe a „Kownoe foe Vrede” nanga en Kownoekondre, sa jepi joe foe pristeri a Troe Vrede-boekoe nanga overtoigi èn nanga faja.