Pristeri A soekoe di libisma e soekoe Gado
1 Foeroe sma ini a ten disi e feni taki a teki di den e teki wan relisi, na wan toemoesi persoonlijk afersi. Foe dati meki a kan de wan tjalensi foe taki nanga wi kompe libisma foe a tori disi. Ma now wi abi a boekoe A soekoe di libisma e soekoe Gado, di sori taki a de wan kefarlek bigi jepi foe preiki gi sma di abi difrenti relisi bakagron.
2 San joe e go taki foe wiki a belangstelling foe na ososma foe a leisi a boekoe disi? Sortoe penti noso tori joe e go poti krakti a tapoe di sa naki na ati foe den sma di e kari densrefi kresten?, na den sma di no abi wan kresten bribi?, noso na den sma di no abi bribi? Den boen rai di e kon now sa jepi wi foe de srekasreka foe sori den sma na wi sei a fanowdoe foe den ’soekoe Jehovah’ èn ’foe den kari en ala di a sori taki a de krosibei’ (Jes. 55:6). Oenoe kan fiti den rai na den situwâsi foe a presi pe oenoe de.
3 Foe san ede wi sa go ondrosoekoe san wi abi foe taki: Foe di foeroe sma e taki dati den de tevrede, nanga den relisi èn taki den no abi belangstelling foe kenki, dan kande wi moesoe fiti wi inleiding foe jepi na ososma foe go ondrosoekoe, nanga wan opo jeje, san wi abi foe taki.
4 Baka te joe taki odi na wan fasi di fiti joe ben sa kan taki:
◼ „Te wi e taki nanga sma ini wi birti, wi e si taki foeroe foe den de tevrede nanga a relisi foe den èn taki den no abi a winsi foe kenki. Ma joe denki taki efoe sma ben sa teki a ten foe ondrosoekoe na bribi overtoigi foe trawan, taki disi ben sa kan abi leki bakapisi wan moro boen froestan foe sani èn moro mendri bita-ati ini grontapoe? [Gi ososma okasi foe piki.] Loekoe pikinso san bijbel e taki foe den sma di lobi Gado èn fa den ben sa moesoe denki foe trawan.” Poti, baka te joe leisi Tori foe den Apostel 17:26, 27, a prakseri tapoe paragraaf 15 nanga 16 na bladzijde 10 foe a boekoe A soekoe di libisma e soekoe Gado.
5 Foeroe sma si taki a e hari a prakseri foe den ososma te den e opo wan kapitel ini a boekoe di e handri foe a relisi foe den. Loekoe fa disi kan doe.
6 Baka te joe kari joe nen, joe ben sa kan taki:
◼ „Joe ben aksi joesrefi wan leisi kaba fa wi kan bepaal efoe Gado e feni a relisi foe wi boen, foe di someni relisi de ini a ten disi?” Poti, baka a komentaar foe na ososma, a prakseri foe en tapoe a faki na bladzijde 377 foe a boekoe A soekoe di libisma e soekoe Gado, pe den e sori tin fasi fa joe kan feni a troe relisi èn poti spesroetoe a prakseri tapoe penti 7. Aksi na ososma efoe a e agri taki wan sma di abi a troe relisi ben sa moesoe denki so foe tra ras nanga nationaliteit. Soekoe, efoe a ten e gi pasi foe doe dati, den dri tekst di den kari. Loekoe dan, leki bosroiti, taki den tra neigi reide di den e kari, abi so srefi wan boen horibaka ini bijbel.
7 Tra boen penti: A bigi index foe tori na bakasei foe a boekoe joe kan gebroiki toe. San efoe foeroe sma ini a gebied e denki taki ala relisi de gewoon difrenti pasi di e tjari sma go na Gado? Loekoe dan ondro na ede „Relisi”, na ondro-ede: „ala relisi pasi di de a srefi: 12”. Disi e meki sma si fa na index e jepi wi foe feni penti foe takimakandra. Te wi e taki nanga sma di no e bribi ini Gado, wi kan sori den par. 1 nanga 2 na bladzijde 329, pe den e taki foe na afersi foe a bribi di sma no e bribi ini a ten disi. Den feifi „Aksi di abi wan piki fanowdoe” èn di de na bladzijde 17 nanga 18 sa abi a spesroetoe belangstelling foe den sma di e aksi densrefi efoe bijbel e leri san moro foeroe foe den relisi e preiki.
8 Foe di wi e gebroiki boen fasi foe abra go na a pristeri foe a boekoe A soekoe di libisma e soekoe Gado, dan kande wi kan jepi den sma nanga soema wi e taki foe feni a wan troe Gado, Jehovah.