Tjariman foe leti ini a kontren foe joe
1 Baka di wi ben fisiti na distriktkongres foe a jari disi, wi kon sabi moro serjoesoe taki wi moesoe de tjariman foe leti gi den birtisma foe wi (Mat. 5:14). Efoe wi e sori ala den bodoi di wi ben kisi ini a programa èn e doe moeiti foe fiti den ini wi aladei libi, a o jepi wi foe kon moro krosibei foe Jehovah ini troe anbegi èn foe jepi trawan foe den leri foe den pramisi foe Jehovah.
2 Den okasi di wi abi foe tjari na leti ben kon moro bigi di, na a kaba foe na programa tapoe freida bakadina, a njoen traktaat A grontapoe disi sa tan go doro? ben tjari kon a doro. Den demonstrâsi satra mamanten, ben de wan bigi jepi foe sori wi fa wi kan gebroiki a traktaat disi. Makandra nanga disi, den ben meki bekènti taki heri esi dri tra traktaat o de foe kisi. Den disi na Trowstoe gi den wan di e sari, Njanboen foe na oso famiri libi, nanga Soema e tiri grontapoe troetroe? Den ben gi wi deki-ati foe tjari den jepisani disi, di wi kan gebroiki boen, nanga oenoe foe gebroiki den te okasi de foe dati.
3 Na a kaba foe na taki „Kon fri na a ten foe a tjari kon a krin foe Jesus Krestes” satra bakadina, wan njoen, moi brochure di abi leki nen Gado e broko ede troetroe nanga wi?, ben tjari kon a doro. A brochure disi di de ini kloroe èn di lai nanga moi prenki, sa gi piki tapoe foeroe aksi di sma e poti so leki: Foe san ede Gado e gi pasi taki sma e pina? Oiti wan kaba sa kon na pina? Fa wi sabi taki wi de ini den lasti dei? Fa grontapoe sa kenki kon tron wan paradijs? Fa wi kan tan libi foe têgo ini a njoen grontapoe foe Gado? A brochure disi sa de wan toemoesi moi jepisani foe opo njoen bijbelstudies.
4 Fa wi de grantangi taki wi kisi so foeroe jeje njanjan pasa marki na a „Tjariman foe leti” -distriktkongres! Meki a de so taki wi leki tjariman foe Gado jeje leti, abi na fasti bostroiti foe sori na warderi di wi e firi ini wi ati, nanga jepi foe a fiti di wi e fiti den sani di wi leri ini wi libi nanga ala wi prakseri èn fajafaja e gebroiki den toemoesi moi poeblikâsi disi foe jepi sma na ala presi foe kon sabi èn dini Jehovah.