Waka na baka wi Eksempre leki tjariman foe leti
1 Jesus ben taki foe ensrefi taki: „Mi na a leti foe grontapoe.” So srefi, den disipel foe Jesus ben de „a leti foe grontapoe”, foe di den ben waka baka na eksempre foe en (Mat. 5:14). Leki „a leti foe grontapoe”, Jesus ben kan taki dati ala sma di e waka na en baka sa abi „a leti foe a libi” (Joh. 8:12). Dati e meki wi tron jeje tjariman foe leti, di noiti no moesoe gi pasi taki wan sani meki wi kibri a leti dati.
2 Na organisâsi foe Jehovah e gi wi leri foe sori wi fa foe de boen tjariman foe leti. Efoe wi e waka soifri na baka a rai nanga tiri di wi e kisi, dan wi sa man skèin faja na tapoe ala sortoe sma gi a Kownoekondre waarheid (1 Tim. 4:6). Foe e dini leki tjariman foe leti no abi foe doe nanga a taki foe waarheid na ala okasi wawan, ma so srefi foe tjari wisrefi na wan toemoesi boen fasi leki kresten. A fasi fa wi Eksempre ben tjari ensrefi, ben de soifri srefisrefi. Leki bakaman foe en wi moesoe sori taki a kresten bribi na a fasi foe wi aladei libi (Ef. 5:9; Tit. 2:7, 8, 10). Wi moesoe doe toemoesi boen sani di tra sma kan si èn dati sa boeweigi den foe gi Gado glori.—Mat. 5:16.
3 Wan Kotoigi ben miti wan sma di ben aksi en foe doe wan sani di joe no e miti so foeroe te joe e go oso foe oso. Na edeman foe na osofamiri nanga en wefi ben siki srefisrefi, ma den ben abi foe poti wan moni na bangi. Den ben aksi a Kotoigi efoe a ben sa wani doe dati. A ben agri èn den ben gi en 2000 Amerkan dala na ini en anoe foe tjari go na bangi. Di a ben drai kon baka, a ben aksi den: „Fa oenoe ben kan froetrow mi sondro foe sabi mi srefi?” A piki ben de: „Wi sabi, èn ala sma sabi, taki na Jehovah Kotoigi nomo joe kan froetrow.” Fa wi kan de nanga tangi, taki a hori di wi e hori wisrefi tranga na ini a tori foe boen gwenti nanga wet foe bijbel, e meki taki wi e kisi so wan boen nen di e gi Gado grani!
4 Wan skoromisi foe eerste klas ben froeteri a klas foe en, foe san ede wan Kotoigi di abi siksi jari no ben wani kloroe den prenki di abi foe doe nanga a Haloween fesa. A skoromisi ben taki dati a ben breiti srefisrefi, foe di a pikin ben abi a deki-ati foe sori taki a de tra fasi, foe en bribi ede. Efoe wi e bribi wan sani tranga, na so a skoromisi ben taki, dan wi moesoe abi a deki-ati foe feti gi dati. A neti dati a skoromisi ben ondrosoekoe san a ben bribi, èn ben abi foe erken taki a no ben sori a srefi deki-ati foe feti gi san a e bribi. A dei na baka a ben meki bekènti taki a no ben sa meki a klas foe en abi foe doe moro nanga no wan sani na ini a tori foe den fesa; sonwan foe den fesa ensrefi no ben bribi!
5 A pipel foe Jehovah de fajafaja foe skèin a leti foe den, awansi pe den de. A toemoesi boen eksempre foe den jongoewan di tjari densrefi boen na skoro, e naki na ati foe skorokompe nanga den skoromisi. Kotoigi di de bigi sma èn di e tjari densrefi na wan toemoesi boen fasi na a birti foe den, e meki taki trawan e taki boen foe a Kownoekondre boskopoe. Na okasi preikiwroko na mindri den foeroe situwâsi di de, e hari opregti sma di wani leri moro. Srefi a lesi di wi no lesi foe wroko èn na eerlijkfasi foe wi na wi wrokope, de wan kotoigi gi sma. Ija, awansi pe wi de noso san wi e doe, wi kan hari a belangstelling gi waarheid.
6 Te wi e hori wi ai na tapoe a libi nanga waka sondro fowtoe foe wi bigi Eksempre, dan wi kan go doro foe kon moro bekwaam leki disipel foe en. Te wi e waka soifri baka na eksempre foe en, dan disi sa gi wi a djaranti taki wi leti e „skèin na tapoe ala sma”.—Mat. 5:15; 1 Petr. 2:21.