Aksi boksoe
◼ O bigi a prati de di jongoe pikin foe kresten papa nanga mama moesoe abi ini a velddienst bifosi den kan erken den leki wan preikiman di no dopoe?
Kresten papa nanga mama wani foe den pikin foe den gro kon tron lepi, dienstknekti foe Jehovah di e gi densrefi foe dini (1 Sam. 2:18, 26; Luk. 2:40). Srefi efoe den jongoe srefisrefi ete, dan pikin ini kresten osofamiri moesoe man foe taki na wan krin fasi te den e djompo taki gi den bribi di abi en fondamenti tapoe bijbel. A gro foe pikin na jeje fasi e go moro esi te den e go makandra nanga den papa nanga mama na velddienst foe bigin foe den pikin-nengreten. Ma a de prenspari gi den jongoewan taki na ati foe den e boeweigi den efoe den wani abi prisiri ini a velddienst, e angri foe tron wan preikiman di no dopoe èn e tan abi wan prati ini a Kownoekondre preikiwroko. Kisi boen skoro foe na sei foe papa nanga mama de fanowdoe (1 Tim. 4:6; 2 Tim. 2:15). Tra bekwaam preikiman kan gi jepi sontron efoe den papa nanga mama feni dati boen. — Loekoe Orga foe doe wi diniwroko bladzijde 99-100. (Ingrisitongo)
Te pikin di e tjari densrefi na wan boen fasi e go nanga den papa nanga mama foe den ini na oso-foe-osowroko, dan den e leri fa foe teki prati ini a diniwroko. Ma den no sa erken den leki wan preikiman di no dopoe, te leki wan marki foe froestan foe sani nanga bekwaamfasi foe densrefi gro ini den. Kresten papa nanga mama kan bosroiti o bigi a prati foe wan pikin kan de ini a gi foe kotoigi te den e wroko makandra. Pikin di den no e erken ete leki wan preikiman di no dopoe no sa tjari gobaka den wawan noso wroko makandra nanga tra pikin ini a velddienst. Papa nanga mama kan sreka den pikin foe den tapoe velddienst èn gi den pasi foe abi wan prati na difrenti fasi, so leki foe di den e leisi wan tekst, e gi wan traktaat noso wan tijdschrift, noso e sori na ososma wan prenki ini wan foe den boekoe. Te wan pikin e gro kon moro bigi, kande a sa man foe abi wan moro bigi prati na ini a takimakandra.
Nanga a skoro di papa nanga mama e skoro den jongoewan boen, meki den e leri foe warderi a serjoesoe fasi foe a diniwroko te den e doe boen tapoe a tiri di den papa nanga mama e gi den èn e tjari densrefi na wan ordefasi. Papa nanga mama no moesoe libi den pikin foe den di a gemeente no e erken ete leki preikiman di no dopoe na baka, na a konmakandra foe na velddienst, èn froewakti taki trawan o loekoe den. Papa nanga mama di e broko den ede e erken den eigi frantiwortoe foe hori ai na tapoe den sani di den pikin foe den e doe. A no de foe taki, dati tra preikiman nanga frantiwortoe kan wani foe gi wan anoe foe skoro den jongoe pikin ini a gemeente di e sori opregti belangstelling foe e dini Jehovah ini a velddienst.