Jepi sma di gersi skapoe foe bow tapoe wan steifi fondamenti
1 Doe tranga moeti nanga wan marki èn a meki foe boen plan de fanowdoe foe bow wan oso. Baka te na oso teken, den moesoe sreka a gron pe na oso sa bow èn den moesoe poti wan stèifi fondamenti. Pikinsopikinso a projekt e bigin gersi wan sani, te leki a kon na wan kaba. Na a srefi fasi, wi moesoe jepi sma di gersi skapoe foe leri sabi waarheid pikinsopikinso. Wi e doe moeiti foe wiki a belangstelling na a fosi fisiti. Baka dati, wi e tjari gobaka èn e poti wan fondamenti, foe di wi e leri den, den gron waarheid foe Gado nanga a marki di a abi na prakseri gi libisma.—Lukas 6:48.
2 Ma fosi wi kan poti a fondamenti, wi moesoe sreka a gron foe kan bow, foe taki en so, ala di wi e hori a situwâsi foe na ososma na prakseri. Foe sortoe tori oenoe ben taki na fesi kaba? Sortoe tekst joe ben gebroiki? San na ososma ben doe na tapoe dati? Sortoe poeblikâsi joe ben libi na baka? Abi spesroetoe penti na prakseri te joe e go baka èn bow a fondamenti pikinsopikinso. Na ibri fisiti a sabi foe na ososma èn a bribi foe en ini Gado, e gro.
3 Efoe joe ben libi wan “Libi foe têgo”-boekoe na baka, joe ben sa kan taki:
◼ „Mi breiti so te foe miti joe na oso. Joe kan memre kande taki na a fosi takimakandra foe wi, wi ben taki foe a belangstelling di sma ini a kontren disi abi gi Gado èn taki a belangstelling e kon moro mendri. Bijbel e tjari kon na krin taki Gado abi belangstelling gi a libisma famiri èn taki den regtfardikiwan sa kisi blèsi nanga jepi foe en Kownoekondre. [Leisi Mateus 6:9, 10.] Nanga jepi foe a Kownoekondre disi, regtfardikifasi nanga retidoe sa wini.” Leisi Jesaja 11:3-5, èn poti baka dati a prakseri foe na ososma tapoe den toe fosi paragraaf foe kapitel 1 foe a Libi foe têgo-boekoe. Sori fa wi kan studeri a materiaal.
4 Efoe na a fosi fisiti joe ben libi a Njoen grontapoe foe vrede-traktaat na baka, dan den moro prenspari penti di joe ben loekoe kaba na fesi, foe a fanowdoe foe kisi moro betre situwâsi èn den pramisi foe bijbel, ben kan loekoe baka. Poti krakti na tapoe taki, efoe wi wani libi ini a njoen grontapoe, dan wi moesoe teki soifri sabi. Leisi Johanes 17:3. Froeklari taki baka te wi teki so wan sabi, wi moesoe doe Gado wani. Leisi 1 Johanes 2:17. Poti a prakseri foe na ososma tapoe spesroetoe penti foe bladzijde 5 foe a traktaat.
5 Efoe na a fosi fisiti, di joe ben libi a „Libi foe têgo”-boekoe na baka, joe ben taki foe na osofamiri libi, joe ben sa kan taki:
◼ „A tra dei di mi ben fisiti joe, wi ben taki foe na osofamiri libi. Wi ben agri taki wi moesoe waka baka den bijbel markitiki, efoe wi wani abi wan kolokoe osofamiri libi. San joe prakseri de fanowdoe foe meki a trowlibi waka boen?” Gi okasi foe piki. Poti krakti tapoe spesroetoe penti foe den bodoi tapoe bladzijde 243 te nanga 246 foe a Libi foe têgo-boekoe. Aksi komentaar foe na ososma foe den prenki èn go loekoe penti di ben teki na mindri trawan efoe dati fiti. Poti krakti tapoe a praktis waarde foe bijbel gronprakseri.
6 Efoe joe ben libi a Njanboen foe na osofamiri libi-traktaat na baka, dan go loekoe baka den moro prenspari bijbel gronprakseri di den e kari tapoe bladzijde 4 nanga 5. Te a belangstelling e wiki, pristeri dan a Libi foe têgo-boekoe. Poti a prakseri tapoe kapitel 29, „Meki na osofamiri libi waka boen”, èn sori a joe kan loekoe a kapitel disi makandra nanga na ososma nanga en osofamiri.
7 Wi alamala moesoe abi wan doronomo prati na a tjari foe gobaka. Go na ala den sma di ben sori belangstelling, foe di joe e tjari gobaka di abi boen bakapisi ini september.