Leri foe Gado abi wan tranga krakti
1 Fa a de wan grani gi wi foe kisi leri foe a Sma di de Gado, wi Mekiman, Jehovah Gado! (Ps. 50:1; Jes. 30:20b) Ini a ten disi, sma foe ala nâsi e go ipi-ipi na a bergi foe en foe troe anbegi foe kisi leri foe en (Mika 4:2). Miljoenmiljoen tra sma e go na skoro pe den e hei libisma denki èn a koni foe grontapoe. Ma a koni di no e erken Jehovah èn en Wortoe di skrifi, na wan law sani ini Gado ai èn den sma di e meki a koni disi tjari den, e tron sma sondro froestan.—Ps. 14:1; 1 Kor. 1:25.
2 Tapoe a distriktkongres foe wi a jari disi, wi ben ondrofeni na wan aparti fasi a krakti foe a leri foe Gado. A thema „Leri foe Gado”, ben e waka na ini a heri programa. Wi ben leri taki Gado Wortoe makandra nanga en jeje, e tjari wi kon na wán ini a bradafasi di de na heri grontapoe, e kenki wi persoonlijkheid, e kibri wi gi den leri foe ogri jeje èn e leri wi foe kon tron moro betre bedinari. Fa joe persoonlijk ben abi wini foe a leri foe Gado?
3 Fa disi e wroko tapoe a fasi fa wan kresten e libi: Leri foe Gado e jepi wi foe sreka wi konsensi. Ibri sma gebore nanga wan konsensi, ma foe a kan tjari wi ini a pasi foe regtfardikifasi èn ini diniwroko di e plisi Jehovah, dan a moesoe kisi leri (Ps. 19:7, 8; Rom. 2:15). Sma foe grontapoe no kenki a denki foe den ini akroederi nanga a Wortoe foe Gado èn foe dati ede den broeja èn den no de seiker ini a tori foe san boen èn san ogri. Bigi kesekese di abi foe doe nanga moreel nanga ethisch tori, e opo ede kon, foe di ala sma e taki nanga tranga foe doe san boen ini en eigi ai. Moro foeroe foe den wani dorodoro fri foe bepaal den eigi pasi ini a libi. Den e weigri foe poti prakseri na tapoe a wanenkri fonten foe troe koni (Ps. 111:10; Jer. 8:9; Dan. 2:21). Ma a leri foe Gado loesoe den tori disi gi wi èn wi e tan wán leki na osofamiri foe Gado, bikasi na en e gi wi leri. Nanga froetrow èn nanga wan boen konsensi wi e loekoe go na a ten di de na wi fesi, ala di wi e tan abi foe doe ini a diniwroko foe wi.
4 Leri foe Gado e jepi wi foe kakafoetoe gi „ibri winti foe leri” (Ef. 4:14). Wi no abi lobi gi a studie foe filosofie, di e meki sma tron sma di e soekoe fowtoe èn di de skeptis sma, di e gi sma deki-ati foe bosroiti sani gi densrefi èn a e tjari sma go na baka na moreelsei. Wi e feni en wan prisiri sani foe kisi leri foe Jehovah èn so wi e kibri wisrefi gi a sari èn a pen foe inisei, di foeroe sma ben ondrofeni. Den wet nanga den froemane foe Jehovah de leki ’wan wortoe na wi baka’, di e taki: „Disi na a pasi. Waka na en tapoe.”—Jes. 30:21.
5 Den konmakandra èn a diniwroko foe wi: Wi e si Hebrewsma 10:23-25 leki wan komando foe Gado. Tapoe den gemeente konmakandra Jehovah e gi wi leri. A de a gwenti foe wi foe de ala ten na tapoe den konmakandra noso wi e si dati leki wan sani di no de so prenspari? Hori na prakseri, taki foe kon makandra na wan pisi foe wi anbegi. Wi no moesoe si disi leki wan sani san wisrefi kan taki efoe wi wani go efoe no. Wi no kan gi pasi foe misi pisi foe a njanjan na jeje fasi di Jehovah ben sreka gi wi.
6 Moses ben begi Gado: „Sori wi fa foe teri den dei foe wi na so wan fasi, taki wi e doe sani nanga wan koni ati” (Ps. 90:12). Disi na wi begi toe? Wi e warderi ibri warti dei? Efoe wi doe dati, dan wi sa „doe sani nanga wan koni ati”, foe di wi e gebroiki ibri dei na wan fasi di warti, foe gi grani na wi Bigi Leriman, Jehovah Gado. Leri foe Gado sa jepi wi foe doe dati.