Hori wan oso-bijbelstudie
1 Fa wi kan hori wan oso-bijbelstudie nanga boen bakapisi? Sortoe fondamenti eksempre wi abi? Fa wi kan go loekoe den tekst ini a studie materiaal? Soema moesoe leisi den paragraaf? Boiti a fondamenti fasi foe hori wan bijbelstudie, san moro de fanowdoe foe jepi a studenti foe meki a waarheid tron wan pisi foe en? Èn foe sortoe trapoe wi moesoe tan farawe?
2 Fa foe hori wan studie: Ini algemeen wi kan taki, dati wan oso-bijbelstudie e hori na a srefi fasi leki fa a Waktitoren-studie e hori. Na a fosi presi, den leisi a paragraaf di den sa go loekoe. Dan a sma di e hori a studie e poti den aksi di skrifi foe a paragraaf dati èn e gi a studenti na okasi foe gi piki. Efoe a studenti e draidrai foe piki, dan a sma di e hori a studie moesoe de srekasreka foe poti aksi di e jepi a studenti, so taki a kan taki-go-taki-kon foe a tori èn kon na wan joisti bosroiti.
3 Loekoe fa den tekst e fiti na a materiaal ini a paragraaf. Sori a studenti fa foe feni den tekst di den teki skrifi, èn taki-go-taki-kon nanga en fa a kan gebroiki den. Efoe den tekst kari nomo, ma den no skrifi den, dan a boen foe go soekoe den ini bijbel, efoe den no langa toemoesi. Dan meki a studenti leisi den èn meki a gi komentaar fa den e horibaka gi noso e tjari kon na krin san taki ini a paragraaf.
4 Jepi a studenti foe meki a waarheid tron wan pisi foe en: Gi studenti a deki-ati foe sreka densrefi boen tapoe a studie. Poti krakti na tapoe taki leisi de wan prenspari sani foe kan leri. Omoro studie materiaal a studenti e leisi èn prakseri dipi foe en, o moro betre. Sonwan di e hori wan studie, e meki a studenti leisi ala den paragraaf na a ten foe a bijbelstudie. Trawan e kenki nanga a studenti foe leisi den paragraaf. Joe srefi sa moesoe loekoe a situwâsi boen, ala di joe e hori a go na fesi foe a studenti na prakseri.
5 Taki makandra foe a studie materiaal tapoe a fasi fa a doe na skoro, sa jepi a studenti foe teki sabi kande, ma a e bribi san a e leri? Efoe a wani meki a waarheid tron wan pisi foe en, dan a moesoe si fa a materiaal abi krakti tapoe en persoonlijkheid. Fa a e denki foe den sani di a e leri? Fa a kan gebroiki den sani di a ben leri? Gebroiki ondrosoekoe-aksi foe doro na ati foe a studenti.
6 Tan farawe foe trapoe: Te joe e hori wan bijbelstudie, dan joe moesoe tan farawe foe trapoe. Te tori e tjari kon na fesi di no abi foe doe nanga a materiaal di joe e loekoe, dan a moro boen foe taki foe disi na a kaba foe a studie noso na wan tra okasi. A de prenspari toe foe meki a studenti gi piki nanga en eigi wortoe, presi foe a leisi den foe a boekoe. Disi sa jepi joe di e hori a studie foe si efoe a studenti e froestan a materiaal.
7 Foe san ede joe no e meki en leki wan marki gi joesrefi foe hori, awansi fa no fa, wan studie? A no de wan moeilek sani efoe joe froetrow na tapoe Jehovah èn waka na baka a fondamenti fasi fa a Waktitoren-studie e hori. A moro boen fasi foe leri a waarheid na trawan èn foe meki disipel, na foe hori wan oso-bijbelstudie. Te joe e doe disi, joe srefi kan ondrofeni a prisiri di e kon foe di joe abi wan dorodoro prati na a kontroe foe Jesus komando ini Mateus 28:19, 20.