Meki den firi taki wi prisiri dati den kon na a Memrefesa
1 Ini wan toe jari di pasa, soso 1 na mindri foe 3 sma di ben fisiti a Memrefesa ben de wan preikiman foe a boen njoensoe. So leki fa a sori, dan a sa de so toe a jari disi. Wan toe sma kande e kon foe di wan famiriman noso wan sma di den sabi èn di e libi na wan tra foto ben gi den tranga foe kon, ala di kande trawan ben kisi wan kari foe preikiman foe a gemeente. Tokoe trawan di e kon ala di den ben dopoe kaba, no de aktief moro ini a diniwroko. Na wan opregtifasi wi e gi alasma wan switi kon di e sori respeki gi a gebod foe Jesus: „Tan doe disi foe memre mi.” — 1 Kor. 11:24; Rom. 15:7.
2 Den brada nanga sisa di kisi a wroko foe doe disi, moesoe de na ai foe gi ibriwan sma wan switi kon, spesroetoe wan njoensma te a e kon na a Kownoekondrezaal. Ma, na a Memrefesa wi alamala kan abi wan prati ini a waka di wi e waka na tapoe a pasi foe lobi foe teki sma na oso (Rom. 12:13). Fa wi kan doe disi?
3 Na tapoe a neti dati wan toe preikiman sa abi en toemoesi druk nanga a sorgoe di den e sorgoe gi vervoer gi den sma di abi belangstelling. Kande trawan man foe doro froekoe èn de drape, foe gi odi na den wan di no kon nanga wan Kotoigi. Te wan freimde sma e waka kon na ini a zaal, dan gi en odi tapoe wan waran fasi èn bigin wan takimakandra. Aksi en efoe a sabi iniwan sma foe a gemeente. Efoe a sabi wan foe den, dan sorgoe gi en te leki a Kotoigi dati doro. (Teki gersi Luk. 10:35.) Efoe a no sabi nowan sma persoonlek, dan foe san ede joe no e aksi en foe sidon nanga joe na a ten foe a konmakandra? Froeklari gi en fa wi sa gebroiki a win nanga a brede na a ten foe a programa. Kande a abi joe jepi fanowdoe foe feni den tekst di a takiman sa kari.
4 Meki en sabi na a kaba foe a Memrefesa, dati joe breiti di a kon. Kande a abi aksi di abi foe doe nanga a wroko foe wi di joe kan piki. Kande joe persoonlek belangstelling kan tjari joe go na wan takimakandra foe wan bijbel tori, na a Kownoekondrezaal noso na wan tra presi. Den brada di ben de na ai, di de foe prèise foe di den teki fesi na ini a tori disi, ben bigin wan toe toemoesi moi studie. Meki a freimde sma kon sabi trawan èn aksi en na wan waran fasi foe kon baka, bifo a gowe libi a Kownoekondrezaal.
5 A de wan prisiri troetroe foe gi den lobi brada nanga sisa foe wi, di no ben kon na den konmakandra tapoe wan doronomo fasi noso di no ben de aktief ini a diniwroko gi wan pisi ten, wan switi kon! Na presi foe aksi den foe san ede den no ben kon na den konmakandra, sori den nomo taki joe prisiri foe di den kon. Kande wan sani di den jere na a ten foe a lezing foe a Memrefesa, sa boeweigi den foe ondrosoekoe a fasi fa den de nanga Jehovah di den gi densrefi abra na Jehovah. A gi di joe e gi wan switi kon na wan waran fasi èn a broko-ede di joe e sori na wan opregtifasi kan naki den ati. Meki den sabi taki nanga prisiri joe e wakti foe si den baka. — Rom. 1:11, 12.
6 Wan spesroetoe poeblikitaki di abi a titel „A troe fasi foe anbegi e doro den fanowdoe foe a libisma libimakandra” sa gi na foeroe foe den gemeente na tapoe 10 april. De seiker dati alasma di kon na a Memrefesa kisi wan kari èn kisi jepi foe de drape. Wi e howpoe taki denwan di e fisiti den spesroetoe konmakandra disi, sa firi taki wi prisiri dati den kon èn sa ondrofeni a waran jeje foe demakandra na mindri a pipel foe Jehovah. — Ps. 133:1.