Joe kan doe moro ini a prèise di joe e prèise Jehovah ini april?
1 A psalm singiman David ben abi wan dipi angri foe prèisi Jehovah na wan fasi di Jehovah e feni boen, èn foe dati ede a ben froeklari: „Mi sa prèise Jehovah foeroe nanga mi mofo, èn na mindri foeroe pipel mi sa prèise en” (Ps. 109:30). April na wan toemoesi moi ten foe ’meki a prèise di wi e prèise en kon moro foeroe’, foe di wi e meki a prati di wi abi ini a preikiwroko kon moro bigi (Ps. 71:14). Joe e meki plan foe de na mindri den foeroe sma di e doe disi, foe di joe e moksi joesrefi nanga den groepoe foe jepipionier?
2 Meki den plan foe joe now: „Den plan foe a sma di de nanga faja seiker sa abi wini”, Odo 21:5 e memre wi. Disi e meki a de fanowdoe foe joe tjari a tori disi na Jehovah ini begi, poti en na a fosi presi foe joe plan (Odo 3:5, 6). Baka dati, ondrosoekoe finifini a schema di joe abi now, foe man sabi pe joe kan tjari kenki kon foe man wroko gemiddeld toe joeroe wan dei ini a diniwroko. A ten di joe „e bai poeroe” foe tra sani di joe e doe, e gi joe pasi foe gi moro ten na a preikiwroko. — Ef. 5:16.
3 Taki nanga makandra èn wroko nanga makandra: Na apostel Paulus ben taki foe son sma di ben de „wan jepi di e tranga” en foe man doe en diniwroko (Kol. 4:11). Taki foe den plan foe joe makandra nanga den trawan di wani gi den nen leki jepipionier ini april. A hori di den e hori baka gi joe èn a kompe di den de gi joe, kan tjari wini na jeje fasi kon gi oenoe toe. A dienst opziener kan jepi joe efoe joe abi aksi di abi foe doe nanga sani di seti gi a preikiwroko noso foe a gebied di moesoe wroko.
4 A wroko di na osofamiri e wroko makandra, nanga a hori di den e horibaka gi ibri memre, kan jepi den foe go ini a jepi-pionierwroko. Kande den osowroko moesoe prati baka gi wan pisi ten. Kande a de fanowdoe toe taki a schema foe doe den wroko disi moesoe kenki. Wan konmakandra foe na osofamiri foe taki makandra foe den fanowdoe disi, ben kan de wan jepi foe man doe san joe poti leki marki. Boen takimakandra nanga wroko makandra de tranga fanowdoe foe man abi boen bakapisi.
5 Tan abi wan positief fasi foe si sani: No de toemoesi gaw foe libi a mogelijkheid di joe abi foe go ini a jepi-pionierwroko foe di den situwâsi no boen gi joe. Jongoe sma na skoro, sma di de nanga pensjoen, oso-oema di abi pikin, osofamiri edeman di abi heri deiwroko, den alamala ben man meki na òfrandi — èn nanga prisiri — foe go ini a jepi-pionierwroko ini april. Den e agri nanga a psalm singiman taki „foe a sei foe den opregti wan, prèise e fiti”, èn den no ben si en leki wan toemoesi bigi òfrandi foe doe moro moeiti, di ben de fanowdoe foe wroko 60 joeroe ini a diniwroko (Ps. 33:1). Efoe joe no man go ini a jepi-pionierwroko, dan foe san ede joe no e teki prati ini a prisiri foe di joe e doe moro leki preikiman foe a gemeente?
6 Gi foeroe sma, jepi-pionierwroko ini april ben de wan jepisani foe go ini a gewoon-pionierwroko. Foe di den ben doe moro ini a diniwroko, den ben feni taki foe abra go na a gewoon-pionierwroko ben sori foe de moro makriki.
7 Ija, a fakansi boen foe doe moro ini a theokrasia wroko ini april. Den dei ini a fakansi e gi na okasi foe gi moro kotoigi na mamanten èn na mofoneti. Wi wani doe ala san wi man foe prèise wi Gado, Jehovah. Foe wroko leki jepipionier ini april na wan toemoesi moi fasi foe sori a warderi foe wi gi den foeroe sani foe no-froedini boen-atifasi di a doe gi wi.