Sori warderi gi na oso foe Gado
1 Ini bijbel ten, Jehovah ben komanderi a pipel foe en foe kon makandra doronomo ini na oso foe en (Lef. 23:2). Den konmakandra disi ben jepi den foe tan poti prakseri tapoe a Wortoe foe Gado, èn ben gi den ten foe prakseri dipi, foe abi demakandra, èn foe taki makandra foe a Wet foe Jehovah. A prakseri foe den ben kon foeroe nanga den prakseri foe Gado, èn disi ben tjari foeroe blesi na jeje fasi kon. Den okasi disi ben de troetroe kolokoe momenti. A seti ben meki wánfasi nanga krin anbegi go na fesi. A kon di sma e kon makandra ini na oso foe Gado ini a ten disi, no de moro mendri prenspari.
2 Fa wi kan sori taki wi e warderi den konmakandra? Son gemeente e froeteri foe a lagi nomroe foe sma di e fisiti a konmakandra. Wanwan leisi na omstandigheid foe wan sma kan tapoe en foe fisiti wan konmakandra. Ma joe meki pikinpikin problema tapoe joe foe fisiti a konmakandra doronomo? Kande sonwan e bosroiti foe tan na oso, efoe den abi wan lekti ede-ati noso efoe den weri na a kaba foe wan dei pe den ben abi foeroe foe doe. Trawan ben firi taki den abi a plekti foe tan na oso nanga famiriman di no de na bribi èn di wani fisiti den. Sonwan ben skip den konmakandra srefi soso foe loekoe wan TV programa di den lobi noso wan sport wega. A no de foe taki, dati a warderi di e sori ini den kefal disi, no de a srefi leki a dipi angri di den manpikin foe Korak ben sori: „Mi sili angri troetroe èn ben winsi toe foe de ini den fesisei djari foe Jehovah.” — Ps. 84:2.
3 Ala di wi e kisi bogobogo jeje njanjan na den konmakandra, tokoe sonwan di e fisiti den konmakandra abi problema foe poti prakseri tapoe den sani di e taki. A kan taki den e prakseri tra sani, den e prakseri foe den broko-ede foe a dei, noso den e sribi pikinso srefi. Foeroe sma si taki te den e skrifi sjatoe foe den sani di taki, dan dati e jepi den foe tan na ai èn foe poti prakseri na tapoe den sani di e taki. So toe a skrifi di sma e skrifi sani, e meki taki den e tan memre a bodoi. Moro fara, te wi e sreka wisrefi na fesi, dan dati na wan jepi foe njan boen srefisrefi. Te wi e sreka wisrefi boen, dan wi sa man „foe poti moro prakseri, dan leki fa wi gwenti”. — Heb. 2:1.
4 Pikin-nengre èn so srefi bigi sma moesoe teki a leri di gi tapoe den konmakandra. Den pikin no sa man leri foeroe srefisrefi, efoe papa nanga mama e gi den pikin preisani nanga boekoe foe kloroe, foe meki den pikin abi wan sani foe doe èn foe meki den tan tiri. A joisti tranga leri e mankeri, te den pikin e kisi na okasi foe prei, foe taki, foe krei, noso foe doe tra sani di e hendri trawan di e sidon krosibei foe den. A go di pikin e go na toilet doronomo sondro taki disi de fanowdoe, noso e go dringi watra te den konmakandra e hori, foeroetron e kon moro mendri te a pikin sabi taki a papa noso a mama e go nanga en alaten.
5 A de prenspari foe kon na a reti ten: Wanwan leisi, omstandigheid di wi no man wai pasi gi dati, kan meki taki wi no e kon froekoe tapoe wan konmakandra, ma te wi abi a gwenti foe kon lati baka a fosi singi nanga begi, dan dati e sori taki wi no abi lespeki gi a santa marki foe den konmakandra èn a frantiwortoe foe wi foe no hendri trawan. Memre taki a singi di wi e singi èn a begi di wi e begi makandra nanga den brada foe wi na den gemeente konmakandra, na wan pisi foe na anbegi foe wi. A gwenti foe kon lati, moro foeroe e kon te wan sma no e orga sani boen noso e misi foe seti sani na fesi. Te wi e kon na a reti ten, dan dati e sori taki wi e lespeki èn e warderi den konmakandra foe wi.
6 Foe di a dei e tan kon moro krosibei, meki a fanowdoe foe kon makandra kan kon moro tranga nomonomo (Heb. 10:24, 25). Meki wi sori a warderi foe wi, foe di wi e fisiti den konmakandra doronomo, e sreka wisrefi na fesi, e kon na a reti ten, e poti prakseri srefisrefi na san e taki, èn baka dati fiti den sani di wi leri ini wi libi.