Wan model foe waka finifini na en baka
1 Sondro tweifri Jesus ben de a moro bigi man di oiti ben libi. A ben gi den disipel foe en wan volmaakti eksempre. Ala di wi no man doro den volmaakti markitiki foe en, tokoe wi e kisi tranga foe „waka finifini na baka en foetoestap” (1 Petr. 2:21). Wi moesoe angri foe de neleki Jesus so foeroe leki wi man, èn de fajafaja ini a prati di wi e prati a waarheid nanga trawan.
2 Jesus ben de moro leki wan preikiman; a ben de a moro boen leriman. „Den ipi sma ben froewondroe foe a fasi fa a ben gi leri” (Mat. 7:28). Foe san ede a ben abi so boen bakapisi? Meki wi loekoe fini a ’fasi fa a ben gi leri’.
3 Fa wi kan waka baka Jesus: Jesus ben kisi leri foe en Tata (Joh. 8:28). A sani di ben poesoe Jesus ben de foe gi Jehovah grani èn gi glori na a nen foe En (Joh. 17:4, 26). A sani di moesoe poesoe wi toe ini a preiki di wi e preiki èn ini a gi di wi e gi leri, na foe gi Jehovah grani èn no foe hari a prakseri foe sma tapoe wisrefi.
4 Ala sani di Jesus ben leri, ben abi en gron tapoe a Wortoe foe Gado. Doronomo a ben sori go na san ben skrifi ini den Boekoe foe bijbel di skrifi nanga jepi foe santa jeje (Mat. 4:4, 7; 19:4; 22:31). Wi wani poti a prakseri foe den sma di e arki wi, tapoe bijbel; so boen, wi e meki den si taki san wi e preiki èn e leri abi en gron tapoe a moro hei makti.
5 Jesus ben gebroiki sjatoe, praktis wortoe di no ben de moeilek foe froestan. Foe eksempre, di a ben tjari kon na krin fa wi kan kisi pardon foe Gado, a ben gi wi deki-ati foe wisrefi gi trawan pardon (Mat. 6:14, 15). Wi moesoe proeberi foe tjari a Kownoekondre boskopoe kon na krin nanga makriki wortoe di sma kan froestan.
6 Na wan konifasi, Jesus ben gebroiki agersitori nanga aksi di ben meki trawan denki foe a tori (Mat. 13:34, 35; 22:20-22). Agersitori di abi foe doe nanga den aladei afersi kan jepi sma foe froestan moeilek bijbel leri. Wi moesoe poti aksi di e jepi wi arkiman foe prakseri foe den sani di den e jere. Aksi di e poti nanga wan bepaalde marki na prakseri, kan jepi den arkiman foe kon na a joisti bosroiti.
7 Jesus ben teki en ten foe tjari moeilek afersi kon na krin gi denwan di ben aksi moro bodoi. Denwan di troetroe ben abi belangstelling, so leki den disipel foe en, ben man foe froestan den sani di Jesus ben leri den (Mat. 13:36). Na a srefi fasi wi moesoe wani foe jepi sma, te den e poti aksi na wan opregtifasi. Efoe wi no sabi den piki, dan wi kan ondrosoekoe a tori èn go baka nanga a bodoi tapoe wan tra ten.
8 Jesus ben gebroiki sani di sma ben kan si nanga den ai, foe gi leri. Wan eksempre foe disi ben de a wasi di a ben wasi den foetoe foe den disipel foe en, ala di a ben de a Meester foe den (Joh. 13:2-16). Efoe wi e sori wan jeje foe sakafasi, dan dati sa poesoe denwan di e kisi leri, foe fiti den sani di den e leri ini a libi foe den.
9 Jesus ben soekoe foe doro na ati foe sma èn a lobi di den sma lobi regtfardikifasi. Wi wani foe doro den ati foe sma toe. Wi e proeberi foe doro na angri di ala sma kisi sensi den gebore, foe anbegi wan moro hei sma èn foe libi nanga trawan ini vrede nanga kolokoe.
10 Ini december wi kan prati nanga trawan den sani di wi leri foe Jesus, foe di wi e pristeri a boekoe De grootste mens die ooit heeft geleefd (A moro bigi man di oiti ben libi). A waka di wi e waka baka den fasi fa Jesus ben gi leri, kan poesoe opregti sma foe arki te wi e tjari kon na krin san a ben leri. — Mat. 10:40.