Jepi den foe jere „na wan tra ten”
1 „Wi sa jere foe joe foe disi na wan tra ten” (Tori. 17:32). Dati na san wan toe sma ben taki tapoe a barinen takimakandra foe Paulus tapoe a pikin bergi, Mars. So srefi ini a ten disi, sonwan wani foe jere moro foe a Kownoekondre boskopoe di wi ben prati nanga den na wi fosi fisiti.
2 Moro foeroe foe a leri di wi e gi, e doe te wi e go baka foe kweki belangstelling na den sma. Te wi sreka wisrefi boen, dan dati sa jepi wi foe kisi boen bakapisi. Bladzijde 50 nanga 51 foe a Handleiding-boekoe (Handleiding gi a Theokrasia Diniwroko-Skoro-boekoe) e gi a rai: „Na a fosi presi, joe moesoe kon froestan heri boen den penti di joe wani foe taki foe den èn di e horibaka gi a materiaal. Proeberi foe kon sabi, foe san ede den penti disi tjari kon na fesi. Loekoe efoe joe kan taki den idea disi nanga joe eigi wortoe. Kon froestan den boeweisi di abi den gron tapoe bijbel, heri boen. De srekasreka foe gebroiki den bijbeltekst nanga boen bakapisi.”
3 Efoe joe ben libi a boekoe „De bijbel — Gods woord of dat van mensen? (Bijbel — Gado wortoe noso di foe libisma?)”, dan joe ben sa kan taki so wan sani:
◼ „Di wi ben taki a lasti leisi, dan wi ben taki foe den reide di wi abi foe froetrow ini bijbel. A boekoe di mi ben libi na baka gi joe, e poti na aksi: ’Foe san ede leisi bijbel?’ [Leisi na inleiding tapoe bladzijde 5, èn gi okasi foe piki tapoe a lasti aksi ini na inleiding.] Bijbel e froeteri wi taki heri esi Gado srefi sa loesoe ala den problema di e dangra libisma famiri, èn bijbel e sori san wi moesoe doe foe njanboen foe den blesi foe a kolokoe ten dati. [Leisi Psalm 119:105.] A boekoe disi meki leki wan jepi gi sma foe studeri bijbel persoonlijk èn gi osofamiri foe studeri bijbel. Mi ben sa prisiri foe sori joe fa foe gebroiki en.”
4 Na den fisiti pe joe ben libi a traktaat „Waarom u in de bijbel kunt geloven (Foe san ede joe kan bribi bijbel)”, joe ben kan taki disi:
◼ „Wi alamala wani sabi san o pasa ini a ten di e kon. Te wi e loekoe a fasi fa a situwâsi de now na grontapoe, san joe prakseri o pasa? [Gi okasi foe piki.] Ala di libisma soso kan prakseri san o pasa, Gado sabi soifri san sa pasa. [Leisi Jesaja 46:10.] A kan froewondroe joe, foe kon sabi taki bijbel e taki na fesi, dati heri esi wi sa njanboen foe den blesi foe wan paradijs njoen grontapoe. [Leisi a di foe dri paragraaf tapoe bladzijde 4.] Meki mi froeteri joe moro foe a heri moi pramisi disi.”
5 Efoe joe e go baka na wan presi pe joe ben libi a „Nieuwe-Wereldvertaling (Njoen-Grontapoevertaling)” na baka, dan kande a rai disi sa abi boen bakapisi gi joe:
◼ „No so langa pasa, mi ben libi wan eksemplaar foe bijbel gi joe, èn mi ben pramisi taki mi ben sa kon baka foe jepi joe gebroiki bijbel na wan moro boen fasi. Sontron wi kan aksi wisrefi, fa wi kan tan abi switi matifasi nanga trawan. Bijbel e pristeri boen rai, èn a Nieuwe-Wereldvertaling e meki en moro makriki foe wi feni san wi abi fanowdoe. [Go na bladzijde 1589 èn loekoe na ondrotitel „Liefde (Lobi)”. Poti prakseri tapoe den tekst so leki 1 Korentesma 13:4; Kolosesma 3:14; nanga 1 Petrus 4:8. Tjari sjatoe kon na krin fa a fiti di wi e fiti den gronprakseri disi ini wi libi, kan abi boen bakapisi.] Disi na wan eksempre di e sori fa bijbel e pristeri praktis loesoe gi den problema foe wi. Wan tra leisi, mi ben sa wani sori joe wan tra fasi fa bijbel kan jepi wi feni kolokoe nanga vrede foe jeje.”
6 Wan moro bigi goedoe wi no kan gi sma leki a gi di wi e gi den wan soifri sabi foe a Wortoe foe Gado. So wan sabi kan leri sma foe frede Jehovah èn gi den deki-ati foe waka a pasi foe en, èn disi sa tjari têgo blesi kon. — Odo 2:20, 21.