Bijbel — Fonten foe trowstoe nanga howpoe ini wan grontapoe di lai nanga problema
1 A grontapoe disi e meki a libisma famiri ondrofeni hebi druk èn a e meki taki sma abi trowstoe nanga howpoe fanowdoe. Bijbel na a wan-enkri fonten foe kisi troetroe trowstoe. A e gi howpoe foe wan njoen grontapoe pe regtfardikifasi sa de (Rom. 15:4; 2 Petr. 3:13). A Hulp-boekoe, Pisi 1, bladzijde 192, e taki: „Sondro bijbel wi no ben o sabi Jehovah, wi no ben o sabi den toemoesi moi winimarki di e kon foe a froeloesoe-paiman foe Krestes, èn wi no ben o froestan den sani di wi moesoe doe foe kisi têgo libi, leki wan memre foe a regtfardiki Kownoekondre foe Gado noso leki wan borgoe ondro a Kownoekondre disi.”
2 Ini november wi sa poti spesroetoe prakseri tapoe a rol di Gado Wortoe, bijbel, e plèi foe jepi sma foe man kakafoetoe gi den problema di e kon foe grontapoe. Wi sa pristeri a Nieuwe-Wereldvertaling van de Heilige Schrift (Njoen-Grontapoevertaling foe den Santa Boekoe foe bijbel) nanga a boekoe De bijbel — Gods woord of dat van mensen? (Bijbel — Gado wortoe noso di foe libisma?). San wi kan taki foe jepi ibriwan sma aparti di wani de troetroe opregti, foe meki den kon warderi a warti di bijbel warti?
3 Baka te joe taki soema na joe, joe ben kan taki so wan sani:
◼ „A no de foe taki, dati joe sa agri taki wi abi foe doe nanga foeroe problema di gersi leki den e poeroe a vrede foe wi jeje. Pe wi kan feni praktis rai foe sori wi fa foe kakafoetoe gi den problema disi? [Gi okasi foe piki.] Mi kon si taki bijbel e gi wi deki-ati baka, foe di a e leri wi fa wi kan de kolokoe. [Leisi Lukas 11:28.] A marki foe wi wroko na foe gi sma deki-ati foe leisi bijbel èn foe njanboen foe a bodoi foe en. A jepi disi foe froestan bijbel, De bijbel — Gods woord of dat van mensen? (Bijbel — Gado wortoe noso di foe libisma?), kan jepi joe foe doe dati. Loekoe san e tjari foeroe foe den problema na grontapoe kon, so leki fa a boekoe e taki. [Leisi a di foe toe zin foe paragraaf 9 tapoe bladzijde 187.] Efoe joe ben sa wani foe leisi a boekoe disi, mi ben sa prisiri foe libi na eksemplaar disi gi joe.”
4 Joe sa kan froekisi foe gebroiki wan eenvoudig fasi foe bigin, so leki a wan disi:
◼ „Wi abi belangstelling foe tranga sma foe abi moro respeki gi Gado Wortoe, bijbel. Mi ben sa wani foe gi joe wan eksemplaar foe a traktaat disi, Waarom u in de bijbel kunt geloven (Foe san ede joe kan bribi bijbel). A e tjari kon na krin foe san ede wi kan loekoe go na bijbel foe feni wan seiker howpoe gi wan moro betre grontapoe. [Go na bladzijde 6, èn leisi Psalm 37:29 makandra nanga a lasti paragraaf.] Leisi a traktaat disi gi joesrefi, èn a tra tron te mi o fisiti joe, dan meki mi kon sabi san joe e denki foe a howpoe di bijbel e pristeri.”
5 Kande son preikiman wani foe gebroiki a fasi disi foe bigin wan bijbelstudie wantewante:
◼ „Mi wani foe pristeri joe wan oso-bijbelstudie foe soso. Bijbel skrifi nanga jepi foe Gado en santa jeje, èn a bodoi foe bijbel kan jepi wi foe poti sani kon reti. A disiten tongo foe a Nieuwe-Wereldvertaling van de Heilige Schrift (Njoen-Grontapoevertaling foe den Santa Boekoe foe bijbel) meki foe joesrefi kan studeri en. A sori foe de pôpi na miljoenmiljoen sma di e leisi bijbel na grontapoe. Meki mi demo sjatoe fa joe kan gebroiki en. [Go na bladzijde 1657, èn poti prakseri tapoe 27A. Akroederi a belangstelling di a sma e sori, dan loekoe wan toe foe den bijbeltekst di kari drape èn takimakandra foe a penti di e kon na fesi drape. Froeteri fa a loekoe di wi e loekoe den tekst di kari, e tjari kon na krin san Gado abi na prakseri foe doe nanga jepi foe a Kownoekondre foe en.] Mi ben sa breiti foe kon baka èn taki moro fara foe a Kownoekondre howpoe disi.”
6 Bijbel na a fonten foe trowstoe nanga howpoe èn foe waarheid toe, di sa tjari wi têgo libi (Joh. 17:3, 17). Te joe e prati a leri foe bijbel nanga trawan, dan dati na wan sani di e plisi Jehovah, „di wani dati ala sortoe foe libisma moesoe kisi froeloesoe”. — 1 Tim. 2:4.