A waarde foe bijbel ini a grontapoe foe a ten disi
1 Foeroe sma ini a ten disi e si bijbel leki wan owroe boekoe di no de troetroe. Ala di a de a boekoe di panja na ala sei moro ala tra boekoe èn a de a boekoe di vertaal moro ala boekoe ini historia, pikinso sma nomo e leisi bijbel, èn moro pikinso sma e waka na baka a tiri foe en ete.
2 Na a tra sei, wi e si bijbel leki a Wortoe foe Gado. Den troetori e sori taki a troe na historia sei. Boiti dati, na aparti fasi fa a de ini wánfasi, den profeititori foe en, a koni foe en, èn a de di a de wan krakti di e tjari wini kon ini a libi foe sma, e sori taki „Gado skrifi bijbel nanga jepi foe santa jeje” (2 Tim. 3:16). Wi eigi ondrofeni èn a warderi di wi abi gi a toemoesi moi presenti disi moesoe boeweigi wi foe gi tra sma a deki-ati foe go ondrosoekoe en troetroe waarde.
3 Wán fasi foe doe dati kan de:
◼ „Te foeroe sma e si den serjoesoe problema di a libisma famiri e ondrofeni, dan den e feni en wan moeilek sani foe bribi ini Gado noso den e tweifri na a man di Gado man loesoe den problema di wi e ondrofeni. Fa joe e denki foe dati? [Gi okasi foe piki.] Loekoe a nen foe a traktaat disi: Foe san ede joe kan froetrow ini bijbel.” Poti a prakseri na tapoe a prenki na fesisei èn leisi baka dati a fosi èn a di foe toe paragraaf na tapoe bladzijde 2. Efoe na ososma e sori belangstelling, joe kan leisi èn taki foe den bijbeltekst di den e kari ini a di foe toe paragraaf. Seti sani foe go baka foe loekoe a traktaat moro fara - kande joe kan gebroiki wan foe den ondro-edewortoe leki wan aksi, so taki joe kan wiki a belangstelling.
4 Wan tra fasi kan de wan sani leki disi:
◼ „Joe no e agri taki a libisma famiri abi tiri fanowdoe foe kan handri nanga problema ini a libi? [Gi okasi foe piki.] Ini a ten di pasa, sma nofotron ben loekoe go na bijbel foe kisi tiri, ma ten kon kenki. Joe denki taki bijbel abi praktis waarde ini a ten disi? [Gi okasi foe piki.] Loekoe san skrifi ini 2 Timoteus 3:16. [Leisi.] Gado skrifi Wortoe no wawan e jepi wi foe teki koni bosroiti, ma a e gi wi troetroe howpoe toe gi a ten di de na wi fesi.” Leisi Johanes 17:3. Efoe na ososma e piki boen, poti krakti na tapoe wán noso toe spesroetoe penti di joe ben teki na fesi kaba, foe a boekoe Bijbel—Gado Wortoe noso di foe libisma? foe sori a praktis waarde foe bijbel.
5 Kande joe e feni en wan jepi foe gebroiki wan toe foe den biginwortoe di skrifi na tapoe bladzijde 10 foe a Taki-go-taki-kon-boekoe ondro na ondro-edewortoe „Bijbel/Gado”. Den e pristeri tra bodoi na tapoe bladzijde 68-78 di kan jepi joe foe piki den aksi foe den ososma noso foe wini den gens-aksi foe den.
6 Pristeri a Njoen Grontapoevertaling: Efoe nofo belangstelling wiki na a fosi fisiti noso di joe ben go baka na a sma, dan joe kan meki a sma kon sabi a Njoen Grontapoevertaling. Joe kan aksi efoe na ososma abi wan eksemplaar foe bijbel èn efoe a e feni en makriki foe leisi en. A e anga foe a piki foe a sma, foe poti a prakseri na tapoe wan toe foe den spesroetoe sani foe a Njoen Grontapoevertaling di kan de wan jepi. Joe ben kan poti a prakseri na tapoe wán noso toe penti foe bladzijde 305-309 foe a Taki-go-taki-kon-boekoe.
7 De na ai gi okasi foe gi sma deki-ati foe leisi bijbel. Jepi sma di abi belangstelling foe bow respeki èn lobi gi a skrifi Wortoe foe Gado. Efoe den e poti den gronprakseri foe en na ini den eigi libi èn e kon sabi a waarheid, dan den sa kisi foeroe wini now èn ini a ten di de na wi fesi.—Ps. 119:105.