Rikomanderi a Wortu fu Gado
1 Furu sma e feni a beibri now leki wan owrumodo sani èn wan sani di no abi fu du nanga a trutru libi. Ma a Wortu fu Gado abi krakti fu kenki sma libi (Hebr. 4:12). Disi kon na krin na ini a denki, na waka nanga libi èn na yeyefasi di kon moro bun fu wan bigi grupu fu difrenti sortu sma (Ef. 4:24). Na poti fu beibri rai na ini yu libi e meki wan koloku osofamirilibi kon. A e meki a matifasi go a fesi a mindri birti, awinsi sortu ras, skin kloru ofu maatschappelijk posisi den abi. — Luk. 10:29-37.
2 Wi eigi ondrofeni nanga a Wortu fu Gado musu pusu wi fu gi trawan deki-ati fu den srefi ondrosuku a beibri tapu en trutru waarde. Wan tumusi moi fasi fu kan du disi de ini wi nyun Tori fu takimakandra, „Fu san-ede yu musu leisi a beibri?”. Fa wi kan kobroiki a tori disi, makandra nanga na Nyun-Grontapuvertaling (na ini Bakratongo) èn na Driwanfasi- ofu na „Luku!”-brochure, na ini december na ini wi diniwroko?
MEKI KOBROIKI FU NA TORI FU TAKIMAKANDRA
3 Baka wantu wortu na a bigin yu ben sa kan taki: „Fu di osofamiri de now na ondro someni druk nanga problema, meki wi e fisiti yu na yu oso fu poti prakseri na tapu na wán enkri trutru fonten fu praktis yepi. Fositen den sma nofotron ben luku go na a beibri fu kisi tiri, ma den ten kon kenki, yu no feni tu? Yu denki taki a beibri kan yepi fu lusu den sortu disiten problema leki a fowtu kobroiki fu drug, ogridu nanga osofamiri di panya? [Gi okasi fu piki.] Luku pikinso san a beibri e taki na ini 2 Timoteyus 3:16. [Leisi.] Yu denki taki a beibri kan abi so wan krakti fu sani kon bun baka? [Gi okasi fu piki.] Moro furu sma wani sôte na wan ofu tra fasi fu tiri te den kon tanapu na ini den libi na fesi problema ofu musu teki bosroiti, a no so? Luku pikinso, te wi waka na baka na Wortu fu Gado, pe a kan tyari wi go. [Leisi Yohanes 17:3.] A beibri e gi na wan krin fasi tiri ini a lusu fu eigi problema èn a e gi wan fasti howpu fu a ten di e kon.” Efu a sma abi belangstelling fu frustan moro fu a Wortu fu Gado, dan wi ben kan sori na waarde fu na Nyun-Grontapuvertaling ofu fu wan fu den brochure.
4 Aksi te yu e tyari na Nyun-Grontapuvertaling kon a fesi, efu na ososma en srefi abi wan beibri èn efu a e feni dati makriki fu leisi. Yu ben kan poti en prakseri na tapu wantu fu den bun pisi fu na Nyun-Grontapuvertaling, so leki a modern tongo di a e kobroiki èn a poti di a poti a nen fu Gado kon baka na ini a beibri, èn disi o anga fu fa a sma o piki. Kande yu e feni en wan bun sani tu fu kobroiki wan ofu tu penti tapu bladzijde 305-309 fu na Taki-go-taki-kon-buku. Pristeri den sma di e sori belangstelling fu abi wan eigi osobeibristudi.
5 Te yu e poti prakseri na tapu na Driwanfasi-brochure, yu ben sa kan taki: „Furu opregti sma den leri fu bribi na ini wan Driwanfasi, ma den e feni en wan muilek sani fu frustan en. Na brochure disi e go finifini tapu na tori fu na Driwanfasi, ala di a e luku na tori fu na sei fu na historia èn so srefi ini a leti fu san a beibri e taki. Yu ben sa wani leisi en?” Efu yu e kobroiki na „Luku!”-brochure, dan kande yu ben kan wiki a belangstelling fu na ososma fu di yu kan poti en prakseri tapu na moi fesisei blad ofu na edeprakseri „Ogri sani — Fu san-ede Gado e gi pasi fu den de?” tapu bladzijde 14 (ini Bakratongo noso bladzijde 6 ini Sranantongo).
6 Opo yu ai na ini december gi okasi fu gi sma tranga fu leisi a beibri. De gaw fu fisiti den sma baka di sori belangstelling. Yepi den fu kweki wan opregti warderi gi na krakti fu na Wortu fu Gado. Te den poti den gronprakseri fu en na ini den libi, dan den sa kisi wini di e tan na ini a disiten libi èn na ini a libi di e kon. — 1 Tim. 4:8.