A boekoe di e gi troetroe tiri
1 Grontapoe kenki foeroe ini a jarihondro di pasa. Ala di den ben go na fesi tapoe a kontren foe komunikâsi, datratori, nanga transport, a waarde foe na osofamiri libi ben go na baka doronomo. Miljoenmiljoen sma e gi densrefi pasi foe kisi tiri foe a filosofie foe libisma di e kenki doronomo.
2 Ini a grontapoe disi pe sani e kenki esi-esi, Jehovah pipel ben abi foeroe wini, foe di den ben hori densrefi tranga na a Wortoe foe en. Doesoendoesoen jari langa bijbel tan a srefi, èn a rai foe en de te now ete a moro praktis wan foe kakafoetoe gi problema di wi e ondrofeni ini a ten disi. Fa wi kan jepi sma di abi belangstelling foe froestan taki bijbel e gi troetroe tiri ini a ten foe wi?
3 Efoe joe ben libi a traktaat „Foe san ede joe kan froetrow ini bijbel” na a fosi fisiti, joe kan go baka èn taki:
◼ „Foe di bijbel e taki krin taki a de wan boskopoe foe Gado srefi èn e taki dati a e pristeri wi têgo libi, efoe wi e bribi èn e libi akroederi san a e taki, joe abi a firi taki a ben sa de wan warti sani foe leri moro foe den sani disi? [Gi okasi foe a sma taki wan sani.] Loekoe san bijbel e froeteri na fesi ini a tori foe a disiten grontapoe seti foe sani. [Leisi 2 Timoteus 3:1-5 langalanga foe bladzijde 5 foe a traktaat.] Joe e denki taki san den skrifi djaso e fiti a grontapoe foe a ten disi? [Gi okasi foe a sma taki wan sani.] Wan boen reide de foe froewakti taki moro betre kondisi sa kon ini a ten di de na wi fesi?” Dan joe kan poti wan fondamenti gi wan tra fisiti, foe di joe e taki foe den lasti toe paragraaf foe a traktaat noso foe di joe e gebroiki bladzijde 161 foe a boekoe Bijbel—Gado Wortoe noso di foe libisma? (Bakratongo) èn e poti krakti na tapoe a toemoesi moi howpoe di bijbel e poti gi a libisma famiri.
4 Efoe na ososma ben abi belangstelling gi a praktis waarde foe bijbel èn joe ben tjari spesroetoe gronprakseri kon na krin ini kapitel 12 foe a boekoe „Bijbel—Gado Wortoe noso di foe libisma?”, joe kan taki:
◼ „Wi abi belangstelling gi sani di wi kan gebroiki ini a ten disi, a no so? Joe ben sa agri taki efoe orlokoe ben sa tjari kon na wan kaba, taki dati ben sa de wan praktis sani? [Gi okasi foe a sma taki wan sani.] Efoe sma ben leri foe libi nanga makandra in vrede nanga sma foe tra nâsi, disi ben sa de wan boen bigin, a no so? [Gi okasi foe a sma taki wan sani.] Dati na joisti san bijbel ben taki na fesi. [Leisi Jesaja 2:2, 3.] Joe ben aksi joesrefi wan leisi kaba fa èn oten disi sa de so?” Tjari kon na krin taki joe ben sa wani foe taki moro fara foe na aksi disi na wan ten di moro boen gi na ososma.
5 Efoe joe ben libi a „Njoen Grontapoevertaling” na baka, joe kan drai go baka èn taki:
◼ „Di joe ben e leisi a bijbel di mi ben libi gi joe, joe ben si kande, taki a e gebroiki a persoonlijk nen foe Gado doronomo. Disi na wan prenspari sani di e meki taki wi de na fesi foe foeroe tra bijbel vertaling. Ala di wan toe sma e draidrai kande foe gebroiki a nen Jehovah, wi moesoe hori na prakseri taki a ben tjari a nen foe en kon na krin someni langa pasa kaba èn a ben gi den foetoeboi foe en a deki-ati foe gebroiki a nen foe meki sma kon sabi en leki a troe èn libi Gado. Loekoe san a psalm singiman ben skrifi na Psalm 83:18.” Leisi a tekst èn gi na ososma na okasi foe taki wan sani. Ini akroederi nanga a belangstelling di sori, joe kan gebroiki tra bodoi di de foe feni na ondro a thema „Jehovah”, di e bigin na tapoe bladzijde 208 foe a Taki-go-taki-kon-boekoe.
6 Bijbel wawan e gi a tiri di libisma abi fanowdoe (Jer. 10:23). Foe studeri Gado Wortoe na a wanenkri fasi foe leri foe den marki di A abi na prakseri èn foe kisi a boen-ati foe En. Foe dati ede, meki wi gi fajafaja kari na tra sma foe abi wini foe a koni èn praktis rai foe bijbel.