Jepi trawan foe kon sabi wan bigi goedoe
1 Te wi e preiki a boen njoensoe foe a Kownoekondre gi trawan, dan wan foe den marki foe wi moesoe de foe jepi opregti sma foe warderi a toemoesi boen waarde foe a Wortoe foe Gado (Fil. 3:8). A lektuur foe wi di abi bijbel leki gron, e prei wan prenspari ròl te wi e panja a Kownoekondre boskopoe. A Libi foe têgo-boekoe foe eksempre, ben jepi hondrohondro doesoen sma foe dini Jehovah leki a baka pisi foe den bijbel waarheid di den ben leri.
2 A diniwroko foe wi wani taki moro leki soso a libi na baka foe boekoe na sma di ben wani teki en. Wi moesoe pristeri a boskopoe tapoe wan fasi di e hari sma prakseri, wi moesoe arki nanga a man di wi man foe si fa foe doe na den sani di na ososma e taki èn baka dati wi moesoe de klari foe ’taki-go-taki-kon nanga en nanga jepi foe den Boekoe’.—Tori. 17:2.
3 Fa wi kan doe disi? Den inleiding foe wi kan opo a pasi gi den ososma foe sori efoe den abi troetroe belangstelling gi bijbel nanga a boskopoe di de na ini.
Joe ben sa kan taki:
◼ „Wi e fisiti joe foe taki nanga joe foe den sani di e feni presi now lontoe wi na grontapoe èn san den wani taki. Foeroe sma no abi someni belangstelling moro gi Gado èn gi den markitiki foe en gi a libi, so leki fa disi poti a krin na ini bijbel. Disi ben abi bigi krakti tapoe a fasi fa sma e tjari densrefi nanga makandra. Joe ben si dati doe? [Gi okasi foe gi komentaar. Joe kan kari spesroetoe eksempre.] Grantangi, loekoe a fasi fa den sma e tajri densrefi di kari na 2 Timoteus 3:1-5, èn taigi mi efoe joe denki, taki disi e sori a fasi fa grontapoe de tide. [Leisi; gi okasi foe gi komentaar.] Wan boen reide de foe froewakti taki den fasi sa kon moro betre ini a ten di e kon?” Efoe a sma e sori belangstelling, dan sori a prenki tapoe bladzijde 12 nanga 13 foe a Libi foe têgo-boekoe èn poti prakseri tapoe paragraaf 12 nanga 13. Efoe a belangstelling no de so foeroe, dan wi ben kan pristeri a Njoen grontapoe foe vrede-traktaat.
4 Efoe wan papa noso mama e kon na a doro, wi ben kan bigin wi takimakandra na a fasi disi:
◼ „Wi e taki nanga sma di abi belangstelling gi wan fasi foe kan kakafoetoe moro boen gi den problema foe na osofamiri libi. Wi alamala e proeberi foe doe san wi man, ma efoe wan sani de di kan jepi wi foe abi moro boen bakapisi, dan wi abi belangstelling gi dati, a no so? [Gi okasi foe piki.] Bijbel e gi tiri lin ini a tori disi, so leki wi kan feni ini Kolosesma 3:12-14. [Leisi.] So boen, san de fanowdoe foe abi wan osofamiri libi di e waka boen? Loekoe san skrifi ini a boekoe disi ini a kapitel di nen ’Meki na osofamiri libi waka boen’”. Leisi paragraaf 3 tapoe bladzijde 238 foe a Libi foe têgo-boekoe. Efoe na ososma abi en druk noso e draidrai pikinso, dan proeberi foe pristeri wan njoen tijdschrift di e taki foe osofamiri afersi noso a traktaat Njanboen foe na osofamiri libi.
5 Wi no wani frigiti noiti nanga sortoe marki wi e gi wan finifini kotoigi foe a Kownoekondre (mat. 24:14). Efoe wi meki boen gebroiki foe bijbel nanga den toemoesi moi seti foe theokrasia boekoe di wi kan kisi, dan wi kan loekoe nanga froetrow na Jehovah foe en blesi ini a doe foe en wani ini den prenspari ten disi.—Gal. 6:9.