Go baka foe wiki belangstelling gi bijbel moro fara
1 Sontron wi e miti sma na ini velddienst, di e sori pikinso belangstelling gi a boen njoensoe, ma di wroko e kiri den so te, dati den no kan taki nanga wi na a ten di wi e naki na den doro. Wi e doe moeiti foe go baka wan tra leisi foe prati a Kownoekondre boskopoe nanga den? Noso kande wi abi wan moi takimakandra nanga wan ososma, ma a no e teki no wan boekoe. Wi e go baka foe taki moro fara nanga en foe a waarheid?
2 A de prenspari foe wroko a gebied foe wi finifini èn foe go baka na ala sma di sori belangstelling. Wi e go baka soso na den sma di teki wan boekoe noso den tijdschrift? Efoe dati de so, dan a kan taki wi no e si wan toe sma di abi belangstelling. Foe troe wi no ben sa wani kroetoe wan sma taki a no warti foe gi en deki-ati na jeje fasi moro fara, soso foe di a no ben teki boekoe. (Teki gersi Romesma 14:4.) A kande so taki baka a fisiti foe wi, wan ososma kan go prakseri foe san wi ben taki èn kan kisi warderi gi a moeiti di wi ben doe foe fisiti en. A kan taki a e firi moro foe arki te wi e go baka.
3 Te joe e go baka na wan sma di wroko ben kiri en, dan joe ben sa kan taki:
◼ „Mi breiti foe si joe baka. A lasti leisi di mi ben de djaso, wi no ben kan taki bikasi joe no ben abi ten. Mi e froestan taki joe na wan sma di abi foeroe foe doe èn mi sa meki en sjatoe. Leki fa a sori dan joe e broko joe ede nanga wan boen gosontoe gi joesrefi èn gi den wan di joe lobi. We, joe ben sabi taki Gado ben pramisi foe tjari wan kaba kon na ala siki? Dati no ben sa de wan toemoesi moi sani? [Gi okasi foe piki.] Loekoe a penti ini paragraaf 4 foe a brochure disi di nen ’Loekoe! Mi e meki ala sani njoen’” Efoe joe abi a ten, dan leisi a paragraaf na bladzijde 4, di e sori fa a situwâsi o de ini a njoen grontapoe. Efoe na ososma e opo ensrefi foe teki san joe e froeteri en, dan kande joe man bigin wan oso-bijbelstudie.
4 Te joe e fisiti wan sma baka, di ben teki wan traktaat, joe ben kan taki wan sani leki disi:
◼ „A tra leisi di mi ben miti joe, joe ben teki wan foe a traktaat disi di abi leki nen Soema troetroe e tiri a grontapoe? Joe feni en wan moeilek sani foe agri taki na Satan e tiri a grontapoe disi? [Gi okasi foe piki.] Loekoe a fosi paragraaf na bladzijde 6.” Leisi a paragraaf, èn aksi baka dati: „Foe san ede Satan ben sa wani foe bedrigi wi?” Baka te na ososma piki, dan loekoe makandra a di foe fo paragraaf na bladzijde 3. Joe ben sa kan go doro foe behandel a heri traktaat, noso kande joe wani sori en a brochure Gado e broko-ede troetroe nanga wi? èn taki foe paragraaf 8 na bladzijde 13.
5 Boen reide de foe de positief èn foe go baka na den sma di sori belangstelling ini wi preikiwroko, srefi efoe den no sori disi foeroe. A de prenspari foe broko wi ede nanga trawan, taki sani e boeweigi wi ati foe jepi den foe kon sabi waarheid. Jehovah en organisâsi e gi wi boekoe nanga bodoi foe den presenteri di kan jepi wi foe meki trawan kon si den fanowdoe na jejefasi.—Mat. 5:3.
6 Efoe joe ben abi wan prisiri takimakandra nanga wan sma di abi wan frafra belangstelling nomo, dan no tapoe joesrefi foe go baka foe meki a belangstelling gro moro fara. Dati kan abi leki bakapisi taki joe e bigin wan oso bijbelstudue èn e poti wan sma na tapoe a pasi foe libi. Wi e gi ala sma deki-ati foe go doro foe abi wan opregti prati ini a wroko disi, di e kibri libi.—1 Tim. 4:16.