Gi den sma tranga foe tron foetoeboi foe en
1 Na 1 Korentesma 3:6, Paulus ben skrifi: „Mi ben prani, Apollos ben gi watra, ma Gado ben tan meki a gro.” Paulus ben gebroiki a fasi disi foe taki-go-taki-kon foe jepi den brada foe en, meki den si taki a de fanowdoe foe den wroko na ini wánfasi ondro na edeman Krestes. Na a fasi disi Paulus ben jepi den toe, foe warderi a prenspari rol di den ben plèi ini a prenspari wroko foe prani èn foe gi watra.
2 A wroko dati di e kibri a libi foe sma, sa kon na wan kaba ini a ten disi. Leki kresten di gi densrefi abra, wi abi a serjoesoe frantiwortoe foe jepi trawan tron foetoeboi foe Jesus (Tori. 13:48). Fa joe sa go doro nanga a belangstelling di joe ben man wiki na a sma, foe di joe e gebroiki a boekoe De grootste mens die ooit heeft geleefd (A moro bigi man di oiti ben libi)?
3 Efoe joe e go baka foe fisiti wan sma di ben teki a boekoe, dan joe ben sa kan taki:
◼ „Di wi ben taki a lasti leisi, wi ben taki fa Jesus ben de leki wan man. Mi ben breiti foe libi a boekoe De grootste mens die ooit heeft geleefd (A moro bigi man di oiti ben libi) na baka gi joe. Sortoe sani ben hari joe prakseri moro foeroe foe a fasi fa Jesus ben gi leri èn a fasi fa a ben de?” Gi okasi foe piki. Go na kapitel 113, èn taki foe a toemoesi boen eksempre foe sakafasi di Jesus ben gi. Leisi Filipisma 2:8 foe sori fa na apostel Paulus ben si a sakafasi foe Jesus. Baka dati joe ben kan tjari kon na krin fa wi kan leri moro nanga jepi foe wan bijbelstudie tapoe wan fasti ten.
4 Kande joe wani gebroiki na inleiding disi:
◼ „Wi ben taki foe sani di Jesus ben doe di a ben de na grontapoe. Den sani disi e sori taki Jesus troetroe e broko en ede nanga wi. San joe prakseri a sa doe te foe kaba foe tjari froelekti gi denwan di njanpina so foeroe?” Gi okasi foe piki. Go na kapitel 133, èn loekoe sjatoe den komentaar baka ini a di foe feifi paragraaf. Go na a prenki na tapoe a tra bladzijde, èn tjari kon na krin fa a sa de te a wani foe Gado e doe na grontapoe neleki na hemel. Sori tapoe den winimarki di sa kon te wi e leri moro.
5 Efoe a fosi leisi a sma no ben abi nofo belangstelling foe teki a boekoe, dan kande joe kan bigin joe takimakandra na so wan fasi:
◼ „Mi denki taki wi ala toe sa agri taki foeroe sma ini a ten disi e tjari a libi foe den na so wan fasi, taki den e waka baka wan sma di den e si leki a model foe den. Jesus Krestes na a moro boen model di wan sma ben sa kan abi. Mi sa wani meki joe kon sabi wan prenspari sani di mi ben leri, foe di mi ben e studeri na eksempre di Jesus ben poti. [Go na kapitel 40 ini a Grootste mens-boekoe (A moro bigi man-boekoe), èn poti prakseri na tapoe a switifasi fa Jesus ben leri sma foe abi sari-atifasi.] Na wan kraktifasi disi ben memre mi, ofoeroe mi moesoe sori na eigifasi disi te mi e handri nanga tra sma.” Leisi Mateus 5:7. Efoe a gersi taki a belangstelling foe a sma kon moro bigi, dan pristeri a brochure Bekommert God zich werkelijk om ons? (Gado e broko en ede troetroe nanga wi?)
6 Noso kande joe wani foe proeberi a fasi disi foe bigin sondro draidrai:
◼ „A lasti leisi di mi ben de djaso, wi ben taki o prenspari a de foe kon sabi foe Jesus. Johanes 17:3 e taki dati a ’wani taki têgo libi’ te wi e kisi so wan sabi. Fa wi kan doe dati?” Gi okasi foe piki. Go moro fara nanga a tjari di joe e tjari kon na krin fa wi seti sani gi wan bijbelstudie èn fa a sma kan meki gebroiki foe dati.
7 Paulus e taki dati wan wrokoman ini a kotiwroko „sa kisi en pai akroederi en eigi wroko” (1 Kor. 3:8). Efoe wi e doe boen foeroe moeiti foe jepi trawan tron bakaman foe Jesus, dan seiker a pai di wi sa kisi sa bigi.