Gi trawan wan kari foe waka na baka a moro bigi man
1 So leki fa a skrifi na Mateus 5:14, Jesus ben taigi den disipel foe en: „Oenoe na a leti foe grontapoe.” Den bakaman foe Jesus ben moesoe taigi sma na ala presi foe a Kownoekondre foe Jehovah èn foe a froeloesoe di A gi na wan lobifasi nanga jepi foe Jesus. Nanga a komando dati ini prakseri, wi wani pristeri a boekoe De grootste mens die ooit heeft geleefd (A moro bigi man di oiti ben libi) ini december. Djaso wan toe rai de, di kande joe wani gebroiki.
2 Baka di joe taki soema joe de, dan joe ben sa kan taki nanga joe eigi wortoe san e kon now:
◼ „Foeroe sma ben aksi densrefi fa Jesus ben de di a ben libi leki wan man tapoe a grontapoe disi. Na sortoe fasi joe denki taki a ben difrenti foe tra sma? [Gi okasi foe piki.] A moi boekoe disi, De grootste mens die ooit heeft geleefd (A moro bigi man di oiti ben libi), e froeteri den heimarki foe a libi nanga a diniwroko foe en, èn a boekoe e meki wi froestan moro boen, sortoe sma a ben de. Baka di son sma leisi a boekoe, den e firi leki densrefi ben abi na okasi foe de makandra nanga Jesus, foe njan pina leki fa ensrefi ben njan pina, èn si a diniwroko foe en foe krosibei.” Sori go na a fosi prenki ini a boekoe, di e sori a titel. Baka dati go na a inleiding, èn leisi a di foe toe paragraaf ondro na ondrotitel „Leer hem kennen tot uw nut (Abi winimarki foe di joe e leri foe en)”. Efoe a sma e piki boen, dan pristeri en a boekoe.
3 Noso joe ben sa kan taki so wan sani:
◼ „Ini a kresneti ten disi, sma e prakseri foe Jesus. Ma, foe di so foeroe takroe sani e pasa na heri grontapoe, meki son sma kan aksi densrefi efoe Jesus troetroe e broko en ede nanga wi. Fa joe e prakseri foe dati?” Gi okasi foe piki. Go na kapitel 24 foe a Grootste mens-boekoe (A moro bigi man-boekoe), èn taki sjatoe foe san ede Jesus ben kon na grontapoe. Baka dati leisi Johanes 15:13, ala di joe e poti krakti na tapoe a troe lobi di Jesus ben abi gi tra sma nanga en heri ati. No frigiti foe abi na joe den moro njoen tijdschrift, wan brochure, noso wan traktaat di fiti, foe pristeri efoe a sma no wani a boekoe.
4 Djaso wan tra pristeri de:
◼ „Moro foeroe foe den jongoe sma e soekoe wan model foe waka na baka dati, ma boen model de tranga foe feni. Jesus Krestes ben poti a volmaakti eksempre gi ala sma. [Leisi 1 Petrus 2:21.] A heri libi foe en ben drai lontoe na anbegi foe en hemel Tata. Fa joe e prakseri a ben sa de efoe moro sma ben sa proeberi foe waka na en baka?” Gi okasi foe piki. Sori na tapoe a di foe dri paragraaf tapoe a bladzijde fosi joe doro a lasti bladzijde, pe den spesroetoe eigifasi foe en skrifi. Tjari kon na krin fa a Grootste mens-boekoe (A moro bigi man-boekoe) kan jepi wi alamala foe kon tron moro boen kresten.
5 Joe ben sa wani foe gebroiki wan sani leki disi:
◼ „Te wan sma e kari a nen foe Jesus Krestes, dan foeroe sma e denki foe en leki wan beibi noso leki wan man di e njan pina èn di de foe dede. A prakseri di den abi foe Jesus, abi soso foe doe nanga di a ben gebore èn nanga di a ben dede. Den toemoesi moi sani di a ben taki èn di a ben doe ini a libi foe en, foeroetron sma no e si dati. San Jesus ben doe, abi krakti tapoe ibriwan sma di oiti libi. Foe dati ede a de prenspari taki wi leri so foeroe leki wi man foe den toemoesi moi sani di a ben doe gi a boen foe wi.” Leisi Johanes 17:3. Go na a fosi bladzijde foe na inleiding foe a Grootste mens-boekoe (A moro bigi man-boekoe), èn leisi a di foe fo paragraaf. Tjari kon na krin fa a sma kan kisi a boekoe èn gebroiki en gi persoonlijk studie.
6 Sorgoe taki joe e skrifi ala belangstelling di joe feni èn ala den presi pe joe ben prati a boekoe, so taki joe kan fisiti den baka foe di joe e tjari gobaka. Ala di ten de ete, meki wi soekoe den opregti sma fajafaja èn jepi den foe kon tron bakaman foe wi Froeloesoeman, Jesus Krestes. — Mat. 16:24.