A preiki di wi e preiki—Na wan bigi grani
1 A preiki foe a boen njoensoe na wan bigi grani di Jehovah gi wi (Rom. 15:16; 1 Tim. 1:12). Na so joe e si en? A pasa di a ten e pasa noso a spotoe di trawan e spotoe nanga wi, no moesoe meki taki a warti di a sani disi warti moesoe dede gowe ini wi ai. A tjari di wi e tjari a nen foe Gado, na wan grani di soso wan toe sma nomo e kisi. Fa wi kan meki a warderi di wi e warderi a grani disi, kon moro bigi?
2 A preiki di wi e preiki a Kownoekondre boskopoe, no e meki taki grontapoe e lobi wi. Foeroe sma e si a wroko di wi e doe, leki wan sani di den no e ke foe en, noso leki wan sani di den no abi trobi nanga en. Trawan e spotoe nanga a wroko èn den e gens en. So wan gens foe a preikiwroko, kan kon foe den sma nanga soema wi e wroko, birtisma, noso srefi den memre foe wi osofamiri. Den kan si wi leki sma di no e kisi boen tiri èn sma di law (Joh. 15:19; 1 Kor. 1:18, 21; 2 Tim. 3:12). Den e taki sani di no e gi wi deki-ati èn di e meki wi lasi a faja di wi abi. Den sani disi e meki wi doe a wroko moro safri, noso e meki wi libi a bigi grani di wi abi. Satan e meki negatief fasi foe si sani go na fesi; a „breni a froestan foe den sma di no e bribi, so taki a leti foe a glori boen njoensoe . . . no ben kan skèin kon doro” (2 Kor. 4:4). Fa joe e handri?
3 A de prenspari foe hori na prakseri taki a preiki di wi e preiki foe a Kownoekondre, na a moro prenspari wroko di iniwan foe wi ben kan doe na ini a ten disi. Wi abi wan boskopoe di e kibri sma libi; na no wan tra fasi a boskopoe disi de foe kisi (Rom. 10:13-15). San e teri na taki Gado feni wi boen, èn no taki libisma feni wi boen. A negatief fasi fa grontapoe e si a preikiwroko foe wi, no e tapoe wi foe preiki a boen njoensoe nanga faja.—Tori 4:29.
4 Jesus ben si en leki wan bigi grani foe doe a wani foe en Tata (Joh. 4:34). A ben gi ensrefi foe doe a diniwroko wawan èn a no ben gi pasi taki tra sani poeroe en prakseri noso taki gensman ben meki taki a doe a wroko disi moro safri. Ala ten a preiki foe a Kownoekondre boskopoe ben teki a fosi presi ini a libi foe en (Luk. 4:43). Wi e kisi a komando foe waka baka na eksempre foe Jesus (1 Petr. 2:21). Te wi e doe dati, dan wi e dini leki „kompe wrokoman foe Gado” (1 Kor. 3:9). Wi e doe ala san wi man foe kisi wini foe a grani disi? Wi e soekoe okasi foe prati a boen njoensoe nanga trawan, foe di wi e gi kotoigi na den ten di a gemeente seti gi wi, noso e gi okasi kotoigi? Leki Kotoigi foe Jehovah, ala ten wi moesoe de klariklari foe „meki en nen bekènti na poebliki”.—Hebr. 13:15.
5 A prati di wi abi ini a diniwroko, abi foeroe foe doe nanga a fasi fa wi e si sani. Wi abi dipi warderi gi den sani di Jehovah doe kaba gi wi? Wi kweki wan lobi gi Jehovah ini wi ati, wan lobi di e poesoe wi foe doe ala san wi man doe ini a diniwroko foe en? Te wi e prakseri dipi foe den blèsi di wi e kisi now èn so srefi foe den blèsi di Jehovah pramisi gi a ten di e kon, dan dati e jepi wi foe abi lobi pasa marki gi wi Mekiman. So wan lobi e boeweigi wi foe doe wan sani—foe hori doro ini a Kownoekondre-preikiwroko èn foe doe en doronomo so fara leki den omstandigheid foe wi e gi pasi foe dati. A faja di wi abi, sa de wan boeweisi foe a lobi di wi lobi Jehovah nanga a sma na wi sei.—Mark. 12:30, 31.
6 San wi e doe nanga wan sani èn a fasi fa wi e taki foe en, e sori fa wi e warderi a sani dati. Wi e warderi a grani di wi abi foe preiki foe a Kownoekondre troetroe? Wi e gi glori na a diniwroko foe wi? Wi abi a fasti bosroiti foe hori doro ini a prenspari wroko disi, awansi sma e gens a wroko disi? Efoe wi e si a moi grani disi leki wan bigi grani, dan a de seiker taki wi sa de fajafaja èn sa doe en nanga wi heri ati.—2 Kor. 4:1, 7.