Hori tra sma na prakseri—Pisi 2
1 So fara leki wi man, wi wani foe tan hori wan boen matifasi nanga sma di e libi ini wi kontren. Disi e aksi foe wi taki wi hori tra sma na prakseri èn sori respeki gi den reti nanga den firi foe den.
2 Sma sabi Jehovah Kotoigi leki sma di abi boen maniri. A fasi fa wi e tjari wisrefi, den krosi di wi e weri èn a fasi fa wi e sorgoe wisrefi na dorosei te wi de ini a kontren pe wi e libi, na skoro, èn na a wrokopresi, so boen leki na den konmakandra foe wi, e meki taki sma e taki foeroe boen sani foe wi.—Loekoe A Waktitoren foe 15 juni 1989, bladzijde 38, 39.
3 A no de foe taki, dati foe tjari wisrefi na wan boen fasi, abi foeroe sani na ini toe, soleki eerlijkfasi, a faja di wi e sori foe doe sani, nanga a libi di wi e libi akroederi boen gwenti nanga wet. A abi na ini toe a sori di wi e sori respeki gi sma di e libi ini a birti lontoe wi Kownoekondre zaal. Efoe wi no e sori taki wi e hori wi birtisma na prakseri, dan a fasi fa wi e tjari wisrefi ini a frede gi Gado na ini tra afersi, kan meki taki sma kan si dati leki noti. Paulus ben gi wi deki-ati foe „tjari wisrefi na wan fasi di warti a boen njoensoe”.—Fil. 1:27.
4 Son leisi, sma di e libi krosibei foe son Kownoekondre zaal, kragi foe di den feni taki den wan di e fisiti den konmakandra no e hori den na prakseri. Brada nanga sisa no moesoe tan taki na ini groepoe na fesi a Kownoekondre zaal tapoe a foetoepasi foe a strati èn den no moesoe taki so tranga, dati den sma di e libi na ini den oso lontoe a Kownoekondre zaal, kan jere den. Pikin nengre no moesoe kisi na okasi foe lon go na ini a Kownoekondre zaal èn dan lon go na dorosei baka. Foe naki a doro foe joe oto tapoe èn foe meki a toetoe foe joe oto bari kan hendri den sma ini a birti. Foe tjari wisrefi na so wan fasi, no sa gi a gemeente wan boen nen. So toe, a de prenspari taki wi e gi jesi na ala den lin foe a verkeer te wi e rèi ini a birti foe a zaal.—Rom. 13:1, 2, 5.
5 Wi no moesoe parkeer wi oto na presi di de foe tra sma noso na presi pe wi o meki en moeilek foe tra oto kan rèi pasa, noso na presi pe tra sma moesoe go na ini a djari foe den. Wi no moesoe parkeer wi oto na den presi di den wenkri poti gi sma di e go bai sani na den, efoe wi no kisi primisi foe dati. Pe dri noso fo gemeente e gebroiki a srefi Kownoekondre zaal, dan pikinmoro ibri dei foe a wiki konmakandra e hori. Disi wani taki dati den skin foe owroeman moesoe wroko krosibei nanga makandra ini a tori disi.—Loekoe A Waktitoren foe 1 oktober 1988, bladzijde 8, paragraaf 13.
6 Bijbel e gi wi a deki-ati foe „doe ala sani gi a glori foe Gado”, èn dati abi na ini toe taki wi moesoe hori den wan na prakseri di de dorosei foe a gemeente (1 Kor. 10:31-33). Efoe wi e ’hori ai foe abi persoonlijk belangstelling gi tra sma’, dan wi no sa go na ini a presi foe den foe hendri den, sondro foe prakseri san wi e doe (Fil. 2:4). Wi moesoe loekoe boen toe taki wi no e boemoei nanga den bisnis afersi foe sma di e seri sani ini a kontren.
7 A hori di wi e hori tra sma na prakseri—na ini a gemeente èn dorosei foe a gemeente—na wan fasi foe sori san wi e firi na ini wi ati. San wi e doe èn san wi e taki moesoe sori taki wi „lobi den sma na wi sei leki wisrefi”.—Mat. 7:12; 22:39.